Esala

7 Panyuma pa yindu yeleyi, Esala* ŵawusile kutyochela ku Babulo mundaŵi ja ulamusi wa Mwenye Alitasasita jwa ku Pelesiya. Esala ŵaliji mwanache jwa Selaya. Selaya ŵaliji mwanache jwa Asaliya. Asaliya ŵaliji mwanache jwa Hilikiya. 2 Hilikiya ŵaliji mwanache jwa Salumu. Salumu ŵaliji mwanache jwa Sadoki. Sadoki ŵaliji mwanache jwa Ahitubi. 3 Ahitubi ŵaliji mwanache jwa Amaliya. Amaliya ŵaliji mwanache jwa Asaliya. Asaliya ŵaliji mwanache jwa Melayoti. 4 Melayoti ŵaliji mwanache jwa Selahiya. Selahiya ŵaliji mwanache jwa Usi. Usi ŵaliji mwanache jwa Buki. 5 Buki ŵaliji mwanache jwa Abisuwa. Abisuwa ŵaliji mwanache jwa Pinihasi. Pinihasi ŵaliji mwanache jwa Eliyesala. Eliyesala ŵaliji mwanache jwa Aloni juŵaliji jwakulolela ŵakutaga mbopesi. 6 Esala ŵayiche kutyochela ku Babulo. Jwalakweju ŵaliji mlembi* juŵachimanyililaga chenene* Chilamusi cha Mose chaŵapeleche Yehofa Mlungu jwa Ayisalayeli. Mwenye ŵampele Esala chindu chilichose chaŵaŵendile. Yaliji myoyo ligongo lyakuti mkono wa Yehofa Mlungu jwakwe waliji pa jwalakwejo.

7 Ŵane mwa Ayisalayeli, ŵakutaga mbopesi, Alefi, ŵakwimba, alonda ŵapageti, soni ŵakutumichila ŵa pa nyumba ja Mlungu* ŵapite ku Yelusalemu yimpepe ni Esala m’chaka cha 7 cha ulamusi wa Mwenye Alitasasita. 8 Esala ŵayiche ku Yelusalemu m’mwesi wamsano m’chaka cha 7 cha ulamusi wa Mwenye Alitasasita. 9 Jwalakwe ŵawutandite ulendo wakutyoka ku Babulowu palisiku lyandanda lya mwesi wandanda. Kaneko ŵayiche ku Yelusalemu palisiku lyandanda lya mwesi wamsano. Yeleyitu yakomboleche ligongo lyakuti Mlungu jwakwe jwambone* ŵaliji ni jwalakwejo. 10 Esala ŵakosechelesye mtima wakwe* kuti alijiganye Chilamusi cha Yehofa soni kuti atendeje yayili mu Chilamusicho, nambosoni kuti ŵajiganyeje Ayisalayeli malamusi soni yakulamula ya Mlungu yayili mu Chilamusicho.

11 Sambano Mwenye Alitasasita ŵampele chikalata Esala juŵaliji jwakutaga mbopesi soni mlembi.* Jwalakweju ŵagamanyililaga chenene* malamusi soni yakulamula ya Yehofa yaŵapele Ayisalayeli. M’chikalata chaŵampelecho ŵalembile ayi:

12 * “Une Alitasasita, mwenye jwa mamwenye, ngumlembela mmwejo jwakutaga mbopesi Esala, mlembi* jwa Chilamusi cha Mlungu jwakwinani. Mtendele wejinji uŵe ni mmwejo. Sambano 13 une ndamwile kuti, Myisalayeli jwalijose jwakutama mu ulamusi wangu, pampepe ni ŵakutaga mbopesi ŵawo soni Alefi, jwakusachilila kulongana ni mmwejo ku Yelusalemu mpaka ajawule nawo. 14 Mwenye pampepe ni nduna syawo 7 syakwakamuchisya lunda akumtumisya mmwejo kuti mkawungunye naga Chilamusi cha Mlungu jwenu chachili ni mmwejo* ŵandu akuchikuya ku Yuda soni ku Yelusalemu. 15 Nambosoni mjigale silifa soni golide jwa mwenye soni nduna syawo syakwakamuchisya lunda jwapeleche mwakusaka kwawo kwa Mlungu jwa Ayisalayeli, jwele malo gakwe gakutama gali ku Yelusalemu. 16 Mjigalesoni silifa josope soni golide jwampochele* kutyochela mu chigawo* chosope cha Babulo. Pampepe ni silifa soni golide jweleju, mjigalesoni mituka japeleche ŵandu mwakusaka kwawo kuti jikakamuchisye ku nyumba ja Mlungu jwawo jajili ku Yelusalemu. 17 Pachimkayiche kweleko, mwachitemachitema mbiyasi mkasumile ng’ombe syamkambako, ngondolo syamkambako, ŵanache ŵa ngondolo pampepe ni mbopesi syakwe syambeju soni mbopesi syakwe sya yakumwa. Mkapeleche mbopesi yindu yeleyi pamalo gakupelechela mbopesi ga panyumba ja Mlungu jwenu jajili ku Yelusalemu.

