Chiwunukuko Chakwawula kwa Yohane
21 Kaneko nakuweni kwinani kwasambano soni chilambo chapasi chasambano, pakuŵa kwinani kwakala soni chilambo chapasi chakala yaliji yili yityosile, nambosoni nyasa nganijisimanikwasoni. 2 Nawuwenisoni msinda weswela, Yelusalemu Jwasambano, uli mkutuluka kutyochela kwinani kwa Mlungu uli wesalalisye mpela jwamkongwe jwakosechele kumpochela jwamlume jwachalombane najo. 3 Kaneko napikene maloŵe gagumila kutyochela kumpando waumwenye gali mkuti, “Alole. Malo gakutama Mlungu* gali pasikati pa ŵandu. Jwalakwejo chachitamaga ni jemanjajo, soni jemanjajo chachiŵa ŵandu ŵakwe. Mlungu msyenejo chachiŵa ni jemanjajo. 4 Jwalakwe chachipukuta misosi josope m’meso mwa ŵanduwo, mwamti chiwa ngasichipagwasoni. Ngasipapagwasoni yakutesya chanasa, kulila kapena kupikana kupweteka. Yindu yakala yosope yeneyi yichiŵa yili yimasile.”
5 Pelepo juŵatemi pampando waumwenye jula ŵaŵechete kuti, “Alole. Ngupanganya yindu yosope kuti yiŵe yasambano.” Ŵaŵechetesoni kuti, “Mlembe yeleyi, ligongo maloŵega gali gakudalilichika soni gasyesyene.” 6 Jwalakwejo ŵasalilesoni une kuti, “Maloŵe gala gakwanilichikwe, une ndili Alefa soni Omega,* ndanda soni mbesi. Jwalijose jwajimkwete njota chinjimpa mesi galulele kutyochela ku nduluko ja mesi gaumi. 7 Jwalijose jwachachipunda pangondo chachipochela yindu yeleyi, soni une chinjiŵa Mlungu jwakwe soni jwalakwejo chachiŵa mwanache jwangu. 8 Nambo pakwamba ya ŵandu ŵawoga, ŵangali chikulupi, ŵangaswejela soni ŵakusatenda yakunyalaya, ŵakuwulaga, ŵachikululu,* ŵakutenda yamisimu, ŵakutindiŵalila milungu jakusepa, soni ŵaunami wosope, jemanjaji mbesi jawo jichiŵa nyasa jakolela mnope moto wa sulufule. Nyasa jeleji jikwimila chiwa chaŵili.”
9 Kaneko kwayiche limo mwa malayika 7 gala gagajigele mbale 7 syegumbale ni milili 7 jakumalisya. Lilayikalyo lyasalile kuti, “Myiche akuno kuti namlosye jwamkongwe jwachalombane ni Mwanache Jwangondolo ni kuŵa ŵamkwakwe.” 10 Mwamachili ga msimu weswela, lilayikalyo lyanjigele ni kunjawusya ku litumbi lyekulungwa soni lyelewu mnope. Kweleko lyandosisye msinda weswela wa Yelusalemu uli mkutuluka kutyochela kwinani kwa Mlungu. 11 Msindawo wakwete uchimbichimbi wa Mlungu. Kuŵala kwakwe kwaliji mpela kuŵala kwa liganga lya mtengo wapenani, lyamti mbee mpela liganga lya yasipa, lyakunyesimila mpela ligalasi. 12 Msindawo wakwete lutenje lwekulungwa soni lwelewu nambosoni mageti 12 ni malayika 12, lilayika limo pa geti jilijose. Penani pa magetigo ŵalembile mena 12 ga mbumba sya Yisalayeli.* 13 Kungopokolyuŵa kwaliji mageti gatatu, kumpoto mageti gatatu, kummwela mageti gatatu, soni kundiŵililolyuŵa mageti gatatu. 14 Fendeshoni* ja lutenje lwa msindawo ŵajitaŵilesoni ni maganga 12. Pa magangago ŵalembile mena 12 ga ŵandumetume 12 ŵa Mwanache Jwangondolo.
15 Sambano juŵaŵechetaga ni une jula ŵajigele ndodo jakulinjila ja golide jakuwoneka mpela litete kuti alinjile msindawo, mageti gakwe soni lutenje lwakwe. 16 Msindawo wakwete mbali mcheche syakulandana, m’chilewu mwaliji mwakulandana ni m’chijipi. Paŵalinjile msindawo ni ndodo jila ŵawusimene kuti ukulu wakwe waliji chiŵandika makilomita 2,220.* M’chilewu mwakwe, m’chijipi soni msingu wakwe yaliji yakulandana. 17 Ŵalinjilesoni lutenje lwa msindawo mwamti ulewu wakwe waliji makono 144,* mwakamulana ni kapime ka mundu soni kapime ka lilayika. 18 Lutenje lwa msindawo ŵalupanganyisye ni liganga lya yasipa, soni msindawo waliji wa golide jwambone mpela ligalasi lyakuwonechela mkati. 19 Fendeshoni ja lutenje lwa msindawo ŵajisalalisye ni mitundu jilijose ja maganga ga mtengo wapenani. Liganga lyandanda lyaliji lya yasipa, lyaŵili safilo, lyatatu kalikedo, lyamcheche emeladi, 20 lyamsano sadonu, lya 6 salidiyo, lya 7 kilisolayiti, lya 8 belulo, lya 9 topasi, lya 10 kulusopulaso, lya 11 huwakinto, soni lya 12 lyaliji liganga lya ametusito. 21 Nambosoni mageti 12 gala galiji ngale* 12. Geti jilijose jaliji ngale jimo. Msewu wekulungwa wa mumsindawo waliji wagolide jwambone mnope mpela ligalasi lyakuwonechela mkati.
22 Mumsindawo nganinajiwona nyumba ja Mlungu, pakuŵa Yehofa Mlungu Jwamachiligosope soni Mwanache Jwangondolo ni ŵali nyumba ja mumsindawo. 23 Nambosoni mumsindawo nganimusosechelaga kuŵala kwa lyuŵa kapena mwesi kuti mulangucheje ligongo mwalangukaga ni uchimbichimbi wa Mlungu, soni nyali ja mumsindawo jaliji Mwanache Jwangondolo. 24 Mitundu ja ŵandu jichijenda m’lilanguka lya mumsindawo, soni mamwenye ga pachilambo chapasi gachiyikasya uchimbichimbi wawo mumsindawo. 25 Mageti gakwe gachiŵa gangawugala lisiku lyosope, ligongo chilo ngasichipagwa mwelemo. 26 Soni kuŵala ni uchimbichimbi wa mitundu ja ŵandu yichiyika mumsindawo. 27 Nambo chilichose changaswejela soni jwalijose jwakutenda yakunyalaya nambosoni yachinyengo ngasajinjila mumsindawo ata panandi. Ŵachachijinjila mwelemo ali ŵelepewo ŵele mena gawo ŵagalembile mu mpukutu wa umi wa Mwanache Jwangondolo.