Detulonomo

5 Kaneko Mose ŵaŵilasile Ayisalayeli wosope ni kwasalila kuti, “Jemanja Ayisalayeli, mpikane malamusi soni yaŵalamwile Mlungu yangusaka kumsalila jemanja lelo. Mkusosekwa kulijiganya yeleyi ni kuyikuyaga mwakusamala. 2 Yehofa Mlungu jwetu ŵatesile chilanga ni m’weji ku Holebe. 3 Ngaŵa kuti Yehofa ŵatesile chilangachi ni achinangolo ŵetu, nambo ŵatesile ni m’weji wosope ŵatuli ni umi mpaka lelojino. 4 Yehofa ŵaŵechete ni jemanja pameso ni pameso kutyochela m’moto mulitumbi mula. 5 Pandaŵi jelejo une najimi pasikati pa Yehofa ni jemanja ni kumsalilaga maloŵe ga Yehofa. Yaliji myoyo ligongo lyakuti jemanja mwawujogopaga moto mwamti nganimkwela mwitumbi. Jwalakwe ŵaŵechete kuti:

6 “‘Une ndili Yehofa Mlungu jwenu junamkopwesye jemanja m’chilambo cha Iguputo, kumtyosya m’nyumba ja ukapolo. 7 Mkalinga ata panandi kukola milungu jine akaŵe unepe basi.*

8 “‘Mkalipanganyichisya chiwanichisyo chakusepa kapena kupanganya chindu chakulandana ni chilichose chachili kwinani kapena pachilambo chapasi kapenasoni m’mesi ga pachilambo chapasi. 9 Ngamkusosekwa kuyitindiŵalila yeleyo soni mkakunda kuti jwine amtendekasye kuti myitumichileje, pakuŵa une, Yehofa Mlungu jwenu, ndili Mlungu jwangusasaka kuti mundu andumichileje une jika ni mtima wosope. Une ngusakunda kuti ŵanache, yisukulu, soni ŵanache ŵa yisukuluyo asimane ni yakusawusya yakwika ligongo lya ulemwa wa achinangolo ŵakusaŵengana ni une. 10 Nambo ngusalosya chinonyelo changamala ku mibado* masausande gejinji ga ŵandu ŵakusanonyela une soni kusunga malamusi gangu.

11 “‘Mkakamulichisyaga masengo lina lya Yehofa Mlungu jwenu mwangaŵajilwa, pakuŵa Yehofa ngasamlechelela ngampa chilango* mundu jwalijose jwakukamulichisya masengo lina lyakwe mwangaŵajilwa.

12 “‘Msunjeje lisiku lya Sabata soni mliwoneje kuŵa lyakusosekwa, mpela yaŵatite Yehofa Mlungu jwenu pakumlamula jemanja. 13 Mkamuleje masengo genu gosope kwa masiku 6. 14 Nambo lisiku lya 7 lili lisiku lya Sabata ja Yehofa Mlungu jwenu. Ngamkusosekwa kukamula masengo gane galigose palisikuli, kanga jemanja kapena mwanache jwenu jwamlume kapenasoni mwanache jwenu jwamkongwe, kanga kapolo jwenu jwamlume kapena kapolo jwenu jwamkongwe, chinga ng’ombe jenu jamkambako kapena bulu jwenu kapena chilango chenu chilichose, kapenasoni mlendo jwamkutama najo m’misinda jenu.* Mtendeje yeleyi ni chakulinga chakuti kapolo jwenu jwamlume soni kapolo jwenu jwamkongwe apumuleje mpela mwachimtendeleje jemanja. 15 Mkumbuchileje kuti jemanja mwaliji achikapolo m’chilambo cha Iguputo, soni kuti Yehofa Mlungu jwenu ŵamkopwesye jemanja kweleko ni machili gakwe soni mkono wakwe wetambasukule. Ni ligongo lyakwe Yehofa Mlungu jwenu ŵamlamwile jemanja kuti msunjeje lisiku lya Sabata.

