Masalimo
Kwa jwakulongolela nyimbo. Ajimbe nyimboji pakuya kajimbe ka Yedutuni.* Nyimbo ja Daudi.
62 Nditu, chinjijembecheya mwakuwusimana mtima kuti Mlungu atendepo kandu.
Chikulupusyo changu chikusatyochela kwa jwalakwejo.
2 Jwalakwejo ali lwala lwangu soni chikulupusyo changu, nditu ali malo gangu gambone gakuuŵa.
Une ngasindenganyika mnope.
3 Ana jemanja chimpitilisye kumlagasya mundu kuti mumwulaje mpaka chakachi?
Jemanja wosope mli ŵakogoya mpela lipupa lyalipendeme, lipupa lyamaganga lyalisigele panandi kugwa.*
4 Nditu jemanjajo akusasongana pampepe kuti apangane yakuti amgwisye jwalakwejo, kumtyosya pa udindo wakwe wapenani.*
Jemanjajo akusanonyela kuŵecheta yamabosa.
Akusiŵasosela upile ŵane ni pakamwa pawo, nambo mumtima mwawo ali mkwatembelela. (Selah)
5 Nditu, chinjijembecheya mwakuwusimana mtima kuti Mlungu atendepo kandu
Ligongo lyakuti chembecheyo changu chikusatyochela kwa jwalakwejo.
6 Jwalakwejo ali lwala lwangu soni chikulupusyo changu, nditu ali malo gangu gambone gakuuŵa.
Une ngasindenganyika.
7 Ngusinamdalila Mlungu kuti angulupusye soni kumba uchimbichimbi.
Mlungujo ali lwala lwangu lwakulimbangana soni malo gangu gakuuŵa.
8 Jemanja ŵandu, mumdalileje jwalakwejo ndaŵi syosope.
Mumkusulileje jwalakwejo yamumtima mwenu.
Mlungu ali malo getu gakuuŵa. (Selah)
9 Umi wa ŵanache ŵa ŵandu uli wejipi mpela mpweya wapumwile mundu.
Ŵanache ŵa ŵandu ali ŵangadalilichika.
Kwalinga jemanjajo wosope pasikelo, akusaŵa ŵakupepuka kupunda mpweya.
10 Mkadalilaga yachiswamba kuti msichile
Kapenasoni kudalila wiyi kuti msichile.
Naga msichile mnope, mkaŵikaga mtima wenu pachipanje chenucho.
11 Pakwete panampikene Mlungu ali mkuŵecheta kaŵili kose kuti:
Mlungu ni msyene machili.
12 Chinonyelo chakulupichika chili chawosoni, wawo Yehofa,
Pakuŵa wawojo akusamwuchisya jwalijose mwakamulana ni yitendo yakwe.