Buku Jaŵili ja Samuyele

21 Sambano m’masiku ga Daudi kwapali sala jajatendekwe kwa yaka yakwana yitatu. Myoyo Daudi ŵawusisye kwa Yehofa soni Yehofajo ŵamjanjile jwalakwejo kuti, “Sauli yimpepe ni ŵandu ŵa m’nyumba jakwe akwete magambo ga myasi, ligongo ŵawuleje Agibiyoni.” 2 Myoyo mwenyewo ŵaŵilasile Agibiyoni ni kuŵechetana nawo. (Agibiyoniŵa nganaŵa ŵamtundu wa Chiyisalayeli. Nambo ŵaliji Aamoli ŵaŵasigalile, mwamti Ayisalayeli ŵaliji ali ŵalumbilile jemanjaji kuti ngasiŵawulaga. Nambope Sauli ŵaganichisye yakwawulaga jemanjaji ligongo lyakusachilila kwakwe kwakamuchisya Ayisalayeli soni Ayuda.) 3 Daudi ŵawusisye Agibiyoniwo kuti, “Ana namtendele chichi jemanja, soni ana ndende yamtuli kuti ulemwa wetuwu ukululuchidwe, ni chakulinga chakuti jemanja mpeleche upile pa chipanje cha Yehofa?” 4 Agibiyoniwo ŵamjanjile jwalakwejo kuti, “Ngaŵa kuti m’weji tukusaka kuti mtupe silifa kapena golide pangani jakwayana ni Sauli soni ŵandu ŵa m’nyumba jakweji, soni nganituŵa tumwuleje mundu jwine jwalijose mu Isalayeli.” Pelepo jwalakwe ŵajanjile jemanjajo kuti, “Yiliyose yachimsale chinamtendele.” 5 Pelepo jemanjajo ŵasalile mwenyewo kuti, “Mundu jwele ŵasakaga kutuwulaga m’weji soni juŵatendaga yakuti atujonanje ni kutumasya kuti tukasimanikwa palipose mu Isalayeli muno, 6 atupe ŵanache ŵachalume ŵakwana 7 ŵa mundu jwelejo. M’we chitukoleche mitembo ja jemanjaji pameso pa Yehofa ku Gibeya jwa Sauli jwali jwakusagulidwa jwa Yehofa.” Mwenyewo ni ŵajanjile jemanjaji kuti, “Chambone, chinape ŵanachewo.”

7 Nambope mwenyewo ŵamtendele chanasa Mefiboseti mwanache jwa Yonatani, juŵaliji chisukulu cha Sauli, ligongo lya chilanga chele Daudi ni Yonatani mwanache jwa Sauli ŵatesile pameso pa Yehofa. 8 Myoyo mwenyewo ŵamjigele Alimoni soni Mefiboseti ŵaŵaliji ŵanache ŵaŵili ŵa Lisipa ŵaŵamŵelechele Sauli. Lisipa jwaliji mwanache jwamkongwe jwa Ayiya. Ŵajigelesoni ŵanache msano ŵa Mikala ŵaŵamŵelechele Adiliyele mwanache jwa Balisilayi jwa ku Mehola. Mikalaju jwaliji mwanache jwamkongwe jwa Sauli. 9 Kaneko Daudi ŵapeleche jemanjaji mmyala mwa Agibiyoni. Mwamti Agibiyoniwo ŵakoleche mitembo ja jemanjaji pa litumbi pameso pa Yehofa. Ŵanache 7 wosopewo ŵawilile pampepe. Jemanjaji ŵawulajidwe m’masiku gandanda gakutyosya mbeju, chakundanda kwa m’masiku gakutyosya balele. 10 Kaneko Lisipa mwanache jwa Ayiya, jwajigele chiguduli ni kuchitandika palwala. Jwalakwe jwatandiche chigulichi kutandila cha kundanda kwa masiku gakutyosya mbeju mpaka pandaŵi jele wula jagwilile pa mitembojo kutyochela kwinani. Pandaŵi josopeji jwalakwe nganakunda kuti musi yijuni yamwinani yitule pa mitembojo, soni chilo jwalakwe nganakunda kuti yinyama yakwitinji yiŵandichile pajili mitembojo.

