Yoswa

21 Sambano mitwe ja maŵasa ga mbumba* ja Lefi japite kwa jwakutaga mbopesi Eliyesala, soni Yoswa mwanache jwa Nuni, nambosoni kwa mitwe ja maŵasa ga mbumba sya Isalayeli. 2 Ali ayiche kwa jemanjaji ku Silo m’chilambo cha Kanani, ŵatite, “Yehofa kupitila mwa Mose ŵalamwile kuti m’weji chitupochele misi jakutamamo nambosoni malo gakulichisya yilango yetu.” 3 Myoyo mwakamulana ni yaŵalamwile Yehofa, Ayisalayeli ŵapele Alefiwo misinda soni malo gawo gakulichisya yilango kutyochela pa malo gaŵapochele jemanjajo mpela chipanje chawo.

4 Paŵatesile kalotalota* jwandanda jwagwilile maŵasa ga Kohati. Myoyo Alefi ŵaŵaliji yisukulu ya jwakutaga mbopesi Aloni ŵapochele misinda 13 kutyochela pa malo gajapochele mbumba ja Yuda, mbumba ja Simiyoni nambosoni mbumba ja Benjamini. Misindaji ŵapochele mwakutenda kalotalota.

5 Kaneko maŵasa gane gagasigele ga Kohati gapochele misinda 10 kutyochela pa malo gajapochele mbumba ja Efulayimu, mbumba ja Dani, nambosoni hafu ja mbumba ja Manase. Jemanjaji ŵapochele maloga mwakutenda kalotalota.

6 Ŵanache ŵa Gelisoni ŵapochele misinda 13 kutyochela pa malo gajapochele mbumba ja Isakala, mbumba ja Aseli, mbumba ja Nafitali, nambosoni hafu ja mbumba ja Manase ku Basana. Jemanjaji ŵapochele maloga mwakutenda kalotalota.

7 Ŵanache ŵa Melali ŵapochele misinda 12 mwakamulana ni maŵasa gawo. Ŵapele misindaji kutyochela pa malo gajapochele mbumba ja Lubeni, mbumba ja Gadi, nambosoni mbumba ja Sebuloni.

8 Myoyo, mwakamulana ni yaŵalamwile Yehofa kupitila mwa Mose, Ayisalayeli ŵapele Alefi misinda jeleji nambosoni malo gawo gakulichisya yilango mwakutenda kalotalota.

9 Ŵajigelesoni misinda jine kutyochela pa malo gajapochele mbumba ja Yuda soni mbumba ja Simiyoni, 10 ni ŵajipeleche kwa yisukulu ya Aloni yayaliji yakutyochela m’liŵasa lya Kohati mu mbumba ja Lefi. Yaliji myoyo ligongo lyakuti kalotalota jwandanda jwagwilile jemanjaji. 11 Jemanjaji ŵapele msinda wa Kiliyati-aliba, wawuli Hebuloni. Aliba ŵaliji baba ŵawo Anaki. Msinda welewu waliji mu dela jamatumbi ja malo ga mbumba ja Yuda. Ŵapele msindawu pampepe ni malo gakwe gakulichisya yilango mwakusyungulila msindawu. 12 Nambo migunda ja mumsindamu soni misi jakuŵandikana najo ŵajipeleche kwa Kalebe mwanache jwa Yefune mpela chipanje chakwe.

13 Yisukulu ya jwakutaga mbopesi Aloni ŵayipele msinda wakutilila mundu jwawuleje mjakwe wa Hebuloni pampepe ni malo gakwe gakulichisya yilango. Nambosoni ŵapele misinda jakuyichisyaji: Msinda wa Libina pampepe ni malo gakwe gakulichisya yilango, 14 msinda wa Yatili pampepe ni malo gakwe gakulichisya yilango, Esitemowa pampepe ni malo gakwe gakulichisya yilango, 15 Holoni pampepe ni malo gakwe gakulichisya yilango, Debili pampepe ni malo gakwe gakulichisya yilango, 16 Aini pampepe ni malo gakwe gakulichisya yilango, Yuta pampepe ni malo gakwe gakulichisya yilango, nambosoni msinda wa Beti-semesi pampepe ni malo gakwe gakulichisya yilango. Misinda jeleji japali 9 soni jatyochele pasikati pa malo ga mbumba siŵili sya Isalayeli, mbumba ja Yuda soni mbumba ja Simiyoni.

