Masalimo
Kwa jwakulongolela nyimbo. Ajimbe nyimboji ni yida yakwimbila yangonji. Nyimbo ja Daudi.
61 Wawo Mlungu, apikane kulila kwangu kwakuŵenda kuti angamuchisye.
Atejele liwiwi lyawo kuti apikane lipopelo lyangu.
2 Pandaŵi janjasile mtima,* une chinjalilila wawojo
Kutyochela kumbesi kwa chilambo chapasi.
Alongolele une ku lwala lwaluli lwelewu kumbunda une ni kumbika penani pa lwalalo.
3 Pakuŵa wawojo ali malo gangu gakuuŵa,
Sanja jangu jakulimbangana jakunjenjela une kwa mdani* jwangu.
4 Une chinjitama mu tenti jawo mpela mlendo mpaka kalakala.
Chinjijuŵa pasi pa mapapiko gawo. (Selah)
5 Pakuŵa wawojo, wawo Mlungu jwangu, apikene yilanga yangu yandesile.
Wawojo ambele une chipanje chakuŵajilwa kupochela ŵandu ŵakusajogopa lina lyawo.
6 Wawojo chachijonjechesya masiku ga umi wa mwenye,
Soni jwalakwe chachitama yaka yejinji kumibadomibado.*
7 Jwalakwe chachitama pampando waumwenye* pameso pa Mlungu mpaka kalakala.
Amlosye chinonyelo chawo chakulupichika soni aŵe ŵakulupichika kwa jwalakwejo, kuti yeleyi yimchenjele jwalakwejo.