Yoswa
11 Yabini mwenye jwa msinda wa Hasoli paŵagambile kupikana yeleyi jwalakwe ŵamŵilasile Yobabu mwenye jwa msinda wa Madoni. Ŵamŵilasilesoni mwenye jwa msinda wa Similoni, mwenye jwa msinda wa Akisafu, 2 soni ŵagaŵilasile mamwenye gosope gagatamaga ku dela jamatumbi jakumpoto, mamwenye gagatamaga mu yiŵata* kummwela kwa Nyasa ja Kineleti,* mamwenye gagatamaga mu dela ja Sefela nambosoni gagatamaga mu dela ja yikwesya ja msinda wa Doli chakungapililolyuŵa. 3 Ŵaŵilasilesoni Akanani ŵaŵatamaga kungopokolyuŵa soni kungapililolyuŵa, Aamoli, Ahiti, Apelesi, Ayebusi ŵaŵatamaga ku dela jamatumbi, nambosoni Ahifi ŵaŵatamaga mwiŵanda mwa Litumbi lya Helimoni m’chilambo cha Misipa. 4 Myoyo wosopeŵa ŵayiche ni asilikali ŵawo, wosope pampepe ni mahachi gejinji nambosoni magaleta* ga ngondo. Asilikaliwo ŵaliji ŵajinji mpela mchenga wa mungulugulu nyasa. 5 Mamwenye gosopega gakamulene yakuti gakasimane pamalo gakusimanikwa mesi gejinji chiŵandika ni msinda wa Melomu. Paŵayiche pamaloga, ŵataŵile masakasa gawo kuti ŵataje ngondo Ayisalayeli.
6 Yili yitendekwe yeleyi Yehofa ŵamsalile Yoswa kuti, “Mkatenda woga ligongo lya jemanjajo pakuŵa malaŵi ndaŵi mpela jinojino chinjapeleka wosopewo mmyala mwa Ayisalayeli kuti ŵawulaje. Mahachi gawo mgalemasye mwakugakata mitasi ja mungongolo nambosoni magaleta gawo mgachome moto.” 7 Myoyo Yoswa pampepe ni asilikali ŵakwe wosope ŵatasile ngondo jemanjajo mwakusisimuchisya pa mesi pala mwakuŵandikana ni msinda wa Melomu. 8 Yehofa ŵapeleche jemanjaji mmyala mwa Ayisalayeli. Ayisalayeli ŵatopwesye jemanjajo kwineku ali mkwawulaga mpaka kuja kwika kumsinda wekulungwa wa Sidoni, ku Misilefoti-maimu nambosoni ku Chiŵata cha Misipa chakungopokolyuŵa mwamti ŵagomeche. Wosope ŵene ŵawuleje mwamti pangali atamose mundu jumo juŵakulupwiche. 9 Yoswa ŵatesile jemanjajo mwakamulana ni yaŵamlamwile Yehofa. Jwalakwe ŵagalemalikasisye mahachi gawo, nambosoni magaleta gawo ŵagachomile moto.
