Detulonomo
8 “Mŵeje ŵakusamala kuti mkuyeje lilamusi lililyose lyangumpa jemanja lelojino. Mtendeje yeleyi ni chakulinga chakuti mpitilisye kutama ni umi soni kuti mtupe nambosoni kuti mkajinjile ni kuchijigala chilambo chele Yehofa ŵalumbile kwa achinangolo ŵenu kuti chachapa. 2 Mkumbuchileje yaŵatesile Yehofa Mlungu jwenu pakumjendesya jemanja mumsewu wawulewu wakupita m’chipululu kwa yaka 40. Jwalakwe ŵatesile yeleyi pakusaka kumjiganya jemanja kuti mŵe ŵakulinandiya soni pakusaka kumlinga jemanja kuti amanyilile yayili mumtima mwenu, naga chimsunjeje malamusi gakwe kapena iyayi. 3 Myoyo jwalakwe ŵamjiganyisye jemanja kulinandiya mwakumtamika ni sala soni kumpa mana kuti mlyeje. Jemanja soni achinangolo ŵenu nganimgamanyililaga mana gelega. Jwalakwe ŵatesile yeleyi ni chakulinga chakuti jemanja mmanyilile kuti mundu ngaŵa mkutama ni umi ni chakulyape nambo ni maloŵe galigose gakutyochela mkamwa mwa Yehofa. 4 Yakuwala yamwawalaga jemanja nganiyimalaga soni sajo syenu nganisiyimba kwa yaka 40 yeleyi. 5 Jemanja mkumanyilila chenene mumtima mwenu kuti Yehofa Mlungu jwenu ŵamjongolelaga mpela mwakusatendela baba pakumjongolela mwanache jwakwe.
6 “Sambano jemanja mkusosekwa msunjeje malamusi ga Yehofa Mlungu jwenu mwakwenda m’matala gakwe soni kumjogopa jwalakwejo. 7 Pakuŵa Yehofa Mlungu jwenu akumjinjisya jemanja m’chilambo chambone, chilambo chakola sulo soni mesi gapasi gele gakusajenda mwilambo soni mudela jamatumbi, 8 chilambo chakola tiligu, balele, yisogosi ya mipeleya, yitela ya nguju, yimanga yachisungu,* mawuta ga maolifi nambosoni uchi. 9 Chilambo changasoŵa yakulya mwamti ngasimlajilila chine chilichose. Chilambo chakola maganga ga ayiloni soni chakola matumbi mwachimchiwukulaga maganga ga kopa.
10 “Jemanja pachimkalyeje ni kwikuta, mkamchimbichisyeje Yehofa Mlungu jwenu ligongo lya chilambo chambone champele jemanja. 11 Mkasamale kuti mkaja kumliŵalila Yehofa Mlungu jwenu mwakulepela kusunga malamusi gakwe soni yosope yaŵamlamwile jwalakwe yangumsalila jemanja lelojino. 12 Pachimkalyeje ni kwikuta soni kutaŵa nyumba syenu syambone ni kutamaga mwelemo, 13 ng’ombe soni ngondolo syenu pasikatupe nambosoni pachimkapate silifa ni golide jwamjinji soni pachimkakole yindu yosope yejinji, 14 mkaja kukunda kuti mtima wenu ulikwesye ni kumtendekasya kumliŵalila Yehofa Mlungu jwenu, jwele juŵamkopwesye jemanja m’chilambo cha Iguputo, kumtyosya m’nyumba ja ukapolo. 15 Jwalakwe ŵamlongolele jemanja mu chipululu chekulungwa soni chakogoya, chakola majoka ga poyisoni soni makoloto nambosoni chejumu changali mesi. Jwalakwe ŵatendekasisye kuti mesi gakopoche kutyochela mu lwala. 16 Soni ŵampaga mana kuti mlyeje mu chipululu, yakulya yele achinangolo ŵenu nganayimanyililaga. Ŵatesile yeleyi pakusaka kumjiganya jemanja kulinandiya soni pakusaka kumlinga kuti yindu yimjendele chenene msogolo. 17 Jemanja mkaja kutanda kuŵecheta mumtima mwenu kuti, ‘Chipanje chosope changwetechi nachipatile ligongo lya machili ga makono gangu soni kulimbichila kwangu.’ Naga mkuja kumŵecheta myoyo, 18 pelepo mkakumbuchile kuti Yehofa Mlungu jwenu ni jwakumpa jemanja machili kuti mpate chipanjecho, ni chakulinga chakuti akwanilisye chilanga chakwe chaŵalumbile kwa achinangolo ŵenu mpela mwayiŵelele lelojino.
19 “Naga chimkamliŵalile Yehofa Mlungu jwenu ni kujikuyaga milungu jine soni kujitumichila nambosoni kujitindiŵalila, une ngumkalamusya jemanja lelo kuti chimchimala nditu wosope ŵene. 20 Jemanja chimchimala wosope mpela mwayiŵelele ni ŵandu ŵamitundu jine, ŵakwajonanga Yehofa pameso penu. Yichiŵa myoyo ligongo lyakuti jemanja nganimpikanila maloŵe ga Yehofa Mlungu jwenu.