Numeli
9 Yehofa ŵaŵechete ni Mose m’chipululu cha Sinai m’mwesi wandanda, m’chaka chaŵili panyuma pakuti Ayisalayeli akopweche m’chilambo cha Iguputo. Jwalakwe ŵatite, 2 “Ayisalayeli alinganyeje mbopesi ja Pasika pandaŵi jakwe jakuŵajilwa. 3 Pa lisiku lya 14 lya mwesi awuno lyuŵa paligambile kukapila kwene, mlinganyeje mbopesi ja Pasika pandaŵi jakwe jakuŵajilwa. Mlinganyeje mbopesijo mwakamulana ni malamusi gosope soni yosope yamkusosekwa kukuya yakwayana ni Pasika.”
4 Myoyo Mose ŵasalile Ayisalayeli kuti alinganye mbopesi ja Pasika. 5 Pelepo Ayisalayeliwo ŵalinganyisye mbopesi ja Pasika m’chipululu cha Sinai, m’mwesi wandanda pa lisiku lya 14 lya mwesiwo lyuŵa palyagambile kukapila kwene. Myoyo Ayisalayeliwo ŵatesile yosope yaŵalamwile Yehofa kupitila mwa Mose.
6 Sambano papali achalume ŵane ŵaŵaŵele ŵangaswejela ligongo lyakuti ŵakwayiye mtembo wa mundu. Paligongo lyeleli, jemanjaji ŵalepele kulinganya mbopesi jawo ja Pasika palisiku lyeleli. Myoyo jemanjaji ŵayiche pameso pa Mose ni Aloni palisiku lyeleli, 7 ni ŵamsalile Mose kuti, “M’weji tuli ŵangaswejela ligongo lyakuti tukwayiye mtembo wa mundu. Nambo tukusakape tuli tuwuleje nawo nyama jetu jambopesi pameso pa Yehofa pandaŵi jakwe jakuŵajilwa pampepe ni Ayisalayeli wosope. Ana tutende uli pelepa?” 8 Pelepo Mose ŵajanjile jemanjajo kuti, “Munjembecheye papapa, ngusaka ngapikane kaje yachalamule Yehofa yakwamba jemanja.”
9 Kaneko Yehofa ŵamsalile Mose kuti, 10 “Mwasalile Ayisalayeli kuti, ‘Mundu jwalijose pasikati penu nambosoni mundu jwalijose m’mibado* jenu ja msogolo jwaŵele jwangaswejela ligongo lyakuti akwayiye mtembo, mundu jwelejo akusosekwape kulinganya mbopesi jakwe ja Pasika ni kwika najo pameso pa Yehofa. Nombenajo mundu jwapite kwakutalika atendejesoni yeleyi. 11 Ŵandu ŵelewo alinganyeje mbopesi jawo m’mwesi waŵili palisiku lya 14 lyuŵa paligambile kukapila kwene. Palisiku lyeleli, jemanjaji alyeje nyama ja mwanache jwa ngondolo pampepe ni mikate* jangali yakusasaŵisya soni masamba gakuŵaŵa. 12 Alyeje nyama josope jenejo soni akasigasyaga jine mpaka kundaŵi. Pakulya nyamajo akakasanya liwupa lyakwe lililyose. Nyamajo ajilinganyeje mwakamulana ni malamusi gosope gakwayana ni Pasika. 13 Nambo naga mundu jwali jwamswela kapena mundu jwanganajenda ulendo kwawula kwakutalika, mwamele alepele kulinganya mbopesi ja Pasika, mundu jwelejo mkusosekwa kumwulaga kuti akasimanikwasoni pasikati pa ŵandu ŵakwe. Mtendeje yeleyi ligongo lyakuti jwalakwejo alepele kwika ni mbopesi jakwe pameso pa Yehofa pandaŵi jakwe jakuŵajilwa. Mundu jwelejo apocheleje chilango* ligongo lyakulemwa kwakweko.
14 “‘Naga mundu jwamtundu wine akutama pasikati penu, jwalakwejosoni alinganyeje mbopesi jakwe ja Pasika ni kwika najo pameso pa Yehofa. Mundu jwelejo akusosekwa kukuya malamusi gosope soni yosope yamkusasosekwa kukuya yakwayana ni Pasika. Mkusosekwa kukuya malamusi gakulandana, chinga jemanja kapena ŵandu ŵamitundu jine ŵakutama pasikati penu.’”
15 Palisiku lyaŵamalisisye kuchikunga chitenti cha Mlungu, chachilisoni chitenti cha Umboni, liwunde lyajimi penani pa chitenticho. Chilo liwundelyo lyaŵalaga mpela moto penani pa chitenticho mpaka kundaŵi. 16 Yeleyi ni yayatendekwaga lisiku lililyose. Musi liwundelyo lyajimaga penani pa chitenticho nambo chilo liwundelyo lyaŵalaga mpela moto penani pa chitenticho. 17 Liwundelyo palinyakwiche penani pa chitenticho, Ayisalayeli ŵanyakukagasoni ndaŵi jijojo. Palipose pachilijime liwundelyo, Ayisalayeli ŵakungagasoni matenti gawo pelepo. 18 Yehofa palamwile kuti Ayisalayeli anyakuche, jemanjajo ŵanyakukaga, soni Yehofa palamwile kuti Ayisalayeli akunje matenti, jemanjajo ŵakungaga. Ndaŵi josope jele liwunde ligambile kwima penani pa chitentipo, Ayisalayeliwo ŵapitilisyaga kutama pakunjile matenti gawopo. 19 Naga liwundelyo likwimape penani pa chitentipo kwa masiku gejinji Ayisalayeliwo nganatyokaga, ŵapitilisyaga kutama papopo pakumpikanila Yehofa. 20 Ndaŵi sine liwundelyo lyagambaga kwima penani pa chitenticho kwa masiku gamnono. Yehofa palamwile kuti jemanjajo apitilisye kutama pakunjile matenti gawo, jemanjajo ŵatamaga, soni Yehofa palamwile kuti anyakuche, jemanjajo ŵanyakukaga. 21 Ndaŵi sine liwundelyo lyagambaga kwima penani pa chitenticho kutandila ligulo mpaka kundaŵi, mwamti liwundelyo palinyakwiche kundaŵiko, jemanjajo ŵanyakukagasoni. Chinga liwundelyo chilinyakuche musi kapena chilo, ndaŵi jilijosejo, jemanjajo ŵanyakukaga. 22 Chinga liwundelyo lijimi penani pa chitenticho kwa masiku gaŵili kapena mwesi kapenasoni kupunda pelepo, pandaŵi josope jenejo Ayisalayeliwo ŵapitilisyaga kutama papopo ngatyoka. Nambo liwundelyo palinyakwiche, jemanjajosoni ŵanyakukaga ndaŵi jijojo. 23 Yehofa palamwile kuti Ayisalayeli akunje matenti, jemanjajo ŵakungaga, soni Yehofa palamwile kuti anyakuche, jemanjajo ŵanyakukaga. Ayisalayeliwo ŵampikanilaga Yehofa pakukuya yosope yaŵalamulaga Yehofajo kupitila mwa Mose.