Numeli

31 Kaneko Yehofa ŵamsalile Mose kuti, 2 “Mwape chilango* Amidiyani pakwawuchisya yindu yaŵatendele Ayisalayeli. Panyuma pakwe, mmwejo chim’we ni kusichidwa m’malembe mpela mwayaŵelele ni achinangolo ŵenu.”

3 Myoyo Mose ŵasalile Ayisalayeli kuti, “Mwakosechelesye achalume pasikati penu kuti ajawule kukumenyana ngondo ni Amidiyani, pakwanilisya yalamwile Yehofa yakuti Amidiyani apochele chilango pa yindu yaŵamtendele. 4 Msagule achalume 1,000 kutyochela mu mbumba* jilijose pa mbumba syosope sya Ayisalayeli kuti ajawule kukuputa ngondojo.” 5 Myoyo kutyochela pa masausande ga Ayisalayeli ŵasagwile achalume 1,000 pa mbumba jilijose, mwamti achalume wosope ŵaŵakosechele kuti akapute ngondojo ŵakwanile 12,000.

6 Kaneko Mose ŵatumisye jemanjaji ku ngondo, achalume 1,000 kutyochela pa mbumba jilijose. Ŵatumisye ku ngondoko pampepe ni Pinihasi mwanache jwa jwakutaga mbopesi Eliyesala. Pakwawula kweleko jwalakwe ŵajigele yiwiya* yeswela soni malipenga ga ngondo. 7 Jemanjaji ŵamenyene ngondo ni Amidiyani mwakamulana ni yaŵalamwile Yehofa kupitila mwa Mose, mwamti ŵawuleje achalume wosope. 8 Pa ŵandu ŵaŵawulajidwewo papalisoni mamwenye msano ga ku Midiyani. Mena gawo galiji: Efi, Lekemu, Suli, Hula nambosoni Leba. Ŵamwulejesoni Balamu mwanache jwa Beoli ni upanga.* 9 Nambo Ayisalayeliwo ŵajigele achakongwe soni ŵanache ŵa Chimidiyani kuti akaŵe achikapolo. Ŵajigelesoni yilango yawo yosope pampepe ni yipanje yawo yosope. 10 Misinda josope jaŵatamaga Amidiyani soni malo gawo gosope gaŵakunjile matenti ŵagajochiche moto. 11 Ŵajigelesoni yindu yiliyose yaŵapatile kweleko, chinga ŵandu kapena yilango. 12 Kaneko jemanjajo ŵawujile kuŵaliji Mose, jwakutaga mbopesi Eliyesala soni Ayisalayeli wosope, kuŵakunjile matenti gawo mu chipululu cha Mowabu chachaliji mwakulolegana ni msinda wa Yeliko wawaliji ku lisi line lya lusulo lwa Yolodani. Jemanjajo ŵayiche ali ajigele ŵandu ŵaŵakamwile kuti akaŵe achikapolo ŵala pampepe ni yindu yosope yaŵayipatile kweleko.

13 Kaneko Mose soni jwakutaga mbopesi Eliyesala pampepe ni ŵakulongolela mbumba sya Ayisalayeli wosope ŵapite kuti akasimane ni jemanjajo kusa kwa malo gaŵakunjile matenti Ayisalayeli. 14 Nambo achakulungwakulungwa ŵaŵalongolelaga asilikaliwo paŵawusile ku ngondoko, Mose ŵatumbilile mnope. Ŵeleŵa ŵaliji ŵakulongolela ŵa asilikali masausande soni ŵakulongolela ŵa asilikali mahandede. 15 Mose ŵawusisye jemanjajo kuti, “Ligongo chichi mwalesile achakongwe wosope ngawulaga? 16 Ana mliŵalile yakuti achakongwe ŵeleŵa ni ŵele mwakulongoleledwa ni Balamu ŵanyenjelele Ayisalayeli kuti atende yindu yangakulupichika pameso pa Yehofa mwakutindiŵalila mlungu jwaunami jwa ku Peoli? Ana yeleyi ngaŵa ni yayatendekasisye kuti mlili wagwile ŵandu ŵa Yehofa? 17 Sambano mumwulaje mwanache jwalijose jwamlume soni mumwulaje jwamkongwe jwalijose juŵagonilepo ni ŵalume. 18 Nambo asikana wosope ŵanganagonejepo ni achalume, ŵelewo mwaleche mkawulaga. 19 Nambosoni jemanja wosope mtame kunokuno kusa kwa malo gakunjile matenti Ayisalayeli kuno kwa masiku 7. Jwalijose jwawuleje mundu soni jwalijose jwakamwile mundu jwawulajidwe akusosekwa aliswejesye palisiku lyatatu soni pa lisiku lya 7. Mliswejesye jemanja pampepe ni ŵandu ŵamwakamwile kuti aŵe achikapolo ŵenuwo. 20 Nambosoni mkusosekwa kuchiswejesya chakuwala cha mtundu uliwose chamjigele, chindu chilichose chakupanganya ni lipende lya nyama, chindu chilichose chakupanganya ni ubweya wa mbusi kapenasoni chindu chilichose chakupanganya ni matabwa.”

