Ŵakulamula

20 Pambesi pakwe, Ayisalayeli wosope ŵayiche kutyochela ku Dani mpaka ku Beleseba soni kutyochela ku chilambo cha Giliyadi. Ŵandu wosopeŵa ŵasongene pampepe mwakamulana* pameso pa Yehofa ku Misipa. 2 Myoyo achakulungwakulungwa ŵa ŵandu wosope ŵali achakulungwakulungwa ŵa mbumba* syosope sya Ayisalayeli, ŵasimanikwe pamsongano wa ŵandu ŵa Mlunguwu. Pamsonganowu pasimanikwesoni asilikali ŵakwenda pasi ŵakujigala maupanga* ŵakwana 400,000.

3 Sambano ŵandu ŵa mu mbumba ja Benjamini ŵapikene yakuti Ayisalayeli apite ku Misipa.

Paŵayiche kweleko, Ayisalayeliwo ŵatandite kwawusya ŵandu ŵaŵasongene kweleko kuti, “Mtusalile, ana chichi chachitendekasisye kuti jwamkongweju awulajidwe?” 4 Pelepo Mlefi jula ŵali ŵamkwakwe ŵa jwamkongwe jwakuwulajidwajo, ŵajanjile kuti, “Une ni jwamasengo jwangu jwamkongweju twayiche mumsinda wa Gibeya kuti tugone kweleko chilo chelecho. 5 Nambo ŵandu* ŵa ku Gibeya ŵanyakwiche ni kusyungulila nyumba janagonile une chilo chelecho kuti anjimuchile. Jemanjaji ŵayiche ni chakulinga chakuti ambulaje nambo mmalomwakwe ŵamkamulile jwamasengo jwanguju, kaneko jwamasengoju ŵawile. 6 Myoyo najigele mtembo wakwe ni kuwukatanya mapisimapisi,* kaneko natumisye mapisigo m’chilambo chosope cha Ayisalayeli. Ndesile yeleyi ligongo lyakuti jemanjaji atesile chindu chakutesya sooni soni chakunyalaya mu Isalayeli. 7 Sambano jemanja Ayisalayeli wosope akambilane nganiji ni alole yachatende.”

8 Kaneko ŵandu wosopewo ŵajimi ni kuŵecheta kuti, “Jwalijose jwetuwe akajawula ku chitenti chakwe kapena kunyumba jakwe. 9 Sambano ayi ni yachitutende ni msinda wa Gibeya, chitutende kalotalota* kuti tumanyilile ŵachajawule kuti akamenyane ngondo ni msindawo. 10 Pa ŵandu 100 ŵaliwose, chitujigale achalume 10, pa ŵandu 1,000 ŵaliwose, chitujigale achalume 100 soni pa ŵandu 10,000 ŵaliwose, chitujigale achalume 1,000. Chitujigale achalume ŵeleŵa kutyochela mu mbumba syosope sya Ayisalayeli. Jemanjaji chalokoteleje yakulya ya asilikali ni chakulinga chakuti asilikaliwo akalimbane ni msinda wa Gibeya wa Abenjamini ligongo lya yindu yakutesya sooni yatesile jemanjajo mu Isalayeli.” 11 Myoyo pamsonganowu achalume wosope ŵa Chiyisalayeli ŵakamulene* mpela gulu jimo kuti akamenyane ngondo ni msinda wa Gibeya.

12 Kaneko mbumba sya Isalayeli syatumile achalume kuti ajawule akasalile ŵakulongolela wosope ŵa mu mbumba ja Benjamini kuti, “Ligongo chichi achalume ŵane ŵa mu mbumba jenu atesile chindu chakusakala chelechi? 13 Sambano mtupe akuno achalume ŵangalondeka ŵa mumsinda wa Gibeyawo. Tukusaka twawulaje jemanjajo kuti tutyosye chindu chakusakalachi pasikati pa Ayisalayeli.” Nambo ŵandu ŵa mu mbumba ja Benjamini nganasaka kwapikanila achalongo achimjawowo.