11 Kaneko ŵandu ŵamsalile Daudi yaŵatesile Lisipa ŵamkwakwe ŵapambali ŵa Sauli ŵaŵaliji mwanache jwamkongwe jwa Ayiya. 12 Kaneko Daudi ŵapite ni kuja kujigala mawupa ga Sauli soni mawupa ga Yonatani mwanache jwa Saulijo kutyochela kwa achimlongola ŵa ku Yabesi-giliyadi. Jemanjaji ŵajiŵile mawupaga kutyochela pa luŵala lwa mumsinda wa Betisani kwele Afilisiti ŵakoleche mitembo ja jemanjajo palisiku lyele Afilisitiwo ŵamwuleje Sauli ku Gilibowa. 13 Jwalakwe jwajigele mawupa ga Sauli soni mawupa ga Yonatani mwanache jwa Saulijo kutyochela kweleko, soni ŵanduwo ŵasongangenye mawupa ga mitembo jajakolechedwe jila. 14 Kaneko jemanjaji ŵagaŵisile m’malembe mawupa ga Sauli soni ga Yonatani mwanache jwa Saulijo mu dela ja Benjamini ku Sela. Ŵagaŵisile mu lilembe lya Akisi, babagwe ŵa Sauli. Panyuma pakuti jemanjaji atesile yosope yaŵalamwile mwenye, Mlungu jwapikanile mapopelo gawo gakuchondelela kuti achitendele chanasa chilambocho.

15 Papalisoni ngondo jine pasikati pa Afilisiti ni Ayisalayeli. Myoyo Daudi pampepe ni ŵakutumichila ŵakwe ŵapite kukumenyana ni Afilisitiŵa. Nambo ngondojo jili mkati, Daudi ŵapesile. 16 Kaneko mundu jwine jwa mu mbumba ja Lefaimu lina lyakwe Isibi-benobi juŵakwete lipanga lyakopa lyakusitopa masekeli 300 jwelesoni ŵaliji ali ajigele upanga* wasambano mmyala mwakwe ŵasakaga kumwulaga Daudi. 17 Ndaŵi jijojo Abisayi mwanache jwa Seluya ŵayiche kukumkamuchisya Daudi mwamti ŵamkang’andile Mfilisitijo ni kumwulaga. Pelepo achalume ŵa Daudi ŵamlumbilile jwalakwe kuti, “Ngasimjawulasoni kungondo ni m’weji. Ngamkusosekwa kusimisya nyali ja Isalayeli.”

18 Panyuma pa yeleyi pabuchilesoni ngondo jine jakumenyana ni Afilisiti ku Gobu. Pandaŵi jeleji Sibekayi jwa ku Husa ŵamwuleje Safu jwa mu mbumba ja Lefaimu.

19 Kaneko pabuchilesoni ngondo jine jakumenyana ni Afilisiti ku Gobu. Pa ngondoji Elihanani mwanache jwa Yale-olegimu jwa ku Betelehemu ŵamwuleje Goliyati jwa ku Gati jwele chitela cha lipanga lyakwe chaliji chekulungwa mpela chitela chakuluchila nguwo.

20 Pabuchilesoni ngondo jine ku Gati. Pangondo jeleji papali mundu jwine jwa msingu wakusimonjesya. Jwalakwe jwakwete yala 6 ku ligasa lyakwe lililyose soni jwakwete yala 6 ku lusajo lwakwe lulilose, yosope pampepe yaliji yakwana 24. Jwalakweju jwaliji jwakutyochelasoni mu mbumba ja Lefaimu. 21 Mundu jweleju jwanyosyaga Ayisalayeli. Myoyo Yonatani mwanache jwa Simeyi mlongomjakwe jwa Daudi, ŵamwuleje munduju.

22 Ŵandu mcheche ŵeleŵa ŵaliji ŵa mu mbumba ja Lefaimu soni ŵatyochelaga ku Gati. Daudi pampepe ni ŵakutumichila ŵakwe ni ŵaŵawuleje jemanjaji.