17 Kutyochela pa mbumba ja Benjamini, ŵapochele misinda jakuyichisyaji: Msinda wa Gibiyoni pampepe ni malo gakwe gakulichisya yilango, Geba pampepe ni malo gakwe gakulichisya yilango, 18 Anatoti pampepe ni malo gakwe gakulichisya yilango, soni msinda wa Alimoni pampepe ni malo gakwe gakulichisya yilango. Misinda jeleji japali mcheche.

19 Misinda josope jayapochele yisukulu ya Aloni jwakutaga mbopesi japali misinda 13 pampepe ni malo gakwe gakulichisya yilango.

20 Nambo ŵane ŵaŵasigele ŵa m’liŵasa lya Kohati ŵa mu mbumba ja Lefi ŵapochele misinda kutyochela pa malo ga mbumba ja Efulayimu mwakutenda kalotalota. 21 Jemanjaji ŵapele msinda wakutilila mundu jwawuleje mjakwe wa Sekemu pampepe ni malo gakwe gakulichisya yilango ga mu dela jamatumbi ja Efulayimu. Nambosoni ŵapele misinda jakuyichisyaji: Msinda wa Geseli pampepe ni malo gakwe gakulichisya yilango, 22 Kibusaimu pampepe ni malo gakwe gakulichisiya yilango, nambosoni msinda wa Beti-holoni pampepe ni malo gakwe gakulichisya yilango. Misinda jeleji japali mcheche.

23 Kutyochela pa malo ga mbumba ja Dani ŵapele misinda jakuyichisyaji: Msinda wa Eliteke pampepe ni malo gakwe gakulichisya yilango, Gibitoni pampepe ni malo gakwe gakulichisya yilango, 24 Aijaloni pampepe ni malo gakwe gakulichisya yilango, nambosoni msinda wa Gati-limoni pampepe ni malo gakwe gakulichisya yilango. Misinda jeleji japali mcheche.

25 Kutyochela pa malo ga hafu ja mbumba ja Manase ŵapele misinda aji: Msinda wa Taanaki pampepe ni malo gakwe gakulichisya yilango, nambosoni msinda wa Gati-limoni pampepe ni malo gakwe gakulichisya yilango. Misinda jeleji japali jiŵili.

26 Misinda josope pampepe, nambosoni malo gakwe gakulichisya yilango jaŵapochele ŵane ŵakusigala ŵa m’liŵasa lya Kohati, japali 10.

27 Kutyochela pa malo ga hafu ja mbumba ja Manase, ŵanache ŵa Gelisoni ŵa m’liŵasa lya Lefi ŵapochele msinda wakutilila mundu jwawuleje mjakwe wa Golani wawuli mu dela ja Basana, pampepe ni malo gakwe gakulichisya yilango nambosoni msinda wa Beesitela pampepe ni malo gakwe gakulichisya yilango. Misinda jeleji japali jiŵili.

28 Kutyochela pa malo ga mbumba ja Isakala, ŵapochele misinda aji: Msinda wa Kisiyoni pampepe ni malo gakwe gakulichisya yilango, wa Dabelati pampepe ni malo gakwe gakulichisya yilango, 29 Yalimuti pampepe ni malo gakwe gakulichisya yilango, nambosoni msinda wa Eni-ganimu pampepe ni malo gakwe gakulichisya yilango. Misinda jeleji japali mcheche.

