Ekisodo
17 Sambano gulu josope ja Ayisalayeli janyakwiche ku chipululu cha Sini ni kwendaga mwakupumulilapumulila mwakamulana ni yaŵasalile Yehofa. Kaneko jemanjajo ŵakunjile matenti gawo ku Lefidimu. Nambo kweleko kwaliji kwangali mesi gakuti ŵandu amwe.
2 Myoyo ŵanduwo ŵatandite kukangana ni Mose ni kuŵechetaga kuti, “Mtupe mesi gakumwa.” Nambo Mose ŵawusisye jemanjajo kuti, “Ligongo chichi mkukangana ni une? Ligongo chichi jemanja mkupitilisya kumlinga Yehofa?” 3 Nambo ŵanduwo jakwete njota mnope, mwamti ŵapitilisye kumdandawula Mose ni kuŵechetaga kuti, “Ligongo chichi mwatukopwesye ku Iguputo kuti mtuwulaje m’weji ni njota, pampepe ni ŵanache ŵetu soni yilango yetu?” 4 Pambesi pakwe Mose ŵadandawile kwa Yehofa kuti, “Ana ndende nawo chichi ŵanduŵa? Jemanjaji asigele panandi kumbonya maganga.”
5 Kaneko Yehofa ŵamsalile Mose kuti, “Mjawule pasogolo pa ŵanduwo soni mwajigale achakulungwakulungwa ŵane ŵa Ayisalayeli nambosoni ndodo jamwaputile najo lusulo lwa Nailo jila. Mjigale ndodojo mmyala mwenu ni mjendeje. 6 Une chingajime kweleko pa lwala lwa ku Holebe. Mkapute palwalapo soni mesi chigakakopoche pelepo, mwamti ŵanduwo chakamwe mesigo.” Pelepo Mose ŵatesile yeleyi pameso pa achakulungwakulungwa ŵa Ayisalayeli. 7 Myoyo jwalakwe ŵagapele malogo lina lyakuti Masa* soni Meliba* ligongo lyakuti ŵakanganile ni Ayisalayeli soni ligongo lyakuti jemanjajo ŵamlinjile Yehofa paŵaŵechete kuti, “Ana Yehofa ali pasikati petu kapena iyayi?”
8 Kaneko Amaleki ŵayiche ni kutanda kumenyana ni Ayisalayeli ku Lefidimu. 9 Pelepo Mose ŵamsalile Yoswa kuti, “Mtusagulile achalume soni mjawule nawo kuti mkamenyane ni Amaleki. Malaŵi une chingajime penani pa litumbi ndili njigele ndodo ja Mlungu jwakuwona mmyala mwangu.” 10 Myoyo Yoswa ŵatesile yosope yaŵamsalile Mose, mwamti jwalakwe ŵapite kukumenyana ni Amalekiwo. Nombenajo Mose, Aloni soni Hula ŵapite penani pa litumbi lila.
11 Sambano Mose paŵakwesyaga makono gakwe mwinani, Ayisalayeli ŵaliji mkupunda ngondojo. Nambo jwalakwe patulwisye makono gakwe Amaleki ni ŵaŵapundaga ngondojo. 12 Nambo makono ga Mose pagapesile, Aloni ni Hula ŵajigele liganga ni kumŵichila pasi mwamti jwalakwejo ŵatemi pelepo. Kaneko Aloni ni Hula ŵakamwile makono gakwego, jwine mbali jine soni jwine mbali jine. Ŵatesile yeleyi ni chakulinga chakuti makono gakwego gaŵepe mwinani mpaka lyuŵa kukapila. 13 Mwelemu ni mwele Yoswa ŵamgomechele Amaleki ni ŵandu ŵakwe pakamulichisya masengo upanga.*
14 Sambano Yehofa ŵamsalile Mose kuti, “Myilembe yeleyi m’buku kuti yikaliŵalichika* ni mkamsalilesoni Yoswa kuti, ‘Une chinajonanje Amaleki wosope pachilambo chapasi, mwamti jemanjajo chachiliŵalichika yakuti ŵapali. 15 Kaneko Mose ŵataŵile malo gakupelechela mbopesi ni ŵagapele lina lyakuti Yehofa-nisi.* 16 Jwalakwe ŵatite, “Yehofa chachiputa ngondo ni Amaleki ku mibado* jakwe josope, pakuŵa mkono wa Amalekiwo ulimbene ni mpando wa Ya.”