Buku Jaŵili ja Samuyele
7 Sambano mwenyewo paŵatamaga m’nyumba* jawo soni Yehofa paŵapele mtendele mwakwachenjela kwa adani ŵawo wosope, 2 mwenyewo ŵamsalile Natani juŵaliji jwakulochesya kuti, “Une ngutama m’nyumba jamatabwa ga chitela cha mkungusa nambo Libokosi lya Mlungu jwakuwona likutama mu chitenti changuwo.” 3 Pelepo Natani ŵajanjile mwenyewo kuti, “Atende yiliyose yawukusaka mtima wawo, pakuŵa Yehofa ali ni wawojo.”
4 Chilo chichocho, Yehofa ŵaŵechete ni Natani kuti, 5 “Mnyakuche soni mkamsalile jwakutumichila jwangu Daudi kuti, ‘Yehofa aŵechete ayi, “Ana mmwejo mkusosekwa kundaŵila nyumba jakuti une ndamejemo? 6 Unetu nganindameje m’nyumba kutandila pandaŵi janakopwesye Ayisalayeli ku Iguputo mpaka lelojino. Une mbele ndili mkutama* mu chitenti. 7 Mundaŵi josope jele jambele ndili mkwenda ni mtundu wosope wa Ayisalayeli, ana pakwete panamsalile jwalijose mwa ŵakulongolela ŵa mbumba sya Isalayeli ŵele une nasagwile kuti ŵasamalileje ŵandu ŵangu, kuti, ‘Ligongo chichi jemanja nganimundaŵila nyumba ja yitela yamkungusa?’”’ 8 Sambano mkaŵechete ayi kwa jwakutumichila jwangu Daudi, ‘Yehofa Mlungu jwakusalamulila yakwinani aŵechete kuti, “Une namjigele mmwejo kutyochela kwitinji kwele mmwejo mwaliji mkwenda panyuma pa yilango ni chakulinga chakuti mwalongoleleje ŵandu ŵangu Ayisalayeli. 9 Une chinjiŵa ni mmwejo kulikose kwamkwawula, soni une chinjimalana ni adani ŵenu wosope. Nambosoni chinjimpanganyichisya mmwejo lina lyakumanyika mnope mpela lina lya ŵandu ŵakumanyika mnope pachilambo chapasi. 10 Une chinjasagulila malo ŵandu ŵangu Ayisalayeli ni kwapa kuti atameje. Jemanjajo chachitama kweleko soni ngasipapagwa chilichose chakwasokonasya. Mwamti ŵandu ŵakusakala ngasiŵalagasya jemanjajo ata panandi mpela muŵatendelaga pandanda, 11 kutandila palisiku lyanasagwile ŵakwelusya pasikati pa ŵandu ŵangu Ayisalayeli. Soni une chinjimpa jemanja mtendele mwakumchenjela kwa adani ŵenu wosope.
“‘“Nambosonitu Yehofa amsalile kala mmwejo kuti Yehofajo chachitendekasya kuti liŵasa lyenu liŵe lya mayimwene.* 12 Masiku ga umi wenu pagachimala soni mmwejo pachimchigona kuti mpumule yimpepe ni achinangolo ŵenu, pelepo chinjitendekasya kuti mbeju jenu, jwali mwanache jwenu jusyesyene kuŵa mwenye panyuma penu, mwamti chinjiwutamilikasya mwamachili uchimwene wakwe. 13 Jwalakwejo ni juchachindaŵila nyumba jakumanyika ni lina lyangu, mwamti chinjitamilikasya mwamachili mpando wa uchimwene wakwe mpaka kalakala. 14 Une chinjiŵa babagwe soni jwalakwe chachiŵa mwanangu. Jwalakwe patesile chakulemwa une chinjimjamuka pakamulichisya masengo ndodo ja ŵandu soni yikwapu ya ŵanache ŵa ŵandu.* 15 Chinonyelo changu changamala ngasinachityosya pa jwalakwe mpela yanatite pakuchityosya pa Sauli, jwele namtyosisye pameso penu. 16 Une chinjijichenjela nyumba jenu soni uchimwene wenu mpaka kalakala. Nambosoni mpando wenu wa uchimwene uchitamilichika mwamachili mpaka kalakala.”’”
