Chiwunukuko Chakwawula kwa Yohane
13 Myoyo chingwena chila chagambile kwima pa mchenga wa mungulugulu nyasa.
Kaneko nachiweni chilombo chili mkukopoka m’nyasamo. Chilombocho chakwete misengo 10 soni mitwe 7. Kumisengo jakwejo kwaliji yisoti yaumwenye yakwana 10, nambo pamitwe jakwe paliji mena gakunyosya Mlungu. 2 Chilombo chanachiwenicho chawonekaga mpela chisuŵi, nambo sajo syakwe syaliji mpela sya chimbalangondo, soni kukamwa kwakwe kwawonekaga mpela kukamwa kwa lisimba. Pelepo chingwenacho chapeleche kwa chilombocho machili gakwe. Chapelechesoni mpando wakwe waumwenye soni ulamusi wekulungwa.
3 Kaneko nawuweni mtwe wakwe umo uli mkuwoneka kuti wana liŵanga lyekulungwa lyakuti mpaka kuwa nalyo, nambo liŵangalyo lyaposile. Pelepo ŵandu ŵa pachilambo chapasi ŵatandite kuchikuya chilombocho soni ŵaliji mkuchilapilila ligongo lyakuchikumbila. 4 Ŵanduwo ŵatandite kuchitindiŵalila chingwena chila ligongo chapeleche ulamusi ku chilombocho. Jemanjaji ŵachitindiŵalilesoni chilombocho ni kuŵechetaga kuti, “Ana ŵani ŵampaka alandane ni chilombochi, soni ana ŵani ŵampaka amenyane nacho?” 5 Chingwena chila chapelechesoni ku chilombocho ulamusi wakuŵecheta yindu yakulikwesya soni yakunyosya Mlungu, nambosoni chapeleche ulamusi kuti chilombocho chitendeje yiliyose yachikusaka kwa myesi 42. 6 Kaneko chilombocho chawugwile pakamwa pakwe ni kuŵechetaga yindu yakunyosya Mlungu, yakunyosya lina lyakwe, soni malo gakwe gakutama. Chalijisoni mkwanyosya atamose ŵakutama kwinaniko. 7 Chilombocho ŵachikundilesoni kuti chitendeje ngondo ni ŵaswelawo soni kuti chagomeche. Ŵachipelesoni ulamusi wakuti chilamulileje ŵandu ŵa mbumba jilijose, mtundu uliwose, chiŵecheto chilichose, soni chilambo chilichose. 8 Wosope ŵakutama pachilambo chapasi chachichitindiŵalila chilombocho. Kutandila pandaŵi jiŵachitamilikasisye chilambo,* mena ga ŵandu ŵeleŵa nganagalemba mu mpukutu wa umi wa Mwanache Jwangondolo jwele ŵamwuleje.
9 Jwakwete mawiwi apikane. 10 Naga jwine ali jwakuŵajilwa kwawula ku ukapolo, chachijawula nditu ku ukapolo. Naga jwine chachimwulaga mjakwe ni upanga, jwelejosoni chachisosekwa kumwulaga ni upanga.* Alitu ni ligongo lyakwe ŵaswelawo akusosekwa kuŵa ŵakupilila soni kola chikulupi.
11 Kaneko nachiweni chilombo chine chili mkukopoka kutyochela pasi pachilambo chapasi. Chilombochi chakwete misengo jiŵili mpela mwanache jwangondolo, nambo chatandite kuŵecheta mpela chingwena chila. 12 Chilombochi chalamulilaga ni ulamusi wosope wa chilombo chandanda chila, chilombo chandandacho chili mkulola. Nambosoni chatendekasisye chilambo ni ŵakutama m’chilambomo kuti achitindiŵalileje chilombo chandandacho, chele liŵanga lyakwe lyachasosekwaga kuwa nalyo lila lyaposile. 13 Chatesilesoni yimanyisyo yekulungwa, mpaka chagwisisye moto pachilambo chapasi kutyochela kwinani ŵandu wosope ali mkulola.
14 Chilombochi chasokonasisye ŵandu ŵakutama pachilambo chapasi. Chatesile yeleyi pakamulichisya masengo yimanyisyo yaŵachikundile kuti chitende pameso pa chilombo chandanda chila. Chasalilesoni ŵandu ŵakutama pachilambo chapasi kuti apanganye chiwanichisyo cha chilombo chandanda chila chele chakwete liŵanga lya upanga, nambo chalamile. 15 Nambosoni ŵachikundile kuti chipeleche mpweya* kwa chiwanichisyo cha chilombo chandanda chila, ni chakulinga chakuti chiwanichisyo cha chilombocho chitande kuŵecheta soni kulamula kuti wosope ŵakukana kuchitindiŵalila ŵawulaje.
16 Chilombochi chakanganichisye ŵandu wosope kuti ŵaŵiche chimanyisyo pamkono wawo wamlyo soni pausyo pawo, chinga ŵakuchimbichika soni ŵangachimbichika, ŵakusichila soni ŵakulaga, atamosesoni achikapolo soni mfulu.* 17 Chakanganichisyesoni ŵandu kuti pakapagwa jwakusuma kapena kusumisya naga nganakola chimanyisyocho, chachili lina lya chilombo chila kapena nambala ja lina lyakwe. 18 Pelepa ni papakusosekwa lunda. Jwalijose jwali jwakumanyilila aŵalanjile nambala ja chilombocho, pakuŵa nambala jakwejo jili nambala ja mundu. Nambala jakwe jili 666.