Buku Jandanda ja Samuyele
20 Sambano Daudi ŵatisile ni kutyoka ku Nayoti mu msinda wa Lama. Kaneko jwayiche kwa Yonatani ni kumsalila kuti, “Ana une ndesile chichi? Ndemwisye chichi? Soni ana naleŵele chichi baba ŵenu kuti asacheje kumbulaga?” 2 Pelepo Yonatani ŵamjanjile Daudi kuti, “Yeleyotu ngayikomboleka. Mmwejo ngam’wa. Baba ŵangu nganaŵa atesile chilichose chinga chekulungwa kapena chamwana ni ngasalila une. Ligongo chichi baba ŵanguwo mpaka asisile yeleyi ngasalila? Yeleyo ngayitendekwa.” 3 Nambo Daudi jwalumbile ni kuŵecheta kuti, “Baba ŵenu akumanyilila nditu kuti mmwejo mkusanonyela une. Myoyo mpaka aŵechete kuti, ‘Yeleyi akamanyilila Yonatani ligongo mpaka yimtumbilikasye.’ Nambo une ngulumbila pameso pa Yehofa Mlungu jwaumi soni pameso pa mmwejo kuti chiwa chimbandichile.”
4 Kaneko Yonatani ŵamsalile Daudi kuti, “Chilichose chachimŵechete, une chinamtendele.” 5 Pelepo Daudi ni ŵamsalile Yonatanijo kuti, “Malaŵi lili lisiku lyakuwoneka kwa mwesi, ngusosekwa kuja kutama ni mwenye pakulya. Mungunde kuti njawuleje kuti ngajuŵe kwitinji mpaka lisiku lyatatu ligulo. 6 Naga baba ŵenu chakawusye ya une, mkasalile kuti, ‘Daudi ŵambendile une kuti ajawule mwachitema ku Betelehemu kumsinda wa kumangwakwe, ligongo liŵasa lyawo lyosope likuja kupeleka mbopesi japachaka.’ 7 Naga chakajanje kuti, ‘Yili chenene,’ nikuti une jwakutumichila jwenu pangali champaka njogopesoni. Nambo naga chiyikasakalisye, pelepo chimkamanyilile kuti asimichisye yakuti ambulaje. 8 Mulosye une jwakutumichila jwenu chinonyelo changamala, pakuŵa mmwejo mwatesile chilanga ni jwakutumichila jwenu pameso pa Yehofa. Nambo naga unejo ndili jwakulemwa, mumbulaje mmwejo mwasyene, chakumbelechela kwa baba ŵenu mpaka chiŵe chichi?”
9 Pelepo Yonatani ŵamjanjile kuti, “Une nganimba ndesile yeleyo. Ana ndili mbikene kuti baba asimichisye yakuti amwulaje mmwejo, une nganimba namsalile?” 10 Kaneko Daudi ŵamwusisye Yonatani kuti, “Ana ŵani ŵachachisalila une naga baba ŵenuwo ajanjile yindu yakulosya kuti yasakalisye?” 11 Yonatani ŵamsalile Daudi kuti, “Kwende tujawule kwitinji.” Pelepo wosope ŵanyakwiche ni kwawula kwitinjiko. 12 Kaneko Yonatanijo ŵamsalilesoni Daudi kuti, “Yehofa Mlungu jwa Ayisalayeli aŵe mboni kuti une chingaŵechetane ni baba ŵangu ndaŵi mpela jinojino malaŵi kapena mtondo. Naga babawo akumsalalila mtima mmwejo Daudi, ana une nganimba ndumisye utenga kwa mmwejo wakumsalila yeleyo? 13 Nambo naga baba ŵangu akusaka kumwulaga, une ni ngamsalila soni kumleka kuti mjawuleje mwamtendele, Yehofa ambe chilango* chekulungwa. Nguŵenda kuti Yehofa aŵe ni mmwejo mpela yaŵatite pakuŵa ni baba ŵangu. 14 Ana mmwejo ngasimundosya une chinonyelo changamala cha Yehofa pandili umi soni atamose ndili mbwile? 15 Mkasimleka kwalosya ŵandu ŵa m’nyumba jangu chinonyelo changamala atamose pandaŵi jele Yehofa chachatyosya pa chilambo chapasi adani wosope ŵa mmwejo Daudi.” 16 Myoyo Yonatani ŵatesile chilanga ni ŵandu ŵa m’nyumba ja Daudi. Jwalakwe ŵatite, “Yehofa chachajimba magambo soni kwapa chilango adani ŵa Daudi.” 17 Kaneko Yonatani ŵamsalile Daudi kuti alumbilesoni yakuti akusamnonyela, ligongo ŵamnonyelaga jwalakwejo mpela yaŵatiga pakulinonyela msyene.