18 “Chilichose chachimkachiwone kuŵa chakuŵajilwa kuchitenda mmwejo soni achalongo achimjenu mkachitende ni silifa soni golide jwakusigalajo. Mkatende yeleyo mwakamulana ni yakusaka ya Mlungu jwenu. 19 Nambosoni yiwiya* yosope yampochele yakamulichisya masengo ku nyumba ja Mlungu jwenu mkayipeleche yiwiyayo kwa Mlungujo ku Yelusalemu. 20 Konjechesya pelepa, pa yindu yine yosope yamkusosekwa kupeleka ku nyumba ja Mlungu jwenu, mkajigaleje mbiya mumsaku wa mwenye ni kusumila yinduyo.

21 “Une Mwenye Alitasasita nalamwile ŵakusunga chipanje wosope ŵa mu chigawo cha Lisi Line lya Lusulo. Jemanjajo nalamwile kuti chilichose chachaŵilasyeje jwakutaga mbopesi Esala jwali mlembi* jwa Chilamusi cha Mlungu jwakwinani mumpeje ndaŵi jijojo. 22 Chinga jwalakwejo chaŵilasye mpakana matalente* 100 ga silifa, tiligu jwakwana milingo 100 ja koli,* finyo jwakwana milulo* 100, soni mawuta gakwana milulo 100, mumpeje yeleyo. Nambosoni mumpe njete mulimose mwachasachile. 23 Chilichose chalamwile Mlungu jwakwinani chakwamba nyumba jakwe mchitendeje ni mtima wosope. Mtende yeleyi ni chakulinga chakuti Mlungu jwakwinanijo akatumbilila ŵandu ŵetu, uneji, soni ŵanache ŵangu. 24 Ngummanyisyasoni jemanja kuti mkakomesyaga msongo ŵakutaga mbopesi, Alefi, ŵakwimba nyimbo, alonda ŵapageti, ŵakutumichila ŵa pa nyumba ja Mlungu,* soni ŵandu ŵakukamula masengo gakutaŵa nyumba ja Mlungu. Mkakomesyaga msongo wine uliwonse chinga pa katundu jwawo, msongo wakusasosekwa kupeleka mundu jwalijose, soni msongo wapamsewu.

25 “Sambano pakwamba ya mmwejo Esala, mwakamulana ni lunda lwamkwete lwakutyochela kwa Mlungu jwenu,* msagule ŵakwelusya magambo soni ŵakwakamuchisya ŵakwelusyawo. Jemanjaji awelusyeje magambo ga ŵandu wosope ŵakusamanyilila Chilamusi cha Mlungu jwenu ŵakutama mu chigawo cha Lisi Line lya Lusulo. Mundu jwangakugamanyilila malamusigo mumjiganye kuti agamanyilile. 26 Mundu jwalijose jwakulepela kukuya Chilamusi cha Mlungu jwenu soni malamusi ga mwenye ndaŵi jijojo mumpeje chilango mundu jwelejo. Chilango chakwe mpaka chiŵe kumwulaga mundujo, kumtopola, kumlipisya, kapena kumtaŵa.”

27 Nguŵenda kuti achimbichikwe Yehofa Mlungu jwa achinangolo ŵetu jwaŵisile nganisyo syelesi mumtima mwa mwenye kuti ajisalalisye nyumba ja Yehofa ku Yelusalemu. 28 Mlungu alosisye une chinonyelo chakulupichika pameso pa mwenye soni pameso pa nduna syakwe syakumkamuchisya lunda pampepe ni nduna syosope sya machili sya mwenyewo. Ligongo lyakuti mkono wa Yehofa Mlungu jwangu waliji pa une, myoyo nalimbile mtima* ni kwasonganganya achalume ŵane ŵakulongolela pasikati pa Ayisalayeli kuti tulongane ku Yelusalemu.