14 Kaneko achalume ŵa mu mbumba ja Benjamini ŵakopweche m’misinda jawo ni kuja kusongana pampepe mumsinda wa Gibeya. Jemanjaji ŵatesile yeleyi kuti akamenyane ni achalume ŵa Chiyisalayeli. 15 Myoyo pa lisiku lyelelyo, achalume 26,000 ŵa mu mbumba ja Benjamini, ŵasongene pampepe kutyochela m’misinda jawo, jwalijose ali ajigele upanga. Konjechesya pelepa, papalisoni achalume 700 ŵaŵasagwile kutyochela mumsinda wa Gibeya. 16 Pa gulu ja asilikaliŵa papalisoni achalume 700 ŵaŵasagwile, ŵele ŵaŵakamulichisyaga masengo mkono wamchiji. Jwalijose mwa achalume ŵeleŵa jwaliji jwakombola kuponya liganga ni kulonda atamose luwumbo nambo ngakulusya.

17 Nambo achalume ŵa mbumba sine sya Ayisalayeliwo ŵasonganganyisye asilikali 400,000, jwalijose jwakujigala upanga. Achalume wosopeŵa, jwalijose jwaliji jwakumanyilila chenene kuputa ngondo. 18 Jemanjaji ŵanyakwiche kwawula ku Beteli kuti akawusye lunda kwa Mlungu. Ayisalayeliwo paŵayiche kweleko ŵawusisye kuti, “Ana ŵani ŵachatulongolele pakwawula ku ngondo jakulimbana ni Abenjamini?” Pelepo Yehofa ŵajanjile kuti, “Mbumba ja Yuda ni jachijimlongolele jemanja.”

19 Panyuma pa yeleyi, Ayisalayeliwo ŵajimwiche kundaŵindaŵipe ni kuja kukunga matenti gawo pakosechela kuti amenyane ngondo ni msinda wa Gibeya.

20 Sambano asilikali ŵa Chiyisalayeliwo ŵanyakwiche kuti akamenyane ni ŵa mu mbumba ja Benjaminiwo. Jemanjaji ŵatandite kuŵandichila msinda wa Gibeyawo ali akosechele kuti amenyane nawo ngondo. 21 Pelepo asilikali ŵa mu mbumba ja Benjamini ŵakopweche mumsinda wa Gibeya ni kuwulaga asilikali 22,000 ŵa Chiyisalayeli pa lisiku lyelelyo. 22 Nambope asilikali ŵa Chiyisalayeliwo ŵalimbile mtima ni kwawulasoni pamalo galagala ali akosechele kuputa ngondo mpela muŵatendele pa lisiku lyandanda. 23 Kaneko Ayisalayeli ŵanewo ŵanyakwiche kwawula ku Beteli. Paŵayiche kweleko ŵatandite kulila pameso pa Yehofa mpaka ligulo, ni ŵawusisye lunda kwa Yehofa kuti, “Ana tujawulesoni kukumenyana ni achalongo achimjetu, ŵandu ŵa mu mbumba ja Benjamini?” Pelepo Yehofa ŵajanjile kuti, “Elo, mjawule mkamenyane nawo.”

