Buku Jaŵili ja Ayimwene
11 Sambano Ataliya juŵaliji mamagwe Ahasiya paŵayiweni kuti mwanache jwakwe juwile ŵanyakwiche ni kutanda kwawulaga ŵandu wosope ŵaŵasosekwaga kwinjila umwenye. 2 Nambo Yehoseba mwanache jwamkongwe jwa Mwenye Yeholamu juŵaliji mchemwaligwe Ahasiya, ŵamjigele Yehowasi mwanache jwa Ahasiya ni kumsisa. Ŵamjiŵile mwanachejo pasikati pa ŵanache ŵa mwenye ŵaŵaliji ŵakuti awulajidwe. Ŵamsunjile mwanacheju m’chipinda chamkati yimpepe ni jwamkongwe jwakumsamalila. Jemanjaji ŵakombwele kumsisa mwanachejo ni chakulinga chakuti Ataliya akamwona ni kumwulaga. 3 Mwanachejo ŵamsisile ku nyumba ja Yehofa kwa yaka yakwana 6. Pandaŵiji Ataliya ŵaliji ali mkulamulila m’chilambomo.
4 Mu chaka cha 7, Yehoyada ŵaŵilasile achimlongola ŵa magulu ga asilikali 100 ŵakumlondela mwenye, soni achimlongola ŵa magulu ga asilikali 100 ŵakulondela nyumba ja mwenye, mwamti jemanjaji ŵayiche ku nyumba ja Yehofa. Jwalakwe ŵatesile chilanga ni jemanjaji ku nyumba ja Yehofajo soni ŵasalile kuti alumbile kuti chasunje chilangacho. Pambesi pakwe ŵalosisye jemanjajo mwanache jwa mwenye jula. 5 Jwalakwe ŵalamwile jemanjajo kuti, “Mkusosekwa kutenda ayi: Mkusosekwa mligaŵanye m’magulu gatatu. Gulu jimpepe chijiyiche kukamula masengo gawo pa lisiku lya Sabata, soni gulu jeleji jichisosekwa kujilolela nyumba ja mwenye mwakusamala mnope. 6 Gulu jine jichiŵa pa Geti ja Fendeshoni, soni jine jichiŵa pa geti jajili kunyuma kwa asilikali ŵakulondela nyumba ja mwenye. Jemanja chimtendeje mwakuchenganachengana pamasengo gakulondela nyumba ja mwenyejo. 7 Magulu genu gaŵili gele nganigakamula masengo pa lisiku lya Sabata, gachisosekwa kujilolela mwakusamala nyumba ja Yehofa kuti amchenjele mwenye. 8 Chimchisosekwa kumsyungulila mwenyejo mbali syosope soni jwalijose ali ajigele yida yakwe yakuputila ngondo mmyala mwakwe. Jwalijose jwakusaka kupita pasikati penu mkusosekwa kumwulaga. Soni mkusosekwa kuŵa ni mwenyejo kulikose kwakwawula.”
9 Achimlongola ŵa magulu ga asilikali ŵakwana 100 ŵala, ŵatesile yosope yaŵalamwile Yehoyada juŵaliji jwakutaga mbopesi. Mlongola jwalijose jwajigele asilikali ŵakwe ŵaŵasosekwaga kukamula masengo pa lisiku lya Sabata pampepe ni asilikali ŵele ŵasosekwaga kupumula pa lisiku lya Sabata ni kwawula nawo kwa jwakutaga mbopesi Yehoyada. 10 Jwakutaga mbopesijo ŵapele achimlongola ŵa magulu ga asilikali 100 ŵala mapanga soni yakuchijila yakusyungulila yayaliji ya Mwenye Daudi. Yida yeleyi yaliji mu nyumba ja Yehofa. 11 Asilikali ŵakulondela nyumba ja mwenye ŵala ŵajimi m’malo mwawo, jwalijose ali ajigele yida yakwe yakuputila ngondo mmyala mwakwe. Jemanjaji ŵajimi kutandila mbali josope jakumlyo ja nyumbajo mpaka mbali jakumchiji ja nyumbajo. Ŵajimi chiŵandika malo gakupelechela mbopesi soni chiŵandika nyumbajo. Jemanjaji ŵamsyungulile mwenyejo ku mbali syosope. 12 Kaneko Yehoyada ŵamkopwesye pasa mwanache jwa mwenye jula ni kum’wecha chisoti cha umwenye soni Umboni,* mwamti ŵamŵisile jwalakwe kuŵa mwenye soni ŵamtasile mawuta gakumtaga mundu pakumsagula. Kaneko jemanjajo ŵatandite kukwatila mmyala ni kuŵechetaga kuti. “Akole umi waulewu mwenye!”
