Chikalata Chaŵili Chakwawula kwa Atesalonika
3 Pakumalisya achalongo achimjetu, mpitilisye kutupopelela m’weji kuti maloŵe ga Yehofa gayiche kwa ŵandu ŵajinji soni kuti agapochele mwakugachimbichisya mpela mwamkusatendela jemanja. 2 Mtupopelelejesoni kuti Mlungu atuchenjele kwa ŵandu ŵakogoya soni ŵakusakala, pajatu chikulupi ngachikusaŵa ni ŵandu wosope. 3 Nambo Ambuje ali ŵakulupichika, mwamti chachimlimbisya jemanja soni kumchenjela kwa jwakusakalajo. 4 Nambosoni pakuŵa tuli ŵakwakuya Ambuje, tukukulupilila kuti jemanja mkutendaga yatukusamsalila soni kuti chimpitilisye kutenda myoyo. 5 Nguŵenda kuti Ambuje apitilisye kujilongolela mitima jenu kuti mumnonyeleje Mlungu soni kuti mŵe ŵakupilila pakumtumichila Klistu.
6 Sambano achalongo achimjetu, mu lina lya Ambuje ŵetu Yesu Klistu tukusaka kumsalila yindu yakuti mkuyeje. Mumŵambaleje jwakulupilila jwalijose jwakwenda mwangalondeka soni jwele ngakukuya yimwapochele kutyochela kwa m’weji. 7 Jemanja mkumanyilila yamkusosekwa kutenda kuti mtusyasyeje, ligongo m’weji nganitutenda yindu yangalondeka pasikati penu 8 kapena kulya yakulya ya mundu kwalulele.* Mmalomwakwe twaliji mkukamula masengo gachitukuta musi ni chilo ni chakulinga chakuti tukamsitopesya mwakutulipilila yakusoŵa yetu. 9 Ngaŵaga kuti nganitukola ufulu wakumsalila kuti mtupeje yindu, nambo twatendaga yeleyi kuti tuŵe chisyasyo chakuti mchikuyeje. 10 Sonitu patwaliji ni jemanja twampele lilamusi ali lyakuti, “Mundu jwakukana kukamula masengo akalya.” 11 Pakuŵa tukupikana kuti pasikati penu pana ŵane ŵakwenda mwangalondeka. Jemanjaji ngakukamula masengo nambo akwamba kwinjilila ngani syangaŵandika. 12 Kwa ŵandu ŵelewo tukusaka kwalamula soni kwachondelela m’lina lya Ambuje Yesu Klistu kuti atendeje yawo soni alyeje yakulya yayipatile panyuma pakukamula masengo.
13 Nambo jemanja achalongo achimjetu, mkaleka kutenda yambone. 14 Nambo naga pana mundu jwakukana kupikanila maloŵe getu gatulembile m’chikalatachi, msamale najo* mundu jwelejo soni mleche kusyoŵekana najo ni chakulinga chakuti atende sooni. 15 Nambope mkasimumwona mundu jwelejo mpela mdani jwenu, nambo mpitilisye kumkamuchisya mpela mlongo mjenu.
16 Sambano nguŵenda kuti Ambuje ŵali ŵamtendele ampeje jemanja mtendele ndaŵi syosope m’litala lililyose. Ambuje aŵe ni jemanja wosope.
17 Mpochele moni kutyochela kwa une Paulo wakulemba jika ni mkono wangu. Ndaŵi syosope ngusalemba myiyi mu yikalata yangu yosope, ni chakulinga chakuti jemanja mmanyilile kuti chikalatachi chityochele kwa une.
18 Umbone mtima wekulungwa wa Ambuje ŵetu Yesu Klistu uŵe ni jemanja wosope.