17 Natani ŵamsalile Daudi maloŵe gosopega soni yosope yaŵamlosisye Mlungu.
18 Pelepo Mwenye Daudi ŵayiche pameso pa Yehofa ni kuŵecheta kuti, “Ana une ndili ŵani, wawo Yehofa Ambuje Ŵakulungwa Mnope? Soni ana ŵandu ŵa m’nyumba jangu apundile uli kuti wawojo andendele une yindu yekulungwa mpela yeleyi? 19 Wawo Yehofa Ambuje Ŵakulungwa Mnope aŵechetesoni yakwamba nyumba ja une jwakutumichila jwawo kuti jichiŵapo mpaka kalakala mnope. Wawotu andendele yeleyi mpela kuti yindu yandendele kala nganiyiŵa yakwanila. Nambosoni wawo Yehofa Ambuje Ŵakulungwa Mnope alitesile lyeleli kuŵa lilamusi kwa ŵandu ŵamitundu josope. 20 Ana mpaka mbechetesoni yamtuli pakuŵa wawojo Yehofa Ambuje Ŵakulungwa Mnope akumanyilila une chenene? 21 Wawotu atesile yindu yekulungwa mnope yosopeyi soni kuyimanyikasya yinduyo kwa une jwakutumichila jwawo. Atesile yeleyi ligongo lya maloŵe gaŵasasile wawojo soni mwakamulana ni yakusaka ya mtima* wawo. 22 Ni ligongo lyakwetu wawo Yehofa Ambuje Ŵakulungwa Mnope ali Mlungu jwamkulungwa. Kwangali jwalijose jwakulandana ni wawo, soni kwangali Mlungu jwine jwalijose akaŵe wawojope basi. Yindu yosope yatupikene ni mawiwi getu yikutusimichisya yeleyi. 23 Ana ni mtundu wapi pachilambopa wampaka ulandane ni ŵandu ŵawo Ayisalayeli? Mlungu ŵapite kukwawombola jemanjaji kuti aŵe ŵandu ŵakwe. Jwalakwe ŵalipanganyichisye lina mwakwatendela jemanjajo yindu yekulungwa mnope soni yakusimonjesya. Wawojo ŵajitopwesye mitundu ja ŵandu pampepe ni milungu jawo mmalo mwa ŵandu ŵawo. Ŵandu ŵele wawojo ŵawombwele mwakwakoposya m’chilambo cha Iguputo. 24 Wawo ŵatesile yakuti ŵandu ŵawo Ayisalayeli aŵe ŵandu ŵawoŵawope kwangamala. Sonitu wawo Yehofa aŵele Mlungu jwawo.
25 Sambano wawo Yehofa Mlungu, atende yosope yaŵasasile kuti chachimtendela jwakutumichila jwawo soni ŵandu ŵa m’liŵasa lyakwe kwangamala. Chonde atende mwakamulana ni yaŵasasile kuti chachitenda. 26 Lina lyawo lichimbichikwe mpaka kalakala ni chakulinga chakuti ŵandu aŵechete kuti, ‘Yehofa jwakusalamulila yindu ya kwinani ali Mlungu jwa Ayisalayeli.’ Soni nguŵenda kuti nyumba ja Daudi jwali jwakutumichila jwawo jitamilichiche pameso pawo. 27 Pakuŵa wawojo Yehofa Mlungu jwakusalamulila yakwinani, soni Mlungu jwa Ayisalayeli amtendekasisye jwakutumichila jwawo kumanyilila ya msogolo mwakumsalila kuti, ‘Une chinjitenda yakuti liŵasa lyenu liŵe lya achayimwene.’ Ni ligongo lyakwe jwakutumichila jwawo alimbile mtima kupopela kwa wawojo lipopelo lyeleli. 28 Nambosonitu wawo Yehofa Ambuje Ŵakulungwa Mnope, ali Mlungu jwakuwona, soni maloŵe gawo gali gakuwona. Wawojo asalile kuti chachimtendela yindu yamboneyi jwakutumichila jwawo. 29 Myoyo nguŵenda kuti ŵape upile ŵandu ŵa m’nyumba ja jwakutumichila jwawo, soni kuti jemanjaji apitilisye kusimanikwa pameso pawo mpaka kalakala. Pakuŵa wawo Yehofa Ambuje Ŵakulungwa Mnope aŵechete yeleyi kuti chachiyitenda. Mwamti ni upile wakutyochela kwa wawojo ŵandu ŵa m’nyumba ja jwakutumichila jwawo aŵe ŵana upile mpaka kalakala.”