Numeli

10 Kaneko Yehofa ŵamsalile Mose kuti, 2 “Mlipanganyichisye malipenga gaŵili. Msyane silifa ni kupanganya malipengago. Malipengago mgakamulichisyeje masengo pakwaŵilanga Ayisalayeli kuti asongane pampepe soni pakwamanyisya ŵanduwo kuti apasulanyeje matenti gawo ni kunyakuka. 3 Malipenga gaŵiligo pagalisile pampepe, ŵandu wosopewo asonganganeje kwa mmwejo ku mlango wa chitenti chakusimanilana. 4 Naga lilisile lipenga limpepe, achakulungwa wosope ŵakulolela masausande* ga Ayisalayeli ayicheje kwa mmwejo.

5 “Naga papikaniche lipenga lyakuchengachenga kalile kakwe, gulu jakola mbumba* sitatu jajikunjile matenti gawo mbali jakungopokolyuŵa jinyakucheje. 6 Naga papikaniche kanesoni lipenga lyakuchengachenga kalile kakwe, gulu jakola mbumba sitatu jajikunjile matenti gawo mbali jakummwela jinyakucheje. Alisyeje lipenga m’litala lyeleli pandaŵi jilijose jakusaka kuti gulu jilijose ja mbumba sitatu jinyakuche.

7 “Sambano naga mkusaka kwasonganganya ŵandu wosopewo pampepe, mlisyeje malipengago nambo ngaŵa mwakuchengachenga kapikaniche kakwe. 8 Ŵanache ŵa Aloni ŵali ŵakutaga mbopesi ni ŵachalisyeje malipengago. Lyeleli lili lilamusi lyakwayana ni kulisya malipenga lyakuti mkuyeje ku mibado jenu josope mpaka kalakala.

9 “Pamli m’chilambo chenu, naga yitendekwe kuti payiche adani ŵenu ŵakumlagasya kuti amenyane ngondo ni jemanja, mlisyeje malipenga gakwaŵilanjila asilikali ku ngondo. Pelepo Yehofa Mlungu jwenu chachimpikana jemanja ni kumkulupusya mmyala mwa adani ŵenuwo.

10 “Nambosoni pandaŵi ja yisangalalo yenu kapena kundanda kwa mwesi uliwose, mlisyejesoni malipenga pamkupeleka mbopesi syenu syakutinisya soni mbopesi syenu syamkamulano. Yeleyi yichitendekasya kuti Mlungu amkumbuchile jemanja. Une ndili Yehofa Mlungu jwenu.”

11 Sambano m’chaka chaŵili, m’mwesi waŵili, pa lisiku lya 20 lya mwesiwo, liwunde lila lyanyakwiche penani pa chitenti cha Mlungu, mwakusaŵika Libokosi lya Umboni. 12 Pelepo Ayisalayeliwo ŵawutandite ulendo wawo wakutyoka m’chipululu cha Sinai, mwakamulana ni dongosolo jaŵajitamilikasisye ja kanyakuche kawo. Liwunde lila palyanyakwiche pelepa lyajile kwima m’chipululu cha Palana. 13 Jeleji jaliji ndaŵi jandanda jaŵanyakwiche jemanjaji pakukuya yaŵalamwile Yehofa kupitila mwa Mose.

14 Myoyo gulu jakola mbumba sitatu jakumanyika ni lina lyakuti Yuda jatandite kunyakuka mwakamulana ni tumagulu twawo.* Nasoni mwanache jwa Aminadabu ni juŵalongolelaga tumagulu twa mbumba* ja Yuda. 15 Juŵalongolelaga tumagulu twa mbumba ja Isakala ŵaliji Netanele mwanache jwa Suwala. 16 Juŵalongolelaga tumagulu twa mbumba ja Sebuloni ŵaliji Eliyabu mwanache jwa Heloni.

17 Paŵamalisisye kupasulanya chitenticho ŵanache ŵa Gelisoni soni ŵanache ŵa Melali ŵakunyakula yindu yosope yakukunjila chitenticho, ŵanyakwiche.

18 Panyuma pakwe, gulu jakola mbumba sitatu jakumanyika ni lina lyakuti Lubeni janyakwiche mwakamulana ni tumagulu twawo.* Elisuli mwanache jwa Seduwele ni juŵalongolelaga tumagulu twa mbumba ja Lubeni. 19 Juŵalongolelaga tumagulu twa mbumba ja Simiyoni ŵaliji Selumiyele mwanache jwa Sulisadayi. 20 Juŵalongolelaga tumagulu twa mbumba ja Gadi ŵaliji Eliyasafu mwanache jwa Deuweli.

21 Kaneko ŵanache ŵa Kohati ŵakunyakula yindu yakumalo geswela, ŵanyakwiche. Pakwika jemanjaji ŵasosekwaga kuchisimana chitenti chili chekunje.

22 Panyuma pakwe, gulu jakola mbumba sitatu jakumanyika ni lina lyakuti Efulayimu janyakwiche mwakamulana ni tumagulu twawo.* Elisama mwanache jwa Amihudi ni juŵalongolelaga tumagulu twa mbumba ja Efulayimu. 23 Juŵalongolelaga tumagulu twa mbumba ja Manase ŵaliji Gamaliyele mwanache jwa Pedasuli. 24 Juŵalongolelaga tumagulu twa mbumba ja Benjamini ŵaliji Abidani mwanache jwa Gidoni.

25 Kaneko gulu jakola mbumba sitatu jakumanyika ni lina lyakuti Dani janyakwiche mwakamulana ni tumagulu twawo.* Gulu jeleji jaliji jakumalichisya soni jaŵaga munyuma, mwamti jachenjelaga magulu gane gosopego. Ahiyeseli mwanache jwa Amisadayi ni juŵalongolelaga tumagulu twa mbumba ja Dani. 26 Juŵalongolelaga tumagulu twa mbumba ja Aseli ŵaliji Pagiyele mwanache jwa Okilani. 27 Juŵalongolelaga tumagulu twa mbumba ja Nafitali ŵaliji Ahila mwanache jwa Enani. 28 Jeleji jaliji dongosolo jaŵajikuyaga Ayisalayeli pampepe ni tumagulu twawo* pandaŵi jilijose jakunyakuka.

29 Kaneko Mose ŵaŵechetene ni Hobabu mwanache jwa Leuwele. Leuwele ŵaliji akwegwe ŵawo Mose ŵaŵatamaga ku Midiyani. Mose ŵamsalile jwalakwejo kuti, “Sambano m’weji tukusaka kuwutanda ulendo wakwawula kumalo ku ŵatusalile Yehofa kuti chachitupa. Kwendetu alongane ni m’weji, chitukatameje nawo chenene ligongo Yehofa asasile kuti chiŵatendele yambone Ayisalayeli.” 30 Nambo jwalakwejo ŵajanjile kuti, “Une nganjawula kweleko, chimbujile ku chilambo changu kwa achalongo achimjangu.” 31 Pelepo Mose ŵatite, “Akatuleka chonde, pakuŵa wawojo akumanyilila malo gambone gampaka tukunjeje matenti m’chipululu muno. Wawojo mpaka atulongoleleje litala.* 32 Nambosoni naga akukunda kuti tulongane, yindu yiliyose yambone yachakatutendeleje Yehofa wawojosoni chakapocheleje nawo.”

33 Myoyo jemanjajo ŵanyakwiche ku litumbi lya Yehofa ni kwenda kwa masiku gatatu. Libokosi lya chilanga lya Yehofa, lyaliji pasogolo pawo kwa masiku gosope gatatugo, kusosasosa malo gakuti akunje matenti. 34 Ndaŵi jilijose pakunyakuka pamalo pakunjile matenti gawo, liwunde lya Yehofa lyaŵaga penani pawo musi.

35 Ndaŵi jilijose Libokosi lya Chilanga palikunyakuka Mose ŵaŵechetaga kuti, “Wawo Yehofa, anyakuche. Adani ŵawo wosope abalalikangane, soni wosope ŵakuŵengana ni wawojo atile pameso pawo.” 36 Libokosilyo paliyiche pamalo gane gakuti akunje matenti, jwalakwe ŵaŵechetaga kuti, “Wawo Yehofa, awujile ni kutamasoni ni Ayisalayeli masausande gejinji gangaŵalanjika.”