Yoswa
4 Mtundu wosope wa Isalayeli pawagambile kumalisya komboka lusulo lwa Yolodani, Yehofa ŵamsalile Yoswa kuti, 2 “Msagule achalume 12 pasikati pa ŵanduwo, pa mbumba* jilijose mjigale jwamlume jumo. 3 Ni mwasalile kuti, ‘Mkalokote maganga 12 pasikati pa lusulo lwa Yolodani pajimi ŵakutaga mbopesipo. Mkagajigale magangago ni kuja kugaŵika kumalo kwachimkagone.’”
4 Myoyo Yoswa ŵaŵilasile achalume 12 ŵaŵasagwile pasikati pa Ayisalayeli kutyochela mu mbumba jilijose. 5 Kaneko Yoswa ŵasalile jemanjajo kuti, “Mjawule pasogolo pa libokosi lya chilanga lya Yehofa Mlungu jwenu pakatikati pa lusulo lwa Yolodani. Pelepo jwalijose akanyakule liganga limolimo pekoyo pakwe, mwakamulana ni chiŵalanjilo cha mbumba sya Isalayeli. 6 Maganga gelega gachimkumbusyaga yamtendele Mlungu jemanja. Ŵanache ŵenu pachachimwusya kuti, ‘Ana magangaga gachichi?’ 7 Jemanja chimwajanje kuti, ‘Maganga gelega gali chakwakumbusya ŵanache ŵa Isalayeli mpaka kalakala. Yeleyi yili myoyo ligongo lyakuti mesi ga mu lusulo lwa Yolodani gakatiche libokosi lya chilanga lya Yehofa palyajombweche lusulolo.’”
8 Myoyo Ayisalayeli ŵatesile mwakamulana ni muŵalamulile Yoswa. Jemanjaji ŵajigele maganga 12 kutyochela pasikati pa lusulo lwa Yolodani mpela yaŵatite Yehofa pakumlamula Yoswa. Ŵajigele magangago mwakamulana ni chiŵalanjilo cha mbumba sya Isalayeli. Jemanjaji ŵajigele magangago ni ŵapite kuja kugaŵika kumalo kuŵagonile.
9 Nombe najo Yoswa ŵajigele maganga 12 ni ŵagaŵisile pasikati pa lusulo lwa Yolodani pamalo paŵajimi ŵakutaga mbopesi ŵaŵanyakwile libokosi lya chilanga. Mwamti magangago gapalipe mpaka lelo.
10 Ŵakutaga mbopesi ŵaŵanyakwile libokosi lya chilanga ŵala ŵaliji chiŵela chimile pakatikati pa lusulo lwa Yolodani. Ŵajimi papopo mpaka ŵandu wosope ali amalisisye komboka, nambosoni mpaka chili chitendekwe chilichose chele Yehofa ŵamlamwile Yoswa kuti ŵasalile ŵandu kuti achitende. Yoswa ŵamlamwile yosope yeneyi kupitila mwa Mose. 11 Ŵandu wosope ali amalisisye komboka, ŵakutaga mbopesi ŵaŵanyakwile libokosi lya chilanga lya Yehofa ŵajombweche ni libokosilyo ŵanduwo ali mkulola. 12 Mbumba ja Lubeni, mbumba ja Gadi soni hafu ja mbumba ja Manase nombe nawo ŵajombweche nikuŵa pasogolo pa Ayisalayeli ŵanewo ali akosechele kuputa ngondo, mpela yaŵatite Mose pakwalamula jemanjajo. 13 Asilikaliŵa ŵaliji chiŵandika 40,000. Jemanjaji ŵajigele yida ya ngondo ni ŵapite ku chipululu cha Yeliko soni Yehofa ŵaliji ni jemanjaji.
14 Palisiku lyeleli Yehofa ŵamkwesisye Yoswa pameso pa Ayisalayeli wosope. Ŵanduwo ŵatandite kumchimbichisya* mnope Yoswa kwa umi wakwe wosope mpela yaŵatiga pakumchimbichisya Mose.
15 Kaneko Yehofa ŵamsalile Yoswa kuti, 16 “Mwasalile ŵakutaga mbopesi ŵanyakwile libokosi lya Umboni* kuti akopoche mu lusulo lwa Yolodani.” 17 Myoyo Yoswa ŵasalile ŵakutaga mbopesiwo kuti, “Akopoche mu lusulo lwa Yolodanimo.” 18 Pelepo ŵakutaga mbopesi ŵaŵanyakwile libokosi lya chilanga lya Yehofa ŵatyosile pakatikati pa lusulo lwa Yolodani. Sajo syawo pasyagambile kuponda pamkuli, mesi ga mu lusulo lwa Yolodani gatandilesoni kwenda, mwamti gasefuchile kumbali syakwe syosope mpela muyaŵelele pandanda.
19 Ŵanduwo ŵajombweche lusulo lwa Yolodani palisiku lya 10 lya mwesi wandanda. Jemanjaji ŵajile kutaŵa masakasa gawo ku Giligala kumalile ga msinda wa Yeliko ga kungopokolyuŵa.
20 Maganga 12 gaŵagajigele mu lusulo lwa Yolodani gala Yoswa ŵagawunjiche ku Giligala. 21 Kaneko Yoswa ŵasalile Ayisalayeli kuti, “Kusogoloku ŵanache ŵenu pachachawusyaga achibaba ŵawo kuti, ‘Ana magangaga gakugopolela chichi?’ 22 Chimwajanje ŵanache ŵenuwo kuti, ‘Ayisalayeli ŵajombweche lusulo lwa Yolodani pamalo pejumu 23 pandaŵi jele Yehofa Mlungu jwenu ŵajumwisye mesi mu lusulo lwa Yolodani pameso petu mpaka wosope ŵajombweche. Yeleyitu yili yakulandana ni yaŵatesile Yehofa Mlungu jwenu pa Nyasa Jechejewu, paŵajijumwisye nyasajo pameso petu mpaka wosope twajombweche pejumu. 24 Mlungu ŵatesile yeleyi pakusaka kuti ŵandu wosope pachilambo chapasi amanyilile kuti mkono wa Yehofa uli wamachili mnope nambosoni pakusaka kuti jemanja mumjogopeje Yehofa Mlungu jwenu ndaŵi syosope.’”