21 Kaneko jwakutaga mbopesi Eliyesala ŵasalile achalume ŵaŵapite kukuputa ngondowo kuti, “Lilamusi lyele Yehofa ŵamsalile Mose ni ali: 22 ‘Yindu yiliyose yagolide, yasilifa, yakopa, ya ayiloni, ya chisyano cha tini, yamtofu, 23 kwamba kuti yindu yiliyose yampaka yipite pamoto ni ngapya, yindu yeleyi myipitisyeje pamoto, pelepo yichiŵa yeswela. Nambope panyuma pakwe, yindu yeleyi myiswejesyejesoni ni mesi gapadela. Chindu chilichose changanichiŵa chipitile pamoto mchichapeje ni mesi. 24 Kaneko pa lisiku lya 7, mchapeje yakuwala yenu ni kuŵa ŵaswela. Panyuma pakwe mpaka mwujile ku matenti.’”

25 Kaneko Yehofa ŵamsalile Mose kuti, 26 “Mmwejo pampepe ni jwakutaga mbopesi Eliyesala soni achakulungwakulungwa ŵakwimila maŵasa gakumanyika ni mena ga achinangolo ŵawo, mŵalanjile yindu yiliyose yajigele asilikali kutyochela ku ngondo, kutandila ŵandu ŵaŵakamwile mpaka yilango yakwe. 27 Myigaŵe yinduyo paŵili, hafu jine ajigale asilikali ŵaŵapite ku ngondowo soni hafu jinejo ajigale Ayisalayeli wosope. 28 Pa yindu yachajigale asilikali ŵaŵapite ku ngondowo, mjigale mundu jumo pa ŵandu 500 ŵaliwose, ng’ombe jimo pa ng’ombe 500 silisyose, bulu jumo pa abulu 500 ŵaliwose nambosoni ngondolo jimo pa ngondolo 500 silisyose. Mjigale yindu yeleyi ni kuyipeleka kwa Yehofa kuti yiŵe mpela msongo. 29 Mjigale yindu yeleyi kutyochela pa yindu yapochele jemanjajo ni kumpa jwakutaga mbopesi Eliyesala mpela yakupeleka yakwawula kwa Yehofa. 30 Kutyochela pa yindu yachapochele Ayisalayeli, mjigale mundu jumo pa ŵandu 50 ŵaliwose, ng’ombe jimo pa ng’ombe 50 silisyose, bulu jumo pa abulu 50 ŵaliwose, ngondolo jimo pa ngondolo 50 silisyose soni chilango chimochimo pa yilango 50 ya mtundu wine uliwose. Mjigale yindu yeleyi ni kuyipeleka kwa Alefi ŵele masengo gawo galiji gakwayana ni kutumichila ku chitenti cha Yehofa.”

