Ekisodo
13 Yehofa ