Ngani Syambone Syaŵalembile Maliko

6 Yesu paŵatyosile kweleko, ŵapite mu dela jakumangwakwe, soni ŵakulijiganya ŵakwe ŵamkuyiye. 2 Palyakwanile lisiku lya Sabata, jwalakwe jwatandite kwiganya mu sunagoge. Ŵandu ŵajinji ŵaŵampikene ali mkwiganya ŵasimonjile mnope, ni ŵaŵechetaga kuti, “Ana mundu jweleju jwayijigele kwapi yindu yeleyi? Ana jukukombola chamtuli kumanyilila yindu yejinji myiyi? Soni ana ŵani ŵaŵampele machili gakutendela yakusimonjesya yeleyi? 3 Ana jweleju ngaŵa kalipentala jula, mwanache jwa Maliya? Soni ana jweleju ngaŵa mkulugwe jwa Yakobo, Yosefe, Yudasi, soni Simoni? Soni achalumbugwe, ngaŵa ni ŵatuli nawo papapaŵa?” Ligongo lya yeleyi, ŵanduwo ŵalepele kumkulupilila. 4 Nambo Yesu ŵasalile jemanjajo kuti, “Jwakulochesya jwangachimbichika mu dela jakumangwakwe, atamose ni achalongo achimjakwe soni ŵamwiŵasa mwakwe.” 5 Myoyo jwalakwe jwaposisye* ŵandu ŵamnono kweleko pakwasajika makono. Nambo nganatendasoni yakusimonjesya yine. 6 Jwalakwe jwasimonjile mnope ni kusoŵa kwa chikulupi kwa ŵanduwo. Kaneko jwapite kukwajiganya ŵandu m’misi jakusyungulila.

7 Sambano jwalakwe jwaŵilasile ŵakulijiganya ŵakwe 12 ŵala ni kutanda kwatuma ŵaŵiliŵaŵili, soni ŵapele machili gakoposya misimu jakusakala. 8 Ŵalamwile kuti akajigala chilichose paulendowu, kanga yakulya, mwakusunjila yakulya, soni atamose mbiya m’yikwama yawo. Nambo ŵalamwile kuti ajigale ndodo, 9 awale sapato nambo ŵasalile kuti akajigala chakuwala chine.* 10 Ŵasalilesoni kuti, “Pamyiche panyumba ja mundu ni msyenejo akumpochela chenene, mtameje papopo mpaka pandaŵi jakutyoka mu delajo. 11 Kwele jwalijose ngakumpochela kapena kumpikanila, pamkutyoka kweleko, mkung’undeje luwundu kusajo kwenu kuti uŵe umboni kwa jemanjajo.” 12 Kaneko jemanjajo ŵanyakwiche kuja kukulalichila kwa ŵandu kuti agalawuche mtima. 13 Kweleko ŵakopwesyesoni yiŵanda yejinji soni ŵapakesye mawuta ŵandu ŵajinji ŵakulwala ni kwaposya.

14 Sambano Mwenye Helodi ŵapikene yosopeyi, pakuŵa ŵandu ŵajinji ŵamanyilile ya Yesu, mwamti ŵaŵechetaga kuti, “Jweleju ali Yohane M’batisi. Jwalakwe ajimwiche ku chiwa, ni ligongo lyakwe akukombola kutenda masengo gamachili.” 15 Nambo ŵane ŵaŵechetaga kuti, “Jweleju ali Eliya.” Ŵanesoni ŵaŵechetaga kuti, “Jweleju ali jwakulochesya mpelaga ŵakulochesya ŵa munyumamu.” 16 Nambo Helodi paŵapikene yeleyi ŵatite, “Jweleju ali Yohane junamkatile mtwe jula, ajimwiche ku chiwa.” 17 Pakuŵa pandandapo Helodi ŵatumisye ŵandu kuti akamtaŵe Yohane ni kumponya mu ndende pangani jakuti Helodijo ŵamlombile Helodiya, juŵaliji ŵamkwakwe Filipo. Filipojo ŵaliji mkulugwe Helodi. 18 Myoyo Yohane ŵaliji mkumsalila Helodi kuti, “Nganiyiŵa yakuŵajilwa kuti mwajigale ŵakongwe ŵa akuluŵenu kuti aŵe ŵamkwenu.” 19 Yeleyi yamsakalisyaga Helodiya mwamti ŵayisungaga mumtima, soni ŵasakaga kumwulaga Yohane nambo ŵalepelaga. 20 Nambo Helodi ŵamchimbichisyaga Yohane ligongo ŵamanyililaga kuti jwalakwejo ali mundu jwakulungama soni jwakulipeleka kwa Mlungu, myoyo ŵaliji mkumchenjela. Helodi jwasangalalaga papikene yakuŵecheta ya Yohane mwamti pambesi pakwe jwasoŵaga chakumtenda Yohanejo.

