Masalimo
Lipopelo lya Daudi.
17 Wawo Yehofa, apikane kuŵenda kwangu kwakuti andendele yindu mwachilungamo.
Apikanile kulila kwangu kwakuŵenda chikamuchisyo.
Apikanile lipopelo lyangu lyangali chinyengo.
2 Wawo Mlungu, alamule mwachilungamo mmalo mwa une.
Meso gawo galole yindu yayili yambone.
3 Wawojo awungunyisye mtima wangu, atamose chilo awuwungunyisye.
Wawojo aswejesye une.
Pachachiwungunya une, chachisimana kuti nganingola mapulani galigose gakusakala,
Soni kuti pakamwa pangu nganipaŵecheta yakulemwa yiliyose.
4 Chinga ŵandu chatendeje yamtuli,
Nambo mwakamulana ni maloŵe ga wawojo, une ngusaŵambala matala ga ŵandu ŵachiswamba.
5 Angunde kuti njendeje m’matala gawo
Kuti sajo* syangu sikakuŵala.
6 Wawo Mlungu, une ngupolela kwa wawojo ligongo lyakuti chachinjanga.
Atejele liwiwi lyawo pa une.* Apikane maloŵe gangu.
7 Wawo Mkulupusyo jwa ŵandu ŵakusajuŵa ku mkono wawo wamlyo
Pakwatila ŵandu ŵakwajimuchila wawojo,
Alosye chinonyelo chawo chakulupichika m’litala lyambone mnope.
8 Anjenjele une mpela akulichenjela liso lyawo.*
Asise une mu m’bulili wa mapapiko gawo.
9 Anjenjele une kwa ŵakusakala ŵakunjimuchila,
Kwa adani* ŵangu ŵasyungulile une.
10 Jemanjajo ali ŵakumula mtima.
Pakamwa pawo pakusaŵecheta mwakulikwesya.
11 Sambano jemanjaji asyungulile une pampepe ni ŵandu ŵandili nawo.
Akusatulolechesya kuti apate mpata wakutugwichisya pasi.
12 Jwalijose jwa jemanjajo ali mpela lisimba lyakusachilila kupachulanya nyama jalikamwile,
Ali mpela lisimba lyamwana lyalikugwaŵilila nyama.
13 Anyakuche wawo Yehofa kuti asimane ni jwalakwejo soni amgwisye pasi.
Angulupusye ni upanga* wawo kwa jwakusakalajo.
14 Wawo Yehofa, angulupusye ni mkono wawo.
Angulupusye kwa ŵandu ŵa m’chilambochi,* ŵele chakupochela chawo chili mu umi awuno basi,
Ŵandu ŵele wawojo akusiŵapaga yindu yejinji yambone
Soni ŵakusiŵalechela chipanje ŵanache ŵawo ŵajinji.
15 Nambo une, ligongo lya kulungama kwangu, chinjijiwona ngope jawo.
Panjimwiche, ngusaŵa jwakwikutila pakumanyilila kuti wawojo ali ni une.