24 Myoyo Ayisalayeli ŵapitesoni kukumenyana ni ŵandu ŵa mu mbumba ja Benjamini pa lisiku lyaŵili. 25 Pelepo ŵandu ŵa mu mbumba ja Benjamini ŵakopweche mumsinda wa Gibeya kuti akasimane ni jemanjajo pa lisiku lyaŵililyo, mwamti ŵawuleje asilikali 18,000 ŵa Chiyisalayeli. Asilikali wosopeŵa, jwalijose jwaliji ali ajigele upanga. 26 Yili yitendekwe yeleyi, achalume wosope ŵa Chiyisalayeli ŵanyakwiche kwawula ku Beteli. Jemanjaji ŵatemi ni kulilaga pameso pa Yehofa. Pa lisiku lyeleli jemanjajo ŵalijimile kulya mpaka ligulo, soni ŵapeleche mbopesi syakutinisya soni mbopesi syamkamulano pameso pa Yehofa. 27 Panyuma pakwe, Ayisalayeliwo ŵawusisye lunda kwa Yehofa, pakuŵa libokosi lya chilanga lya Mlungu jwakuwona lyaliji kweleko m’masiku gelego. 28 Sambano Pinihasi mwanache jwa Eliyesala, chisukulu cha Aloni, ŵatumichilaga mpela jwakutaga mbopesi pasogolo pa libokosi lya chilanga m’masiku gelego. Jwalakwe ŵawusisye kwa Mlungu kuti, “Ana tujawulesoni tukamenyane ni achalongo achimjetu, ŵandu ŵa mu mbumba ja Benjamini kapena tukajawula?” Pelepo Yehofa ŵajanjile kuti, “Elo mjawule, pakuŵa malaŵi chinjapeleka jemanjajo mmyala mwenu.” 29 Kaneko Ayisalayeliwo ŵatumisye asilikali kuti akajuŵe kusyungulila msinda wosope wa Gibeyawo.

30 Myoyo Ayisalayeliwo ŵanyakwiche kuti akamenyane ni Abenjamini pa lisiku lyatatu. Jemanjajo ŵawuŵandichile msinda wa Gibeyawo ali akosechele kuti amenyane nawo ngondo mpela muŵantendele ndaŵi sine sila. 31 Kaneko ŵandu ŵa mu mbumba ja Benjaminiwo ŵakopweche mumsindamo kuti akasimane ni gulu ja asilikaliwo. Asilikaliwo ŵawutile jemanjajo mpaka ŵawutalichile msindawo. Kaneko mpela muŵatendele ndaŵi sine sila, ŵandu ŵa mu mbumba ja Benjamini ŵatandite kwawulaga ŵane mwa asilikaliwo pamisewu jakupita mumgunda. Msewu wine waliji wakwinjilila ku Beteli soni wine waliji wakwinjilila ku Gibeya, mwamti ŵawuleje achalume 30 ŵa Chiyisalayeli ni kwaleka mumgunda ali awile. 32 Pelepo ŵandu ŵa mu mbumba ja Benjamini ŵatandite kuŵecheta kuti, “Tutandite kwagomeka, mpela mutwagomechele maulendo gapite gala.” Nambo Ayisalayeliwo ŵatite, “Chitwatileje kuti twawutile jemanjajo kutali ni msindawo mpaka m’misewu jakupita mumgunda.” 33 Sambano asilikali wosope ŵa Chiyisalayeli ŵanyakwiche m’malo gawo ni kwawula ku Baala-tamala kuŵajimi ali akosechele kuputa ngondo. Nombenawo asilikali ŵaŵajuŵile mwakuŵandikana ni msinda wa Gibeya ŵala, ŵakopweche m’malo gawo. 34 Myoyo asilikali 10,000 ŵakumanyilila chenene kuputa ngondo ŵaŵasagwile, ŵayiche ni kwima kusogolo kwa msinda wa Gibeyawo, mwamti papali ngondo jekulungwa. Nambo achalume ŵa mu mbumba ja Benjaminiwo nganamanyilila kuti asigele panandi kusimana ni yakogoya.

35 Yehofa ŵagomeche ŵandu ŵa mu mbumba ja Benjamini pameso pa Ayisalayeli, mwamti pa lisiku lyeleli achalume ŵakwana 25,100 ŵa mu mbumba ja Benjamini ŵawulajidwe. Achalume wosopeŵa jwalijose jwaliji jwakujigala upanga.

36 Nambope ŵandu ŵa mu mbumba ja Benjamini ŵaganisyaga kuti achalume ŵa Chiyisalayeli chiŵagomeche ligongo lyakuti ŵatilaga. Nambo achalume ŵa Chiyisalayeliwo ŵatilaga jemanjaji ligongo lyakuti ŵadalilaga asilikali ŵaŵajuŵile mwakuŵandikana ni msinda wa Gibeya ŵala. 37 Kaneko asilikali ŵaŵajuŵile ŵala ŵatesile yindu mwachitemachitema ni kuwutuka kwinjila mumsinda wa Gibeyawo. Paŵajinjile mumsindawo asilikaliwo ŵamwasikangene ni ŵawuleje ŵandu wosope ni upanga.