16 “‘Mwachimbichisyeje baba ni mama ŵenu, mpela yaŵatite Yehofa Mlungu jwenu pakumlamula jemanja. Mtendeje yeleyi ni chakulinga chakuti mtame ni umi kwa ndaŵi jelewu soni kuti yindu yikamjendeleje chenene m’chilambo chakumpa jemanja Yehofa Mlungu.

17 “‘Mkawulaga mundu.

18 “‘Mkatenda chikululu.

19 “‘Mkajiŵa.

20 “‘Mkapeleka umboni waunami pakwamba ya mjenu.

21 “‘Mkakumbilaga ŵakongwe ŵa ajenu. Mkakumbila mwakulemwecheka nyumba ja mjenu kapena kukumbila mgunda wakwe, kapolo jwakwe jwamlume, kapolo jwakwe jwamkongwe, ng’ombe jakwe jamkambako, bulu jwakwe kapena chilichose chakwete mjenu.’

22 “Yehofa ŵasasile malamusi gelega kwa jemanja wosope ŵamwasongene palitumbi. Jwalakwe ŵasalaga malamusi gelega mwakwesya maloŵe kutyochela m’moto soni muliwunde lyepiliwu mnope soni pangali chilichose chaŵajonjechesye pa malamusi gelega. Kaneko jwalakwe ŵagalembile malamusi gelega pa maganga gaŵili gakusepa ni kumba une.

23 “Nambo jemanja pamwagambile kupikana maloŵe kutyochela muliwunde lyepiliwu, litumbi lili mkukolela moto, ŵakulongolela mbumba syenu wosope soni achakulungwakulungwa ŵenu ŵayiche kwa une. 24 Kaneko jemanjajo ŵasalile une kuti, ‘Sambano Yehofa Mlungu jwetu atulosisye uchimbichimbi wakwe soni ukulu wakwe, soni tupikene maloŵe gakwe kutyochela m’moto. Lelo tuyiweni kuti Mlungu mpaka aŵechetane ni mundu nambo mundujo ni ngawa. 25 Nambope m’weji tukogopa kuti mpaka tuwe ligongo moto wekulungwa welewu mpaka ututinisye m’weji. Naga tukupitilisya kupikana maloŵe ga Yehofa Mlungu jwetu, ngatukukayichila kuti chituwe basi. 26 Ana pana mundu jwele juŵampikene Mlungu ali mkuŵecheta kutyochela m’moto, mundujo ni kupitilisya kuŵa ni umi mpela mwayiŵelele ni m’weji? 27 Mmwejo ni ŵamkusosekwa kumŵandichilaga Yehofa Mlungu jwetu ni kupikanaga yosope yakuŵecheta. Kaneko mmwejo ni ŵachimtusalileje m’weji yosope yene yele Yehofa Mlungu jwetu aŵechete kwa mmwejo, mwamti m’weji tuchipikanila ni kutenda yeleyo.’

28 “Pelepo Yehofa ŵapikene maloŵe gamwaŵechete kwa unega, ni Yehofajo ŵasalile une kuti, ‘Une mbikene maloŵe gosope gaŵechete ŵandu ŵeleŵa kwa mmwejo. Yosope yene yaŵecheteyo yili chenene. 29 Naga jemanjajo chachipitilisya kola mtima wakunjogopa une soni kupitilisya kusunga malamusi gangu gosope, pelepo jemanjajo soni ŵanache ŵawo wosope yindu yichajendelaga chenene mpaka kalakala. 30 Mjawule mkasalile jemanjajo kuti, “Mwujile ku matenti genu.” 31 Nambo mmwejo chimtame ni une panopano kuti namsalile malamusi gosope soni yangumlamula kuti mkajiganyeje jemanjajo kuti akayisunjeje m’chilambo changwapa kuti chikaŵe chipanje chawo.’ 32 Sambano jemanja mkusosekwa kulolechesya kuti mkutenda mwakamulana ni yatite Yehofa Mlungu jwenu pakumlamula. Ngamkusosekwa kugalawuchila kumlyo kapena kumchiji. 33 Mjendeje m’matala gosope gele Yehofa Mlungu jwenu amlamwile jemanja ni chakulinga chakuti yindu yimjendele chenene soni mkatame kwandaŵi jelewu m’chilambo chamkwawula kukujigala kuti chikaŵe chipanje chenucho.