Buku Jaŵili ja Ayimwene
2 Yehofa ali asigele panandi kumjigala Eliya kwawula najo kwinani* kupitila mu mbungo, Eliyajo ni Elisa ŵanyakwiche ku Giligala. 2 Kaneko Eliya ŵamsalile Elisa kuti, “Chonde msigale akuno, ligongo Yehofa andumile kuti njawule ku Beteli.” Nambo Elisa ŵamjanjile jwalakwejo kuti, “Nditu ngulumbila pameso pa Yehofa Mlungu jwaumi soni pameso pa wawojo, une nganaleka.” Myoyo jemanjaji ŵapite ku Beteli yimpepe. 3 Kaneko ŵanache ŵa ŵakulochesya* ku Beteliko ŵayiche kwa Elisa ni kumwusya kuti, “Ana mkumanyilila kuti lelo Yehofa chiŵajigale ambuje ŵenu, mwamti chaleche kumlongolela?” Pelepo jwalakwe ni ŵajanjile kuti, “Elo ngumanyilila kala yeleyo. Mjile jii.”
4 Sambano Eliya ŵamsalile Elisa kuti, “Elisa, chonde msigale akuno, ligongo Yehofa andumile une kuti njawule ku Yeliko.” Nambo jwalakwe ŵajanjile kuti, “Nditu ngulumbila pameso pa Yehofa Mlungu jwaumi soni pameso pa wawojo, une nganaleka.” Myoyo jemanjajo ŵapite ku Yelikoko yimpepe. 5 Kaneko ŵanache ŵa ŵakulochesya ŵaŵaliji ku Yeliko ŵayiche kwa Elisa ni kumwusya kuti, “Ana mkumanyilila kuti lelo Yehofa chiŵajigale ambuje ŵenu, mwamti chaleche kumlongolela?” Pelepo jwalakwe ni ŵajanjile kuti, “Elo ngumanyilila kala yeleyo. Mjile jii.”
6 Sambano Eliya ŵamsalile jwalakwe kuti, “Chonde msigale akuno, ligongo Yehofa andumile kuti njawule ku Yolodani.” Nambo jwalakwe ŵajanjile kuti, “Nditu ngulumbila pameso pa Yehofa Mlungu jwaumi soni pameso pa wawojo, une nganaleka. Myoyo jemanjaji ŵajawile yimpepe. 7 Nambosoni ŵanache ŵa ŵakulochesya ŵakwana 50 ŵajawile yimpepe ni jemanjajo. Jemanjaji ŵajimi ni kulolaga ali chapakutalichila Eliya ni Elisa ali ajimi mungulugulu Lusulo lwa Yolodani. 8 Kaneko Eliya ŵajigele chakuwala chakwe soni ŵachipindile ni kuputa pamesigo mwamti mesigo gagaŵanyiche, gane gapite kumchiji gane kumlyo. Myoyo jemanjaji ŵajombweche pejumu.
9 Jemanjaji paŵagambile komboka lusulolu, Eliya ŵamsalile Elisa kuti, “Mŵende chilichose chamkusaka kuti une namtendele mkanaŵe kunjigala.” Myoyo Elisa ŵajanjile kuti, “Chonde nguŵenda kuti ambe mbali siŵili sya msimu wawo.” 10 Jwalakwe ni ŵajanjile kuti, “Yamŵendileyi yili yakusawusya. Naga chimumbone pachanjigaleje nikuti yeleyi chiyitendekwe. Nambo naga ngamumbona nikuti ngayitendekwa.”
11 Jemanjaji paŵaliji mkwenda ali mkuŵechetana, mwachisisimuchisya ligaleta lyakuŵala mpela moto soni mahachi gakuŵala mpela moto gapitile pasikati pawo ni kwalekanganya, mwamti Eliya ŵakwesile kwinani* ali ajigalidwe ni mbungo. 12 Elisa paŵayiwonaga yeleyi yili mkutendekwa ŵagumilaga kuti, “Baba ŵangu une, baba ŵangu! Alole ligaleta lyangondo lya Isalayeli soni ŵakwela pamahachi gakwe!” Sambano Elisa paŵayiche pakuti ngakumwonasoni Eliya, jwalakwe ŵakamwile yakuwala yakwe ni kuyipapulanya. 13 Panyuma pakwe Elisa ŵajigele chakuwala cha Eliya chachagwile pasi ni kutanda kuwujila. Kaneko ŵajile kwima mungulugulu Lusulo lwa Yolodani. 14 Kaneko jwalakwe ŵajigele chakuwala cha Eliya chachagwile pasi chila ni kugaputa mesi ali mkuŵecheta kuti, “Ali kwapi Yehofa Mlungu jwa Eliya?” Paŵagaputile mesigo gagaŵikangene, gane kwawula kumlyo gane kumchiji, mwamti Elisajo ŵajombweche.