38 Sambano achalume ŵa Chiyisalayeli ŵaliji ali alinganyisye yakuti asilikali ŵachakawujuŵilile msindawo, akawupambe moto msindawo ni chakulinga chakuti lyosi likatucheje mwinani kuti chiŵe chimanyisyo.

39 Sambano Ayisalayeli paŵagalawiche ni kutanda kutila, achalume ŵa mu mbumba ja Benjamini ŵatandite kumenyana nawo, ni ŵawuleje achalume 30 ŵa Chiyisalayeli. Jemanjajo ŵaŵechetaga kuti, “Apatu yikuwonechela chenene kuti jemanjaji akulusa ngondoji mpela muyaŵelele pandanda pala, nditu mpela muyaŵelele pangondo jipite jila.” 40 Nambo lyosi lyalyaliji mpela chimanyisyo chawo lyatandite kutuka kutyochela mumsindawo kwawula mwinani. Pelepo achalume ŵa mu mbumba ja Benjamini paŵagalawiche ni kulola, ŵayiweni kuti msinda wosopewo ukukolela moto. 41 Kaneko achalume ŵa Chiyisalayeli ŵagalawiche ni kutanda kumenyana nawo. Pelepo achalume ŵa mu mbumba ja Benjamini wakamwile mnope woga ligongo ŵayiweni kuti yakogoya yagwilile jemanjajo. 42 Myoyo jemanjajo ŵatandite kwatila achalume ŵa Chiyisalayeliwo ni kwinjililaga ku chipululu. Nambope ngondojo jaliji mkwakuya jemanjajo, mwamti achalume ŵakopweche m’misinda ni kwika kukwakamuchisya achalume ŵa Chiyisalayeli pakwawulaga jemanjajo. 43 Jemanjajo ŵasyungulile Abenjaminiwo ni kutanda kwatoposya mwangalechesya. Ŵapondilepondile jemanjajo chiŵandika msinda wa Gibeya chakungopokolyuŵa kwakwe. 44 Pambesi pakwe, achalume ŵakwana 18,000 ŵa mu mbumba ja Benjamini ŵawulajidwe. Achalume wosopeŵa ŵaliji asilikali ŵamachili.

45 Kaneko achalume ŵa mu mbumba ja Benjamini ŵagalawiche ni kutanda kutilila ku chipululu, ku lwala lwa Limoni. Nambo Ayisalayeli ŵawuleje ŵane mwa jemanjaji ŵakwana 5,000 m’misewu. Ayisalayeliwo ŵapitilisye kwatoposya jemanjajo mpaka ŵayiche ku Gidomu. Myoyo jemanjaji ŵawulejesoni achalume ŵane ŵakwana 2,000 ŵa mu mbumba ja Benjamini. 46 Achalume wosope ŵa mu mbumba ja Benjamini ŵaŵawuleje pa lisiku lyeleyi ŵakwanile 25,000. Jwalijose mwa achalumeŵa jwaliji jwakujigala upanga soni jwaliji msilikali jwamachili. 47 Nambo achalume 600 ŵatilile ku chipululu ku lwala lwa Limoni, mwamti ŵatemi ku lwala lwa Limoniko kwa myesi mcheche.

48 Kaneko achalume ŵa Chiyisalayeliwo ŵagalawiche ni kuja kuwulaga ni upanga ŵandu ŵa mu mbumba ja Benjamini ŵaŵaliji mumsindawo. Jemanjajo ŵawuleje yosope yayaliji mwelemo, kutandila mundu soni mpaka yilango. Nambosoni jemanjajo ŵajochiche moto misinda josope jaŵatyochelaga ŵanduwo.