Buku Jandanda ja Samuyele
16 Mkupita kwa ndaŵi Yehofa ŵamwusisye Samuyele kuti, “Ana chimŵe mli mkumlilila Sauli mpaka chakachi chitamilecho une namkanile jwalakwe kuŵa mwenye jwa Ayisalayeli? Mtaje mawuta mu msengo wenu ni mnyakuche. Chinamtumisye mmwejo kwa Jese jwa ku Betelehemu ligongo unejo sagwile mwenye pasikati pa ŵanache ŵakwe ŵachalume.” 2 Nambo Samuyele ŵawusisye kuti, “Chiyikomboleche uli kwawula kweleko? Ligongotu Sauli pachagambe kupikana yeleyi, chambulaje.” Yehofa ni ŵajanjile kuti, “Mjigale ng’ombe jamwana paulendowu ni mkajile kuti, ‘Mbiche kuti mbeleche mbopesi kwa Yehofa.’ 3 Mkamŵilanjile Jese kwachimkapelecheje mbopesiko. Kaneko unejo chingamsalile yamkusosekwa kutenda. Chingamsalile mundu jwamkusosekwa kuja kumsagula kuti aŵe mwenye.”
4 Samuyele ŵatesile yaŵamsalile Yehofa. Paŵayiche ku Betelehemu achakulungwakulungwa ŵa mumsindawo ŵatandite kutetemela paŵasimene ni jwalakwe, ni ŵamwusisye kuti, “Ana kwika kwenuku kuli kwamtendele?” 5 Pelepo jwalakwe ŵajanjile kuti, “Elo, kuli kwamtendele. Mbiche kuti mbeleche mbopesi kwa Yehofa. Jemanja wosope mliswejesye soni mlongane ni une kuti tukapeleche mbopesiji.” Kaneko jwalakwe ŵamswejesye Jese yimpepe ni ŵanache ŵakwe ni ŵaŵilanjile jemanjaji kumalo gakupelechela mbopesi. 6 Jemanjaji paŵayikaga soni Samuyele paŵagambile kumwona Eliyabu, jwalakwejo ŵaŵechete kuti, “Nditu mundu aju jwajimi pameso pa Yehofaju ni jwali jwakusagulidwa jwakwe.” 7 Nambo Yehofa ŵamsalile Samuyele kuti, “Mkagamba kulola kusalala kwa jwalakwejo soni ulewu wakwe, pakuŵa une namkanile jwelejo. Ligongo mwakusayiwonela yindu mundu yili yakulekangana ni mwakusayiwonela Mlungu. Pakuŵa mundu akusalola yayikusawoneka ni meso, nambo Yehofa akusalolaga yayili mumtima.” 8 Kaneko Jese ŵamŵilasile Abinadabu ni ŵayiche najo kwa Samuyele, nambo Samuyelejo ŵatite, “Yehofa nganamsagulasoni jweleju.” 9 Pelepo Jese ŵayiche najosoni Shama, nambo Samuyele ŵatite, “Ajusoni Yehofa nganamsagula.” 10 Myoyo Jese ŵayiche nawo kwa Samuyele ŵanache ŵakwe ŵachalume ŵakwana 7, nambo Samuyele, ŵamsalile Jese kuti, “Yehofa pangali jwamsagwile pelepa.”
11 Kaneko Samuyele ŵamwusisye Jese kuti, “Ana ŵanache ŵenu wosope ŵachalume ni ŵeleŵa?” Pelepo Jese ŵajanjile kuti, “Jwamnondi mnope asigele, nganaŵe kwika mpaka apano. Jwalakwe akulisya ngondolo.” Kaneko Samuyele ŵamsalile Jese kuti, “Amtume mundu kuti akamŵilanje, ligongotu ngatutama pasi kuti tulye mpaka ali ayiche jwalakwejo.” 12 Myoyo Jese ŵamtumile mundu kuti akamŵilanje ni ŵayiche najo. Jwalakwejo jwakwete chilu chambone, jwakwete meso gakusalala soni jwaliji jwakuwoneka chenene. Kaneko Yehofa jwatite, “Mnyakuche, mumsagule jwalakweju, pakuti mundu jula ni jweleju.” 13 Pelepo Samuyele ŵajigele msengo wa mawuta ni kumsagula jwalakwejo pameso pa achakulugwe. Kutandila pa lisiku lyelelyo kwawulaga msogolo msimu wa Yehofa watandite kumpa machili Daudi. Panyuma pakwe, Samuyele ŵanyakwiche ni kuwujilaga ku Lama.
14 Sambano msimu wa Yehofa watyosile pa Sauli, soni msimu wakusakala wakutyochela kwa Yehofa watandite kumlagasya jwalakwe. 15 Pelepo ŵakutumichila ŵa Sauli ŵamsalile jwalakwejo kuti, “Alole, msimu wakusakala wakutyochela kwa Mlungu ukwalagasya. 16 Chonde Ambuje ŵetu, ŵalamule ŵakutumichila ŵawo kuti amsosesose mundu jwakumanyilila chenene kwimba chakwimbila changonji. Ndaŵi jilijose jele msimu wakusakala wakutyochela kwa Mlunguwo chiwayichileje wawojo, jwalakwejo chajimbeje chakwimbila changonjicho soni wawojo chapikaneje chenene.” 17 Myoyo Sauli ŵasalile ŵakutumichila ŵakwewo kuti, “Chonde, asosele mundu jwakusajimba chenene ni ayiche najo kwa une.”
18 Pelepo jumo mwa ŵakutumichila ŵakwe ŵatite, “Une ngummanyilila mwanache jwa Jese jwa ku Betelehemu jwakusakombola kwimba chenene. Jwalakwejo ali jwakulimba mtima soni jwakuputa ngondo jwamachili. Jwalakwe ali jwakupakombola kuŵecheta mwalunda, ali jwakusalala soni Yehofa ali ni jwalakwejo.” 19 Kaneko Sauli ŵatumisye ŵamitenga kwa Jese kukumsalila kuti, “Mumtumisye akuno Daudi mwanache jwenu, jwakulisya ngondolojo.” 20 Myoyo Jese ŵakwesisye pa bulu mkate,* libotolo lyalipende lyetaje finyo, soni mbusi jamwana ni ŵamtumisye Daudi kwa Sauli pampepe ni yinduyo. 21 Mwelemu ni mwaŵayichile Daudi kwa Sauli. Kaneko ŵatandite kumtumichila jwalakwe. Sauli ŵamnonyele mnope Daudi soni jwalakwe ŵaŵele jwakumnyakulila yida yakwe yangondo. 22 Kaneko Sauli ŵatumisye utenga kwa Jese wakuti, “Chonde mumkunde Daudi kuti andumichilejepe une, pakuŵa une namnonyele mnope jwalakwe.” 23 Ndaŵi jilijose msimu wakusakala wakutyochela kwa Mlungu pawuyiche pa Sauli, Daudi jwajigalaga chakwimbila changonji chila ni kutanda kumjimbila. Pelepo mtima wa Sauli watamaga mmalo soni jwapikanaga chenene, mwamti msimu wakusakalawo watyokaga pa jwalakwe.