30 Kutyochela pa malo ga mbumba ja Aseli ŵapochele misinda aji: Msinda wa Misali pampepe ni malo gakwe gakulichisya yilango, Abidoni pampepe ni malo gakwe gakulichisya yilango, 31 Helikati pampepe ni malo gakwe gakulichisya yilango, nambosoni msinda wa Lehobu pampepe ni malo gakwe gakulichisya yilango. Misinda jeleji japali mcheche.

32 Kutyochela pa malo ga mbumba ja Nafitali ŵapele msinda wakutilila mundu jwawuleje mjakwe wa Kedesi wawuli mu dela ja Galileya pampepe ni malo gakwe gakulichisya yilango. Ŵapelesoni msinda wa Hamoti-doli pampepe ni malo gakwe gakulichisya yilango, nambosoni msinda wa Kalitani pampepe ni malo gakwe gakulichisya yilango. Misinda jeleji japali jitatu.

33 Misinda josope jaŵapochele ŵanache ŵa Gelisoni mwakamulana ni maŵasa gawo jaliji 13 pampepe ni malo gakwe gakulichisya yilango.

34 Ŵanache ŵa Melali ŵa mu mbumba ja Lefi ŵapochele misinda kutyochela pa malo ga mbumba ja Sebuloni. Misinda jakwe ni aji: Msinda wa Yokineyamu pampepe ni malo gakwe gakulichisya yilango, Kalita pampepe ni malo gakwe gakulichisya yilango, 35 Dimina pampepe ni malo gakwe gakulichisya yilango, nambosoni msinda wa Nahalali pampepe ni malo gakwe gakulichisya yilango. Misinda jeleji japali mcheche.

36 Kutyochela pa malo ga mbumba ja Lubeni ŵapochele misinda aji: Msinda wa Beseli pampepe ni malo gakwe gakulichisya yilango, Yahasi pampepe ni malo gakwe gakulichisya yilango, 37 Kedemoti pampepe ni malo gakwe gakulichisya yilango, nambosoni msinda wa Mefaati pampepe ni malo gakwe gakulichisya yilango. Misinda jeleji japali mcheche.

38 Kutyochela pa malo ga mbumba ja Gadi ŵapochele msinda wakutilila mundu jwawuleje mjakwe wa Lamoti ku Giliyadi pampepe ni malo gakwe gakulichisya yilango. Ŵapochelesoni msinda wa Mahanaimu pampepe ni malo gakwe gakulichisya yilango, 39 Hesiboni pampepe ni malo gakwe gakulichisya yilango, nambosoni msinda wa Yaseli pampepe ni malo gakwe gakulichisya yilango. Misinda jeleji japali mcheche.

40 Misinda josope jiŵapochele ŵanache ŵa Melali ŵa mu mbumba ja Lefi mwakamulana ni maŵasa gawo japali 12.

41 Misinda josope jajapochele mbumba ja Lefi pasikati pa malo ga Ayisalayeli, japali misinda 48 pampepe ni malo gakwe gakulichisya yilango. 42 Msinda uliwose mwa misindaji wakwete malo gakulichisya yilango kusyungulila msinda wosopewo. Mwelemu ni mwayaŵelele ni misinda josope.

43 Yehofa ŵapele Ayisalayeli chilambo chosope mpela muŵalumbilile kwa achinangolo ŵawo. Myoyo jemanjajo ŵajigele chilambocho ni kutanda kutamamo. 44 Konjechesya pelepa, Yehofa ŵakundile kuti jemanjajo atameje mwamtendele m’chilambomo mpela muŵalumbilile kwa achinangolo ŵawo, mwamti adani ŵawo wosope pangali atamose jumo juŵalimbile mtima kulimbana ni jemanjaji. Nambosoni Yehofa ŵapeleche adani ŵawo wosope mmyala mwawo. 45 Payindu yosope yambone yaŵasasile Yehofa kuti chachatendela Ayisalayeli, pangali chindu atamose chimo chele nganichitendekwa, yosope yakwanilichikwe.