Buku Jandanda ja Samuyele
21 Kaneko Daudi jwapite ku Nobu kwa Ahimeleki juŵaliji jwakutaga mbopesi. Ahimeleki paŵasimene ni Daudi ŵatandite kutetemela, ni ŵamwusisye Daudijo kuti, “Ligongo chichi mli jika pangali jwalijose jwakumpechesya?” 2 Pelepo Daudi ŵamjanjile Ahimeleki jwakutaga mbopesijo kuti, “Mwenye andumile kuti ndende yineyakwe nambo asalile kuti, ‘Jwalijose akamanyilila yanamtumileyi soni yindu yanamsalile kuti mkuye pakutenda yanamtumileyi.’ Myoyo ngamulene ni anyamata ŵangu kuti tukasimane malo ganegakwe. 3 Naga akwete mitanda msano ja mkate* chonde angayile. Kapena angayile yakulya yiliyose yakwete.” 4 Jwakutaga mbopesijo ŵamjanjile Daudi kuti, “Akuno kwangali mikate wamba, jajipali jili japajika. Mpaka alye mikateji, nambo chiyijigalile naga anyamatawo nganalisakasya ni achakongwe.”* 5 Daudi ŵamjanjile jwakutaga mbopesijo kuti, “M’weji nganitulisakasya ni achakongwe mwakulandana ni mwayaŵelaga maulendo gane patwajawulaga kungondo gele nganitulisakasyaga. Sambano naga anyamataŵa ŵaŵaga ŵaswela payakutendekwa wamba kuli uli pa yakutendekwa yaleloyi?” 6 Pelepo jwakutaga mbopesijo ŵampele Daudi mikate japajikajo, ligongo paliji pali pangali mikate jine akaŵe mikate jakulosya kwa Mlungu basi, jele ŵajityosisye pameso pa Yehofa kuti aŵiche mikate jasambano palisiku lyaŵatyosisye jakalajo.
7 Palisikuli jwakutumichila jwine jwa Sauli ŵamlamwile kuti atame pameso pa Yehofa ku chitenti cha Mlungu. Jwalakweju lina lyakwe lyaliji Doegi jwa ku Edomu soni jwaliji mlongola jwa ŵakulisya yilango ŵa Sauli.
8 Kaneko Daudi ŵamwusisye Ahimeleki kuti, “Ana akwete lipanga kapena upanga* uliwose akuno? Une nganinjigala upanga wangu soni yida yiliyose yangondo, ligongo yaŵandumile mwenyewo yaliji yachitema.” 9 Pelepo jwakutaga mbopesijo jwajanjile kuti, “Upanga wa Goliyati Mfilisiti jumwamwuleje ku Chiŵata* cha Ela jula uli akuno. Upangawu uli wenyembe* munguwo kunyuma kwajili efodi, naga mkuwusaka mpaka mjigale ligongo ni watukwete akuno.” Daudi ni jwatite, “Ambe uwowo pangali upanga wine wampaka ulandane ni welewo.”
10 Palisikuli Daudi ŵanyakwiche ni kupitilisya kumtila Sauli. Kaneko ŵayiche kwa Mwenye Akisi jwa ku Gati. 11 Ni ŵakutumichila ŵa Akisi ŵatandite kuwusyana kuti, “Ana aju ngati ali Daudi aju mwenye jwachilambo? Ana jweleju ngati ni ajula juŵamjimbilaga ŵandu jula kwineku ali mkuŵina ni kuŵechetaga kuti,
‘Sauli awuleje masausande gakwe ga adani,
Soni Daudi awuleje masausande gakwe gangaŵalanjika’?”
12 Daudi ŵagaganichisye mnope maloŵega mumtima mwakwe mwamti ŵatandite kumjogopa mnope Mwenye Akisi jwa ku Gatijo. 13 Myoyo jwalakwe ŵalichenjile ni kutanda kutenda yindu mpela jwamasoka pasikati pa ŵanduwo. Jwalakwe jwalembagalembaga pa matanga ga pa yipata soni ŵalulekaga lulowu luli mkwendelela mundewu syakwe. 14 Pambesi pakwe Akisi ŵawusisye ŵamasengo ŵakwe kuti, “Mkumwona kuti mundujo ali jwamasoka, sano ligongo chichi mkwika najo kwa une? 15 Ana unejo ngwete ŵamasoka ŵamnono kuti sachesoni mundu jweleju kuti atendeje yindu yamasoka pameso pangu? Ana mundu jweleju akusosekwa kwinjila m’nyumba jangu?”