Detulonomo
20 “Pampite kungondo kukumenyana ni adani ŵenu, ni pamli kweleko mgaweni mahachi gawo gejinji, magaleta* gawo soni asilikali ŵawo ŵajinji kumpunda jemanja, mkaja kutenda woga. Mkaja kutenda woga ligongo Yehofa Mlungu jwenu juŵamkopwesye m’chilambo cha Iguputo ali ni jemanja. 2 Pamkoseche kuti mpute ngondo, jwakutaga mbopesi ayicheje ni kuŵechetana ni asilikali. 3 Jwalakwejo ŵasalileje asilikaliwo kuti, ‘Mpikane jemanja Ayisalayeli, jemanja msigele panandi kuti mmenyane ni adani ŵenu. Mkaja kutenguka kapena kutenda woga kapenasoni kutetemela ligongo lya jemanjajo, 4 pakuŵa Yehofa Mlungu jwenu ali ni jemanja pamkulimbana ni adani ŵenuwo soni chakamkulupusye.’
5 “Achakulungwakulungwa ŵa asilikali nombenawo akusosekwa kwasalila ŵanduwo kuti, ‘Ana pana mundu jwalijose jwataŵile nyumba jasambano nambo nganaŵe kutanda kutamamo? Naga apali, awujile ku nyumba jakwe, kogopela kuti mpaka akawe kungondo mundu jwine ni kutanda kutama m’nyumba jakwejo. 6 Ana pana mundu jwapandile yitela ya mipeleya mumgunda mwakwe nambo nganaŵe kutanda kulya yisogosi yakwe? Naga apali, awujile kunyumba, kogopela kuti mpaka akawe kungondo mundu jwine ni kutanda kulya yisogosi yakwe. 7 Ana pana mundu jwalijose jwali pachitomelo ni jwamkongwe mwamti nganaŵe kulombana najo? Naga apali, awujile kunyumba, kogopela kuti mpaka akawe kungondo jwamlume jwine ni kwalomba ŵakongwewo.’ 8 Achakulungwakulungwa ŵa asilikaliwo ŵawusyejesoni ŵanduwo kuti, ‘Ana pana mundu jwalijose jwakutenda woga soni kutenguka? Naga apali, awujile kunyumba, kogopela kuti mpaka ŵatendekasye achalongo achimjakwe kwasa mtima mpela mwaŵelele jwalakwejo.’* 9 Achakulungwakulungwa ŵa asilikaliwo pamalisisye kuŵecheta yeleyi ni asilikaliwo, jemanjajo asaguleje ŵakulongolela magulu ga asilikali kuti ŵalongoleleje asilikaliwo.
10 “Pamŵandichile msinda kuti mmenyane nawo, mgombelesyeje mfundo sya mtendele. 11 Naga ŵandu ŵa mumsindawo akwitichisya mfundo sya mtendelesyo mwamti akumwugulila mageti, wosope ŵachimwasimane mwelemo aŵeje ŵenu kuti amkamulileje masengo mpela achikapolo, mwamti chachimtumichilaga jemanja. 12 Nambo naga jemanjajo akukana kukamulana ya mtendele ni jemanja, mmalomwakwe akwika kukumenyana ngondo ni jemanja, pelepo mwusyungulileje msindawo. 13 Yehofa Mlungu jwenu nditu chachiwupeleka msindawo mmyala mwenu, mwamti chimchisosekwa kumwulaga ni upanga* jwamlume jwalijose jwa mumsindamo. 14 Nambope achakongwe, ŵanache, yilango soni chilichose chachili mumsindamo, kwamba kuti yosope yampatile mumsindamo, chimchiyijigala kuti yiŵe yenu. Jemanja mkajigaleje yindu yampatile kwa adani ŵenuwo, pakuŵa Yehofa Mlungu jwenu ampele yeleyo.
15 “Yeleyi ni yachimkatendeje ku misinda josope jajili kwakutalika, misinda jele janganijiŵa ja ŵandu ŵamitundu jine ŵamŵandikene nawo. 16 Nambo m’misinda ja ŵandu ŵamŵandikene nawo jachakampe Yehofa Mlungu jwenu kuti chiŵe chipanje chenu, mkawulaje chaumi chilichose. 17 Jemanja mkajonanje mitundu josope ja ŵandu ŵeleŵa. Mitundu jakwe jili Ahiti, Aamoli, Akanani, Apelesi, Ahifi soni Ayebusi. Mkajijonanje mitundu jeleji mpela yaŵatite Yehofa Mlungu jwenu pakumlamula jemanja. 18 Mkatende yeleyi ni chakulinga chakuti jemanjajo akaja kumjiganya kuti mkuyeje matala gawo gosope gakunyalaya gakusatenda pakujitindiŵalila milungu jawo. Yeleyi mpaka yimtendekasye jemanja kumlemwechesya Yehofa Mlungu jwenu.
19 “Naga mwusyungulile msinda ni chakulinga chakuti mwusumule, soni mŵele mli mkumenyana ngondo ni ŵandu ŵamumsindawo kwa masiku gejinji, mkaja konanga yitela mwakuyigwisya ni liŵago. Mpaka mlyeje yisogosi yakwe, nambo mkagwisya yitelayo. Ana yili yakuŵajilwa kuti mlimbane ni chitela chamumgunda mpela yamkusati pakulimbana ni mundu? 20 Nambo chitela chele chamkumanyilila kuti yisogosi yakwe ŵandu ŵangalya chelecho mpaka mkachijonanje. Mpaka mkagwisye chitelacho ni kuchikamulichisya masengo pakutaŵa lutenje kusyungulila msinda wamkulimbana nawowo mpaka msindawo uli ugwile.