10 Kaneko Yoswa ŵawujile ni kuja kusumula msinda wa Hasoli soni ŵamwuleje mwenye jwakwe ni upanga.* Jwalakwe ŵatesile yeleyi ligongo lyakuti pandanda msinda wa Hasoli waliji likulu lya mamwenye gosope gala. 11 Jemajanji ŵamwuleje ni upanga mundu jwalijose juŵatamaga mumsindawu. Ŵapyajisile wosopewo mwamti pangali atamose mundu jumo juŵasigele. Pambesi pakwe ŵawuchomile moto msinda wa Hasoliwo. 12 Myoyo Yoswa ŵajisumwile misinda josope ja mamwenye gala ni kugawulaga mamwenye gosopego ni upanga. Jwalakwe ŵamwulejesoni mundu jwalijose m’misinda jeleji mwakamulana ni yaŵamlamwile Mose jwakutumichila jwa Yehofa. 13 Pamisinda josope jajaliji pamalo gakwela, Yoswa ŵawuchomile moto msinda wa Hasolipe, nambo misinda jine josope Ayisalayeli nganajichoma moto. 14 Yindu yosope yaŵayisimene m’misindaji pampepe ni yilango yakwe, Ayisalayeli ŵayigele yosopeyo kuti yiŵe yawo nambo mundu jwalijose ŵamwuleje ni upanga mwamti ŵapyajisile ŵandu wosope m’misindaji. Pangali mundu atamose jumo juŵamlesile jwaumi. 15 Yindu yosope yele Yehofa ŵamlamwile Mose jwakutumichila jwakwe, yele Mose ŵamlamwilesoni Yoswa, Yoswajo ŵayitesile yosope yeneyo. Pangali chindu atamose chimo chele jwalakwejo nganachitenda payindu yosope yele Yehofa ŵamlamwile Mose.
16 Yoswa ŵasumwile malo gekulungwa. Jwalakwe ŵasumwile dela josope jamatumbi kumbali ja kungopokolyuŵa kwa chilambo cha Yuda. Ŵasumwilesoni chigawo* chosope cha Negebu, chilambo chosope cha Goseni, dela ja Sefala soni dela ja Alaba. Nambosoni jwalakwe ŵasumwile dela josope jamatumbi ja chilambo cha Isalayeli pampepe ni dela jakwe jakutuluka ja Sefela. 17 Jwalakwe ŵasumwilesoni malo gosope kutandila ku Litumbi lya Halaki lyalyayiche mpaka ku Seili, mpaka kuja kwika mumsinda wa Baala-gadi m’Chiŵata cha Lebanoni mwiŵanda mwa Litumbi lya Helimoni. Jwalakwe ŵagakamwile mamwenye gosope ga m’madela gelega ni kugawulaga. 18 Yoswa ŵamenyene ni mamwenye gosopega kwa masiku gejinji. 19 Paliji pangali msinda wine uliwose wawakamulene yamtendele ni Ayisalayeli nambo Ahifipe ŵaŵatamaga ku Gibiyoni. Nambo misinda jine josopejo, Ayisalayeli ŵajigomeche mwakujitaga ngondo. 20 Yehofa ŵakundile kuti ŵandu wosope ŵa m’misinda jeleji ajumusye mitima jawo ni chakulinga chakuti amenyane ni Ayisalayeli. Jwalakwe jwatesile yeleyi pakusaka kuti ŵajonanje ŵandu wosope ŵenewo mwamti paliji pangali ligongo lyakwatendela chanasa. Ŵandu wosopeŵa ŵasosekwaga kuti ŵajonanje mwakamulana ni yele Yehofa ŵamlamwile Mose.
21 Pandaŵijo Yoswa ŵapyajisile ŵandu wosope ŵa mtundu wa Anaki ŵaŵatamaga mu dela jamatumbi kutandila ku Hebuloni, ku Debili, ku Anabu soni mpaka ku madela gosope gamatumbi ga ku Yuda soni ga ku Isalayeli. Yoswa ŵawuleje jemanjaji soni ŵajonasile misinda jawo. 22 Paliji pangali mundu jwa mtundu wa Anaki atamose jumo juŵamlesile m’chilambo cha Isalayeli. Nambo Aanaki ŵaŵatamaga ku Gasa, ku Gati, soni ku Asidodi ni ŵaŵasigele. 23 Myoyo Yoswa jwasumwile chilambo chosope mpela muŵaŵechetele Yehofa kwa Mose. Kaneko Yoswa ŵachipeleche chilambocho kwa Ayisalayeli mpela chipanje chawo. Ŵatesile yeleyi mwakuchigaŵa chilambocho mwakamulana ni mbumba* syawo. Pambesi pakwe, m’chilambomo mwaliji mwangalisoni ngondo.