18 Yonatani ŵamsalilesoni Daudi kuti, “Malaŵi lili lisiku lyakuwoneka kwa mwesi, soni baba ŵangu chachisimonga kuti msoŵile, ligongo pa mpando wenu pachiŵa pali pangali jwalijose juchachitama. 19 Palisiku lyatatu babawo ngasalepela nditu kuwusya ya mmwejo. Myoyo chimchisosekwa kwika akuno kumwajuŵile lisiku line lila soni chimtame chiŵandika ni liganga ali. 20 Une chinjiponya mipamba jitatu kumbali jine ja ligangali, nambo ndili mkusaka kusoma pa chindu chinechakwe. 21 Kaneko chinjimsalila jwamasengo jwangu kuti, ‘Mjawule mkalokote mipambajo.’ Naga chinjimsalilasoni jwamasengo jwangujo kuti, ‘Mipamba jili mbali aji, mjawule mkalokote,’ pelepo mmwejo chimkopoche. Nditu ngulumbila pameso pa Yehofa Mlungu jwaumi, yeleyi yichigopolela kuti yosope kwa mmwejo yili chenene soni pangali chakumjogoya. 22 Nambo naga chinjimsalila mnyamatajo kuti, ‘Mlole mipamba jili kusogolo kwenuko,’ pelepo chimtile. Pakuŵa Yehofa chachiŵa akundile kuti mmwejo mtile. 23 Pakwamba ya chilanga chatutesile mmwejo ni une, Yehofa aŵe mboni pasikati petu mpaka kalakala.”
24 Myoyo Daudi ŵajuŵile kwitinjiko. Lisiku lyakuwoneka kwa mwesi palyayiche, mwenye ŵatemi pampando wawo kuti alye yakulya. 25 Mwenyewo ŵatemi pampando wawo waŵatamaga ndaŵi syosope mwakuŵandichila kwipupa. Pele Yonatani ŵatemi mwakulolegana ni mwenyewo, soni Abineli ŵatemi pambali pa mwenyewo. Nambo pa mpando wa Daudi paliji pali pangali mundu. 26 Palisikuli Sauli nganaŵecheta yiliyose, pakuŵa jwalakwe ŵaŵechetaga mumtima mwakwe kuti, ‘Yipali yayimtendekasisye kuti aŵe jwangaswejela, nditu komboleka kuti ali jwangaswejela jwelejo.’ 27 Pa lisiku lyakuwoneka mwesilyo, malaŵi gakwe lyalyaliji lisiku lyaŵili, pa mpando wa Daudi paliji chiŵela pali pangali mundu. Pelepo Sauli ŵamwusisye mwanache jwakwe Yonatani kuti, “Ligongo chichi mwanache jwa Jese nganayika kukulya kutandila liso mpaka lelo?” 28 Yonatani ŵamjanjile Saulijo kuti, “Daudi ŵambendile une kuti namkunde kwawula ku Betelehemu. 29 Jwalakwe ŵatite, ‘Liŵasa lyetu likuja kupeleka mbopesi mumsinda, ni mungunde kuti njawule, sonitu achimwene ŵangu ambilasile. Naga asalalile une mtima chonde angunde kuti njawule mwachitemachitema ngalole achalongo achimjangu.’ Ni ligongo lyakwe jwalakwe nganayika pa tebulo ja mwenye.” 30 Pelepo Sauli ŵamtumbilile mnope Yonatani soni ŵamsalile kuti, “Mmwe mwanache jwa jwamkongwe jwakwimuchila, ana mkuganisya kuti une ngangumanyilila yakuti mmwejo msagwile kuŵa kumbali ja mwanache jwa Jese, yayili yakutesya sooni kwa mmwejo soni kwa mama ŵenu?* 31 Kwandaŵi josope jele mwanache jwa Jese chachiŵa ali umi pachilambo chapasi, mmwejo soni uchimwene wenu ngasiwutamilichika. Sambano mtumisye mundu jwine kuti akamjigale jwelejo ni kwika najo kwa une, ligongo jwalakwe akusosekwa kuwa basi.”
