Masalimo
94 Wawo Yehofa, Mlungu jwakusiŵawuchisya ŵakusakala,
Elo, wawo Mlungu jwakwawuchisya ŵakusakala, alosye uchimbichimbi wawo.
2 Anyakuche, wawo jwakwelusya jwachilambo chapasi.
Ŵawuchisye ŵakulikwesya mwakamulana ni yakusosekwa kupochela.
3 Ana ŵakusakala chapitilisye kusangalala mpaka chakachi, wawo Yehofa?
Ana jemanjaji chapitilisye mpaka chakachi?
4 Jemanjaji akusalangwasika soni kuŵecheta mwakulikwesya.
Wosope ŵakutenda yakusakala akusalilapilila achimsyene.
5 Akusiŵakasanya ŵandu ŵawo, wawo Yehofa,
Soni akusiŵalagasya jemanjajo, ŵali chipanje chawo.
6 Akusiŵawulaga achakongwe ŵamasije soni achalendo,
Nambosoni akusiŵawulaga ŵanache ŵamasije.*
7 Jemanjajo akusaŵecheta kuti, “Ya ngakuyiwona yeleyi.
Mlungu jwa Yakobo ngakumanyilila yayikutendekwayi.”
8 Mpikanichisye ayi, jemanja ŵandu ŵangali lunda.
Jemanja ŵandu ŵakuloŵela, ana chimchilosya chakachi kumanyilila yindu?
9 Ana juŵapanganyisye* liwiwi mpaka alepele kupikana?
Ana juŵapanganyisye liso mpaka alepele kulola?
10 Ana jwele jwakusajijamuka mitundu ja ŵandu mpaka alepele kumjamuka jemanja?
Jwalakwe ni jwakusiŵapa ŵandu lunda.
11 Yehofa akusamanyilila nganisyo sya ŵandu,
Kuti sigambile kuŵa mpela mpweya wapumwile mundu.
12 Jwakusangalala ali mundu jwele wawojo akusamjongolela, wawo Ya,
Mundu jwakusamjiganya wawojo malamusi gawo.
13 Akusatenda yeleyi kuti ampe mtendele pandaŵi ja yakusawusya,
Mpaka pachachawukulila lisimbo ŵakusakala kuti agwile mwelemo.
14 Pakuŵa Yehofa ngasiŵaleka ŵandu ŵakwe,
Kapena kwajasa ŵandu ŵakwe ŵali chipanje chakwe.
15 Pakuŵa ŵandu chachitandilasoni kuwelusidwa mwachilungamo,
Soni ŵandu wosope ŵagoloka mtima chachikuyaga chilungamocho.
16 Ana ŵani ŵachachiyika kuti anjenjele kwa adani* ŵangu?
Ana ŵani ŵachachingamuchisya pakulimbana ni ŵandu ŵakusandendela yakusakala?
17 Yikaŵe kuti Yehofa ngakungamuchisya,
Ngaliji ndili njonasiche kala.*
18 Panaŵechete kuti, “Lusajo* lwangu lukutelesya,”
Chinonyelo chawo chakulupichika chaliji mkungamuchisya, wawo Yehofa.
20 Ana wawojo mpaka atende mkamulano ni ŵakulamulila* ŵachinyengo
Ŵakusakamulichisya masengo malamusi pakutandisya yakusawusya?
21 Jemanjaji akusiŵajimuchila mwangasa ŵandu ŵakulungama
Soni akusagamula kuti mundu jwangalemwa awulajidwe.*
22 Nambo Yehofa chachiŵa malo gangu gambone gakuuŵa.
Mlungu jwangu ali lwala lwangu, malo gangu gakuuŵa.
23 Jwalakwe chachitenda yakuti yitendo yawo yakusakala yawujilile achimsyenepewo.
Jwalakwe chachimalana nawo* mwakwawuchisya yakusakala yawopeyo.
Yehofa Mlungu jwetu chachimalana ni jemanjajo.*