21 Nambo lisiku lyakuti Helodiya atende yaŵasakaga yila lyakwanile. Lisiku lyakwe lyaliji lyakusangalalila kupagwa kwa Helodi. Palisikuli Helodi jwalinganyisye chakulya chaligulo ni kuŵilanga nduna syakwe, achakulungwakulungwa ŵa asilikali soni ŵandu ŵakuchimbichikwa mnope ŵa mu Galileya. 22 Mwanache jwamkongwe jwa Helodiya jwaŵinile palisikulyo mwamti yamsangalesye mnope Helodi nambosoni ŵandu ŵaŵaliji mkulya najo. Pelepo mwenyewo ŵamsalile msikanajo kuti, “Mŵende chilichose chamkusaka soni chinampe.” 23 Mwenyewo ŵayikene pakulumbila mwakuŵecheta kuti, “Chilichose champaka mŵende chinampe, atamose mli mtite kuti tugaŵane umwenye wangu.” 24 Myoyo msikanajo ŵakopweche ni kuja kwawusya mamagwe kuti, “Ana ngaŵende chichi?” Mamagwewo ŵamjanjile kuti, “Mkaŵende mtwe wa Yohane M’batisi.” 25 Ndaŵi jijojo msikanajo jwapite kwa mwenye kula ni kwasalila kuti, “Ngusaka ambe panopano mtwe wa Yohane M’batisi mu mbale.” 26 Atamose kuti yeleyi yapweteche mumtima mwenyewo, nambo nganasakaga kukana yaŵaŵendile msikanajo ligongo ŵaliji ali alumbile kala soni ŵajogopaga achalendo ŵala. 27 Myoyo mwenyewo ŵamtumisye msilikali kuti akamkate Yohane mtwe ni kwika nawo. Pelepo msilikalijo jwapite ni kuja kumkata Yohanejo mtwe mu nyumba ja ukayidi 28 ni kwika nawo mu mbale. Kaneko ŵampele msikanajo, soni msikanajo ŵapite kukwapa mamagwe. 29 Ŵakulijiganya ŵa Yohane paŵapikene yeleyi, ŵayiche kukujigala chilu chakwe ni kuja kuchisika m’malembe.

30 Sambano ŵandumetume ŵala ŵasongangene kwa Yesu ni kutanda kumsalila yindu yosope yaŵaliji mkutenda soni kwiganya. 31 Pelepo Yesu ŵasalile kuti, “Kwende tukatame kwajika kuti jemanja mkapumule panandi.” Ŵasalile yeleyi ligongo lyakuti ŵandu ŵajinji ŵayikaga ni kwawulaga mwamti jemanjajo nganakola ndaŵi jakuti apumule ni kulya. 32 Myoyo jemanjajo ŵakwesile liboti ni kwawula ku lisi line lya nyasa kuti akatame kwajika. 33 Nambo ŵandu ŵane ŵaweni jemanjajo ali mkwawula mwamti ŵajinji ŵayimanyi yeleyi. Myoyo ŵandu ŵakutyochela m’misinda josope ŵawutwiche wapasi ni kuja kwika jemanjajo mkanayiche. 34 Paŵagambile kutuluka mwibotimo, Yesu ŵajiweni gulu jekulungwa ja ŵandu, mwamti ŵatendele chanasa mnope, ligongo ŵanduwo ŵaliji mpela ngondolo syangali m’busa.* Myoyo jwalakwe ŵatandite kwajiganya yindu yejinji.

35 Sambano chakwigulo, ŵakulijiganya ŵakwe ŵayiche ni kumsalila kuti, “Akunotu kuli kwakutalikangana ni misi soni kusaku kuswele. 36 Myoyo ŵatumisye ŵanduŵa kumadela gakusyungulila soni kumisi kuti akalisumile yakulya.” 37 Jwalakwe ŵajanjile kuti, “Jemanja ni ŵamkusosekwa kwapa yakulya.” Pelepo ŵakulijiganya ŵakwewo ŵatite, “Ana akuganisya kuti mpaka tukombole kwasumila ŵanduŵa mikate* ja mbiya syakwana 200 sya dinali ni kwapa kuti alye?” 38 Jwalakwe jwatite, “Ana mkwete mikate jilingwa? Mjawule mkalole!” Paŵapite kukulola, jemanjajo ŵatite, “Tukwete mikate msano ni somba siŵili.” 39 Pelepo jwalakwe jwasalile ŵanduwo kuti atame m’magulu pa manyasi. 40 Myoyo ŵatemi m’magulu ga ŵandu 100 ni ga ŵandu 50. 41 Sambano jwalakwe ŵajigele mikate msano ni somba siŵilisyo, kaneko ŵalolite kwinani ni kupopela. Pambesi pakwe ŵajigaŵenyegaŵenye mikatejo ni kutanda kwapa ŵakulijiganya ŵakwe kuti ŵapeje ŵanduwo. Ŵagaŵenyesoni somba siŵili sila ni kwanila ŵandu wosopewo. 42 Pelepo wosopewo ŵalile mpaka kwikuta, 43 mwamti ŵalokotele yakusigala ni yagumbele yitundu 12, ngaŵalanjila somba sila. 44 Pa ŵandu ŵaŵalile mikatejo papali achalume ŵakwana 5,000.

45 Ndaŵi jijojo, ŵasalile ŵakulijiganya ŵakwe kuti akwele liboti ni kulongolela ku lisi line lya nyasa ku Betisaida. Kaneko ŵajisalile gulu ja ŵandujo kuti jijawuleje. 46 Pambesi pakwalanga ŵanduwo, jwalakwe ŵakwesile mwitumbi kukupopela. 47 Pakwaswaga, liboti lila lyaliji lili pasikati pa nyasa, nambo Yesu ŵaliji jika pamkuli. 48 Myoyo jwalakwe ŵaweni jemanjajo ali mkulaga kupalasa liboti ligongo mbungo jaliji mkulimbana ni jemanjajo. Sambano chakumasikusiku,* Yesu ŵaliji mkwenda panyasa ali mkwika kwa jemanjajo nambo yawonekaga mpela akusaka kwapita. 49 Ŵakulijiganya ŵakwe paŵam’weni ali mkwenda panyasapo, ŵagumisile kuti, “Syelesi sili sagamisi nditu!” 50 Ŵagumisile myoyo ligongo wosopewo paŵam’weni ŵatesile woga. Ndaŵi jijojo Yesu ŵasalile jemanjajo kuti, “Mkatenda woga! Ndili une.” 51 Kaneko paŵakwesile mwiboti, mbungo jila jalesile. Pelepo jemanjajo ŵasimonjile mnope. 52 Pakuŵa jemanjaji ŵaliji mkanapikanichisyepe chakusimonjesya cha mikate chila, yeleyisoni nganayipikanichisya m’mitima jawo.

53 Paŵajombweche nyasajo, ŵakopochele ku Genesaleti ni ŵajimiche libotilyo chapakuŵandika. 54 Nambo paŵagambile kutuluka mwibotimo, ŵandu ŵam’weni Yesu ni ŵammanyilile. 55 Myoyo ŵanduwo ŵawutwiche kuja kwasalila ŵane mu chigawo* chosopecho, mwamti ŵatandite kwawula kuŵaliji jwalakwejo ali ŵajigele ŵakulwala pamachila.* 56 Jwalakwe pajinjile m’musi kapena mumsinda uliwose, ŵandu ŵaŵikaga ŵakulwala m’misika. Jemanjajo ŵamŵendaga Yesu kuti agambe kukamula ulusi wa mumbesi mwa mkanjo wakwe. Wosope ŵaŵakamwile ulusiwo ŵaŵele chenene.