32 Nambo Yonatani ŵamwusisye Sauli babagwewo kuti, “Ligongo chichi akusosekwa kuwa? Alemwisye chichi?” 33 Pelepo Sauli ŵaponyisye mwamachili lipanga lyakwe kuti amwulaje Yonatanijo, mwamti jwalakwe ŵamanyilile kuti baba ŵakwewo asimichisye ya kumwulaga Daudi. 34 Ndaŵi jijojo Yonatani ŵajimwiche patebulopo ali atumbile mnope, mwamti palisiku lyaŵili lyakuwoneka mwesilyo jwalakwe nganalya yakulya. Pakuŵa jwalakwe ŵatumbile ligongo lya ngani ja Daudi soni kuti ŵamtesisye sooni.
35 Kundaŵi kwakwe Yonatani ŵapite kwitinji kuŵapangene kuti akasimane ni Daudi kula. Paŵajawulaga ŵaliji yimpepe ni jwamasengo jwakwe jwachinyamata. 36 Kaneko Yonatani ŵamsalile jwamasengo jwakwejo kuti, “Mwutuche mkalokote mipamba jachimbonye.” Pelepo jwamasengojo ŵatandite kuwutuka, soni Yonatani ŵaponyisye mpamba kusogolo kwa jwamasengojo. 37 Jwamasengojo paŵayiche pa malo paŵaponyisye Yonatani mpambawo, Yonatanijo ŵamsalile jwamasengojo kuti, “Mpamba uli kusogolo kwenuko.” 38 Kaneko Yonatani ŵamsalilesoni jwamasengo jwakwejo kuti, “Mjanguye mkalokote mipambajo mwachitema.” Pelepo jwamasengo jwa Yonatanijo ŵapite kukulokota mipambajo ni kuwujila kwa ambuje ŵakwewo. 39 Jwamasengojo nganamanyililaga yayikugopolela payayatendekwagayo. Nambo Yonatani ni Daudi ŵamanyililaga yayagopolelaga. 40 Kaneko Yonatani ŵajigele yida yakwe yangondo ni kumpa jwamasengojo soni ŵamsalile kuti, “Mjigale yidayi mjawuleje nayo kumsinda.”
41 Jwamasengojo paŵatyosile, Daudi ŵakopochele kutyochela kumbali ja kummwela chiŵandika ni paŵaliji Yonatanipo. Kaneko jwalakwe ŵatindiŵele mpaka ngope jakwe pasi kwa maulendo gatatu. Jemanjajo ŵalangangene mwachinonyelo* soni wosope ŵalisile. Nambo Daudi ni juŵalisile mnope. 42 Kaneko Yonatani ŵamsalile Daudi kuti, “Mjende chenene, pakuŵa wosope tulumbililene mu lina lya Yehofa kuti, ‘Yehofa aŵe mboni pasikati pa mmwejo ni une soni pasikati pa ŵanache* ŵenu ni ŵanache* ŵangu mpaka kalakala.’”
Kaneko Daudi ŵanyakwiche ni kwawulaga, soni Yonatani ŵawujile kumsinda.