Ekisodo

16 Pali papite ndaŵi, gulu josope ja Ayisalayeli jatyosile ku Elimu ni jayiche ku chipululu cha Sini. Chipululu chelechi chili pasikati pa Elimu ni Sinai. Jemanjaji ŵayiche kweleko palisiku lya 15 lya mwesi waŵili kutyochela pandaŵi jiŵakopweche m’chilambo cha Iguputo.

2 Kaneko gulu josope ja Ayisalayeli jatandite kumdandawula Mose soni Aloni mu chipululumo. 3 Ayisalayeliwo ŵaŵechetaga kwa jemanjajo kuti, “Yikaliji chenene mkono wa Yehofa ukatuwulajile m’chilambo cha Iguputo mula kwele twaliji mkutama mumbali mwa mipika ja nyama soni kulya mkate* ni kwikutaga. Apa sambano mtujigalile m’chipululu muno kuti mpingo wosopewu uwe ni sala.”

4 Kaneko Yehofa ŵamsalile Mose kuti, “Une chingwisye mkate kutyochela kwinani soni mundu jwalijose ajawuleje kukulokota mkate wakumkwanila lisiku lililyose. Chindende yeleyi ni chakulinga chakuti nalinje jemanjajo kuti ndole naga mpaka akuyeje malamusi gangu kapena iyayi. 5 Nambo palisiku lya 6, jemanjaji pachakalokoteje soni kuteleka mkate wa palisikulyo, akalokoteje mkatewo mwakuwilisya kaŵili pamlingo walokweteje pamasiku ganego.”

6 Myoyo Mose ni Aloni ŵasalile Ayisalayeli wosopewo kuti, “Liguloli chimmanyilile nditu kuti Yehofa ni juŵamkopwesye jemanja wosope kutyochela m’chilambo cha Iguputo. 7 Kundaŵi, jemanja chimlole uchimbichimbi wa Yehofa pakuŵa jwalakwe apikene kudandawula kwenu kwakulimbana ni Yehofa. Ana m’we tuli ŵani kuti mtudandawuleje?” 8 Mose ŵapitilisye kuŵecheta kuti, “Yehofa pachampe nyama jemanja liguloli jakuti mlye soni pachampe mkate kundaŵi wakuti mlye mpaka kwikuta, pelepo jemanja chimchimanyilila kuti Yehofa apikene kudandawula kwenu kwamkumdandawula jwalakwe. M’weji tuli ŵani kuti mtudandawuleje? Kudandawula kwenuko, ngamkutudandawula m’weji nambo mkumdandawula Yehofa.”

9 Kaneko Mose wamsalile Aloni kuti, “Mwasalile Ayisalayeli wosope kuti, ‘Jemanja wosope myiche pameso pa Yehofa, pakuŵa jwalakwe apikene kudandawula kwenu.’” 10 Aloni paŵagambile kuŵecheta yeleyi kwa Ayisalayeli wosopewo, jemanjajo ŵagalawiche ni kulola ku chipululu. Ali alolite, uchimbichimbi wa Yehofa wawonechele mwiwunde.

11 Yehofa ŵapitilisye kuŵecheta ni Mose kuti, 12 “Une mbikene kudandawula kwa Ayisalayeli. Myoyo mwasalile jemanjajo kuti, ‘Ligulo* chimlyeje nyama, soni kundaŵi chimlyeje mkate ni kwikuta, soni jemanja chimchimanyilila nditu kuti une ndili Yehofa Mlungu jwenu.’”

13 Myoyo ligulolyo yiwuti yayiche ni kuŵa palipose pamalo paŵakunjile matenti gawo, soni kundaŵi kwakwe kwagwile mangame kusyungulila pamalo posopepo. 14 Mangamego pagajumwile, pawoneche yindu yine yakusalala soni yakupyapyala petaka lya m’chipululu mula. Yinduyo yawonekaga mpela mangame gakusalala gali gawundene petaka. 15 Ayisalayeliwo paŵayiweni yinduyo, ŵatandite kuwusyana kuti, “Ana chelechi chichi?” Ŵawusisye myoyo pakuŵa jemanjaji nganayimanyililaga yinduyo. Pelepo Mose ŵajanjile jemanjajo kuti, “Yeleyi yili yakulya yele Yehofa ampele jemanja kuti mlyeje. 16 Yehofa alamwile kuti, ‘Jwalijose alokoteje chakulya chelechi mwakamulana ni winji wa yakulya yampaka ayikombole kulya. Pakujigalila winji wa ŵandu ŵele mundu akutama nawo mutenti jakwe, mundu jwalijose amlokoteleje chakulya chakugumbala omeli* jimpepe.’” 17 Ayisalayeli ŵatandite kulokota yinduyo. Ŵane ŵalokotaga yejinji soni ŵane ŵalokotaga yamnono. 18 Jemanjajo palinjile yakulyayo ni mlingo wa omeli ula, mundu jwalokwete yejinji nganiyipundaga winji wa yakulya yaŵasosechelaga, soni mundu jwalokwete yamnono nganiyipelembelaga pa winji wa yakulya yaŵasosechelaga. Jemanjajo ŵalokotaga mwakamulana ni yampaka akakombole kulya.

19 Kaneko Mose ŵasalile jemanjajo kuti, “Pakapagwa jwalijose jwakuyisunga yakulyayi mpaka kundaŵi.” 20 Nambo jemanjajo nganampikanila Mose. Ŵandu ŵane paŵasunjile yakulyayo mpaka kwika kundaŵi, yakopweche mbisu mwamti yatandite kununga mnope. Pelepo Mose ŵatumbilile mnope jemanjajo. 21 Kundaŵi kulikose, jemanjajo ŵalokotanyaga yakulya yampaka mundu jwalijose akombole kulya. Lyuŵa palikwesile ni kutanda kocha, yakulyayo yasungunukukaga.

22 Palisiku lya 6, jemanjaji ŵalokwete yakulya yejinji kuwilisya kaŵili pa yakulya yaŵalokotaga lisiku lililyose. Mundu jwalijose jwalokwete yakulya yakugumbala milingo jiŵili ja omeli. Myoyo, achimlongola wosope ŵa Ayisalayeli ŵayiche kwa Mose ni kumsalila yeleyi. 23 Pelepo jwalakwe ŵasalile jemanjajo kuti, “Yeleyi ni yaŵechete Yehofa. Malaŵi lili lisiku lyakupumula, sabata japajika ja Yehofa. Myoyo mteleche yamkusaka kuteleka soni mtokotesye yamkusaka kutokotesya, kaneko yosope yachiyisigale myisunje mpaka kundaŵi. 24 Myoyo jemanjajo ŵasunjile yakulyayo mpaka kundaŵi mpela muŵalamulile Mose, mwamti yakulyayo nganiyinunga kapena kutenda mbisu. 25 Kaneko Mose ŵatite, “Mlye yakulya yeleyi lelo, ligongo lelo lili lisiku lya sabata ja Yehofa. Soni lelo ngamjakuyisimana yakulya yeleyi palitaka. 26 Mlokoteje yakulyayo kwa masiku 6, nambo palisiku lya 7, lyalili lisiku lya Sabata, yakulyayo ngayisimanikwaga.” 27 Nambope ŵandu ŵane ŵapite kukulokota yakulyayo palisiku lya 7, nambo nganapata chilichose.

28 Myoyo Yehofa ŵamwusisye Mose kuti, “Ana jemanja chimŵe mli mkukana kusunga malamusi gangu mpaka chakachi? 29 Mkusosekwa kumanyilila kuti Yehofa ŵampele jemanja Sabata. Ni ligongo lyakwe jwalakwe akumpa jemanja mkate palisiku lya 6 wakwanila kulya masiku gaŵili. Jwalijose atameje pamalo gakwe. Pakasimanikwaga mundu jwakutyoka pamalo gakwe palisiku lya 7.” 30 Myoyo ŵanduwo ŵapumwile palisiku lya 7 lyalyaliji lya Sabata.

31 Pelepo Ayisalayeli ŵayipele yakulyayo lina lyakuti mana.* Managa gawonekaga mpela songolo sya mapemba soni galiji geswela nambosoni ganong’aga mpela makeke gepwapwatiche gewanganye ni uchi. 32 Kaneko Mose ŵatite, “Yehofa alamwile kuti, ‘Mjigale mana gagumbala omeli jimo ni kugasunga ni chakulinga chakuti mibado* jakwika msogolo chijilole chakulya chanampaga kuti mlyeje m’chipululu pandaŵi jele namkoposyaga jemanja m’chilambo cha Iguputo.’” 33 Myoyo Mose ŵamsalile Aloni kuti, “Mjigale lulo ni kuŵika mana gakugumbala omeli jimo ni kugaŵika pameso pa Yehofa kuti gasunjiche mpaka ku mibado jenu josope.” 34 Myoyo, Aloni ŵajigele manago ni kugaŵika pasogolo pa Umboni* ni chakulinga chakuti gasunjiche, mwakamulana ni yele Yehofa ŵamlamwile Mose. 35 Ayisalayeli ŵalile mana kwa yaka yakwana 40 mpaka paŵayiche ku chilambo chaŵatamaga ŵandu. Jemanjajo ŵalyaga mana mpaka paŵayiche m’malile ga chilambo cha Kanani. 36 Sambano milingo 10 ja omeli jaŵaga mlingo umo wa Efa.*