31 Myoyo Mose soni jwakutaga mbopesi Eliyesala ŵatesile yosope mwakamulana ni yaŵatite Yehofa pakumlamula Mose. 32 Yindu yosope yaŵajigele asilikaliwo kutyochela ku ngondoko ni ayi: ŵajigele ngondolo syakwana 675,000, 33 ng’ombe 72,000, 34 soni abulu 61,000. 35 Achakongwe ŵaŵajigele ŵanganagonejepo ni achalume ŵakwanile 32,000. 36 Kutyochela pa yindu yaŵajigele ku ngondoko, asilikali ŵapochele hafu ja yinduyo. Yaŵapocheleyo ni ayi: Ŵapochele ngondolo syakwana 337,500. 37 Pa ngondolo syelesi, ŵajigele ngondolo 675 ni kusipeleka kwa Yehofa mpela msongo. 38 Ng’ombe syaŵapochele syakwanile 36,000. Pa ng’ombe syelesi, ŵajigele ng’ombe 72 ni kusipeleka kwa Yehofa mpela msongo. 39 Abulu ŵaŵapochele ŵakwanile 30,500. Pa abulu ŵeleŵa, ŵajigele abulu 61 ni kwapeleka kwa Yehofa mpela msongo. 40 Achakongwe ŵaŵapochele ŵakwanile 16,000. Pa achakongwe ŵeleŵa, ŵajigele achakongwe 32 ni kwapeleka kwa Yehofa mpela msongo. 41 Kaneko Mose ŵajigele misongo josope jaŵapochele jakwawula kwa Yehofa ni kumpa jwakutaga mbopesi Eliyesala. Ŵatesile yeleyi mwakamulana ni yele Yehofa ŵamlamwile Mose.

42 Kutyochela pa yindu yaŵajigele asilikaliwo ku ngondo, Mose ŵajigele hafu ja yinduyo ni kwapa Ayisalayeli. Yindu yakwe ni ayi: 43 ngondolo syakwanile 337,500, 44 ng’ombe 36,000, 45 abulu 30,500 46 nambosoni achakongwe ŵaŵapochele ŵakwanile 16,000. 47 Kutyochela pa yindu yaŵapochele Ayisalayeliyo, Mose ŵajigalaga mundu jumo pa ŵandu 50 ŵaliwose soni chilango chimo pa yilango 50 yiliyose. Ŵajigele yindu yeleyi ni kuyipeleka kwa Alefi ŵele masengo gawo galiji gakwayana ni kutumichila ku chitenti cha Yehofa. Mose ŵatesile yeleyi mwakamulana ni yaŵatite Yehofa pakumlamula jwalakwe.

48 Kaneko achalume ŵakusagulidwa ŵa magulu ga asilikaliwo,* ŵele ŵalijisoni achakulungwakulungwa ŵaŵalongolelaga asilikali masausande soni achakulungwakulungwa ŵaŵalongolelaga asilikali mahandede ŵayiche kwa Mose. 49 Kaneko ŵamsalile Mosejo kuti, “M’weji ŵakutumichila ŵawo twaŵalasile achalume wosope ŵaŵapite ku ngondo ŵatwalolelaga nambo pangali mundu jwalijose jwasoŵile. 50 Myoyo atukunde m’wejo kuti tupeleche mpela mbopesi kwa Yehofa yindu yatupatile mpela yindu yagolide, yuma yakuwala mu ngongolo, yibangili, mbete syaumwenye, ndolo nambosoni yakulisalalisya yine. Tukusaka kupeleka yeleyi kuti tusimasye ulemwa wetu pameso pa Yehofa.”

51 Pelepo Mose soni jwakutaga mbopesi Eliyesala, ŵapochele yindu yagolideyo kutyochela kwa jemanjajo pampepe ni yindu yosope yakulisalalisya. 52 Golide josope juŵapeleche kwa Yehofa jwakwanile mbiya sya sekeli* 16,750. Achakulungwakulungwa ŵaŵalongolelaga asilikali masausande soni achakulungwakulungwa ŵaŵalongolelaga asilikali mahandede ni ŵaŵapeleche golide jweleju. 53 Jwamlume jwalijose juŵapite ku ngondoko jwapochele mbali jakwe. 54 Mose soni jwakutaga mbopesi Eliyesala, ŵapochele golide josope kutyochela kwa achakulungwakulungwa ŵakulongolela magulu ga asilikali masausande soni magulu ga asilikali mahandede. Ŵajigele yindu yeleyi ni kuja kuyisunga mu chitenti chakusimanilana kuti yakumbusyeje Ayisalayeli yaŵatendele Yehofa.