15 Sambano ŵanache ŵa ŵakulochesya ŵa ku Yeliko ŵala paŵam’weni Elisa ali chapakutalichila, ŵaŵechete kuti, “Msimu wawaliji ni Eliya sambano uli pa Elisa.” Myoyo jemanjajo ŵapite kwa Elisa ni kumtindiŵalila mpaka ngope syawo pasi. 16 Jemanjajo ŵamsalile Elisajo kuti, “M’weji ŵakutumichila ŵawo tukwete achalume ŵamachili ŵakwana 50 aŵa. Chonde, mwakunde jemanjaji kuti ajawule akasosesose ambuje ŵenuwo. Komboleka kuti msimu wa Yehofa wanyakwile ni kuja kwaponya mwitumbi kapena m’chitiŵi.” Nambo jwalakwe ŵasalile jemanjajo kuti, “Iyayi mkatumisya jemanjajo.” 17 Nambo jemanjajo ŵamkanganichepe jwalakwe mpaka ŵayiche pakumtesya sooni, mwamti jwalakwe ŵasalile jemanjajo kuti, “Basi ŵatumisye.” Myoyo jemanjajo ŵatumisye achalume 50 ŵala ŵaŵamsosilesosile Eliyajo kwa masiku gatatu nambo nganampata. 18 Panyuma pakwe jemanjajo paŵawusile ŵamsimene Elisa jula ali mkutama ku Yeliko. Myoyo jwalakwe ŵawusisye jemanjajo kuti, “Ana une nganinamsalila jemanja kuti mkajawula?”
19 Pali papite ndaŵi achalume ŵa msindawo ŵamsalile Elisa kuti, “Wawo ambuje ŵetu akulola kuti msindawu uli pamalo gambone, nambo mesi gakwe gali gakusakala soni chilambochi chili changali chajila.”* 20 Pelepo jwalakwe ŵasalile jemanjajo kuti, “Ayiche najo akuno mbale jamwana nambo jiŵe janyuwani soni atajemo njete.” Myoyo jemanjajo ŵayiche najo mbalejo kwa jwalakwe. 21 Kaneko jwalakwe ŵapite pamalo papakopokaga mesigo ni ŵakusulilepo njete jila ni kuŵecheta kuti, “Yehofa aŵechete kuti, ‘Une nagatendekasisye mesiga kuti gaŵe gambone mwamti ngagatendekasyagasoni chiwa kapena kwatendekasya achakongwe kuti akaŵelekaga.’”* 22 Mesigo gapitilisye kuŵa gambone mpaka lelojino, mwakamulana ni maloŵe gaŵaŵechete Elisa gala.
23 Jwalakwe ŵatyosile kweleko ni kwawula ku Beteli. Paŵaliji mwitala anyamata ŵane ŵakopweche mumsindamo ni kutanda kumseka jwalakwe. Jemanjaji ŵaŵechetaga kuti, “Mtyoche akuno mmwe alulasi! Mmwe alulasi, mtyoche akuno!” 24 Pelepo jwalakwe ŵagalawiche ni kwalola anyamatawo. Kaneko ŵatembelele jemanjajo mu lina lya Yehofa. Kaneko yimbalangondo yiŵili yekongwe yakopweche mungalango ni kwakechulanyakechulanya anyamatawo. Yakechulenye anyamata ŵakwana 42. 25 Jwalakwe ŵapitilisye ulendo wakwe ni kuja kwika ku Litumbi lya Kalimeli. Kaneko paŵatyosile kweleko ŵawujile ku Samaliya.