Buku Jaŵili ja Ayimwene
12 Mu chaka cha 7 cha Yehu, Yehowasi jwaŵele mwenye, soni jwalakwe jwalamulile kwa yaka 40 ku Yelusalemu. Lina lya mamagwe lyaliji Sibiya. Mamagweŵa ŵaliji ŵa ku Beele-seba. 2 Yehowasi jwapitilisye kutenda yindu yambone pameso pa Yehofa m’masiku gosope gele jwakutaga mbopesi Yehoyada ŵaliji mkumkamuchisya lunda jwalakwe. 3 Nambo nganatyosya malo gakwela mwamti ŵandu ŵapitilisye kupeleka mbopesi syakukoposya lyosi m’malo gakwelago.
4 Yehowasi ŵasalile ŵakutaga mbopesi kuti, “Ajigale mbiya syosope syasikusayika ku nyumba ja Yehofa mpela yakupeleka yapadela. Syelesi sili mbiya sya msongo syele mundu jwalijose akusasosekwa kupeleka, mbiya syele mundu jwalijose ŵasasile kuti chapelecheje soni mbiya syosope syele mundu asimichisye mumtima mwakwe kwika nasyo ku nyumba ja Yehofa. 5 Ŵakutaga mbopesi ajigaleje mbiyasi kutyochela kwa ŵandu ŵakusapeleka ni kusikamulichisyaga masengo pakulinganya nyumba ja Mlungu pamalo galigose gagajonasiche.”*
6 Nambo pakwikanaga chaka cha 23 cha Mwenye Yehowasi, ŵakutaga mbopesi ŵaliji mkanaŵe kulinganya nyumbaji. 7 Myoyo Mwenye Yehowasi ŵamŵilasile jwakutanga mbopesi Yehoyada soni ŵakutaga mbopesi ŵane ni kwawusya kuti, “Ligongo chichi jemanja ngakulinganya nyumba ja Mlungu? Paligongo lyeleli jemanja ngamkusosekwasoni kujigala mbiya kwa ŵandu ŵakusapeleka, chimchijigala naga mkusaka kusikamulichisya masengo pakulinganya nyumba ja Mlungu.” 8 Pelepo ŵakutaga mbopesiwo ŵajitichisye kuti ngajigalasoni mbiya kutyochela kwa ŵandu, soni kuti udindo ŵakulinganya nyumbajo ngawuŵasoni mmyala mwawo.
9 Sambano jwakutaga mbopesi Yehoyada ŵajigele libokosi ni kulipowola pachiwuniko chakwe. Kaneko jwalakwe ŵaliŵisile libokosilyo pambali pa malo gakupelechela mbopesi chakumlyo, mundu pakwinjila m’nyumba ja Yehofajo. Ŵakutaga mbopesi ŵaŵakamulaga masengo gakulondela pa mlango wa nyumbaji ŵaŵikaga mwelemo mbiya syasiyiche ku nyumba ja Yehofajo. 10 Jemanjaji payiweni kuti m’libokosimo mwana mbiya syejinji, mlembi jwa mwenye soni jwamkulungwa jwa ŵakutaga mbopesi ŵayikaga ni kujigala mbiyasi.* Kaneko jemanjaji ŵasiŵalangaga mbiya syasiyiche ku nyumba ja Yehofasyo. 11 Jemanjaji ŵajigalaga mbiya syaŵalasilesyo ni kusipeleka kwa ŵandu ŵaŵalolelaga masengo gakulinganya nyumba ja Yehofa. Nombenawo ŵakulolelaŵa ŵajigalaga mbiyasi ni kwalipila ŵandu ŵakupala matabwa soni ŵakukamula masengo gakutaŵa pa nyumba ja Yahofajo. 12 Ŵalipilagasoni ŵandu ŵakutaŵa ni maganga soni ŵandu ŵakukasa maganga. Jemanjaji ŵasumilesoni matabwa soni maganga gakusepa kuti akamulichisye masengo pakulinganya nyumba ja Yehofa, soni ŵakamulichisye masengo mbiyasi pakusuma yindu yosope yakusosekwa pamasengo gakulinganya nyumbaji.
13 Nambope pa mbiya syasyayiche ku nyumba ja Yehofa pangali syasyakamwile masengo pakupanganyichisya mabeseni gasilifa, yakusimichisya nyali, mbale syamsimbo, malipenga, kapena chindu chine chilichose chagolide kapena chasilifa cha panyumba ja Yehofa. 14 Jemanjaji ŵapelekaga mbiyasi kwa ŵandu ŵaŵakamulaga masengo mwamti mbiyasi syakamwile masengo pakulinganya nyumba ja Yehofa. 15 Ŵandu ŵaŵapochelaga mbiyasi kuti ŵapeje ŵandu ŵaŵakamulaga masengogo nganiŵawusyaga kuti asale mwasikamulile masengo mbiyasyo ligongo lyakuti jemanjaji ŵaliji ŵandu ŵakulupichika. 16 Nambope mbiya sya mbopesi jamagambo soni mbiya sya mbopesi jaulemwa nganisijawulaga ku nyumba ja Yehofa. Mbiya syelesi syaŵaga sya ŵakutaga mbopesi.
17 Pandaŵi jeleji Hasaele mwenye jwa ku Siliya ŵapite kuja kumenyana ni msinda wa Gati, mwamti ŵawugomeche. Panyuma pakwe jwalakwe ŵaganisisye yakuja kuwujimuchila msinda wa Yelusalemu. 18 Pelepo Mwenye Yehowasi jwa ku Yuda ŵajigele yakupeleka yosope yapadela yele achinangolo ŵakwe ŵayiswejesye. Achinangolo ŵakweŵa ŵaliji Yehosafati, Yeholamu, soni Ahasiya ŵaŵaliji mamwenye ga ku Yuda. Jwalakwe ŵajigelesoni yakupeleka yakwe yapadela soni golide josope jujwasimanikwe mu yakusunjila chipanje ya m’nyumba ja Yehofa soni ya m’nyumba ja mwenye ni kuyipeleka kwa Hasaele mwenye jwa ku Siliya. Paŵatesile yeleyi Hasaele ŵalesile kuwujimuchila msinda wa Yelusalemu.
19 Mbili jine ja Yehowasi soni yosope yaŵatesile, yalembedwe m’buku ja mbili ja mundaŵi ja achayimwene ŵa ku Yuda. 20 Nambope ŵakutumichila ŵakwe ŵakamulene yakuti amjimuchile jwalakwe, mwamti ŵamwuleje Yehowasijo panyumba ja ku Liwunjili,* palitala lyakwawula ku Sila. 21 Ŵakutumichila ŵakweŵa ŵaliji Yosakala mwanache jwa Simeyati, soni Yehosabadu mwanache jwa Someli. Jemanjaji ni ŵaŵamwuleje jwalakwe. Jwalakwe ŵamsichile m’malembe mu Msinda wa Daudi mpela muyaŵelele ni achinangolo ŵakwe. Kaneko mwanache jwakwe lina lyakwe Amasiya jwaŵele mwenye mmalo mwa jwalakwe.