13 Ataliya paŵapikene masegwe ga ŵandu ali mkuwutuka, ndaŵi jijojo ŵayiche ku nyumba ja Yehofa kuŵaliji ŵanduwo. 14 Kaneko jwalakwe ŵaweni mwenye ali ajimi chiŵandika ni chipilala mpela muyaŵelaga ndaŵi syosope. Achimlongola ŵa asilikali ŵala soni achalume ŵakwimba malipenga ŵaliji yimpepe ni mwenyewo. Konjechesya pelepa, ŵandu wosope ŵa m’chilambomo ŵaliji mkusangalala kwineku ali mkwimba malipenga. Ataliya paŵayiweni yeleyi, ŵapapwile yakuwala yakwe ni kutanda kugumila kuti, “Anjimuchile! Anjimuchile une!” 15 Nambo Yehoyada juŵaliji jwakutaga mbopesi ŵalamwile achimlongola ŵa magulu ga asilikali 100 ŵala ŵele ŵasagwile kuti ŵaloleleje asilikaliwo, ŵalamwile jemanjaji kuti, “Amtyosye jweleju pasikati pa asilikali, soni naga pasimanikwe jwine jwakumkuya jwalakwe amwulaje mundu jwelejo ni upanga.”* Jwakutaga mbopesijo ŵaliji ali ŵasalile jemanjaji kuti, “Mkamwulajila jwalakwejo m’nyumba ja Yehofa.” 16 Myoyo jemanjajo ŵamkamwile jwalakwejo mwamti paŵayiche pamlango wakwinjilila mahachi ku nyumba ja mwenye, jwalakwejo ŵamwulajile pelepo.
17 Kaneko Yehoyada ŵatesile chilanga pasikati pa Yehofa ni mwenye nambosoni ŵanduwo. Chilanga chakwe chaliji chakuti jemanjajo chapitilisye kuŵa ŵandu ŵa Yehofa. Jwalakwe jwatesilesoni chilanga chine cha pasikati pa mwenye ni ŵanduwo. 18 Panyuma pa yeleyi, ŵandu wosope ŵa m’chilambomo ŵapite ku nyumba ja Baala ni kuja kugwisya malo gosope gakupelechela mbopesi kwa Baalajo, mwamti ŵakasenyekasyenye yiwanichisyo yosope ya Baalajo soni ŵamwuleje Mateni juŵaliji jwakutaga mbopesi jwa Baala. Ŵamwulajile jwalakweju pasogolo pa malo gakupelechela mbopesi.
Kaneko jwakutaga mbopesiju jwasagwile ŵandu kuti aŵe ŵakulolela pa nyumba ja Yehofa. 19 Nambosoni jwalakwe jwajigele achimlongola ŵa magulu ga asilikali 100, asilikali ŵakulondela mwenye, asilikali ŵakulondela nyumba ja mwenye soni ŵandu wosope ŵa m’chilambomo kuti ampechesye mwenye kutyoka ku nyumba ja Yehofa kwawula ku nyumba ja mwenye. Paulendowu jemanjaji ŵapitile ku mlango waŵatamaga asilikali ŵakulondela nyumba ja mwenye. Kaneko mwenyewo ŵatemi pampando waumwenye wagakusatama mamwenye. 20 Myoyo ŵandu wosope ŵa m’chilambomo ŵasangalele, soni mumsindamo mwatesile bata. Yaliji myoyo ligongo lyakuti Ataliya ŵawulajidwe ni upanga ku nyumba ja mwenye.
21 Yehowasi jwaŵele mwenye ali ni yaka yakwana 7.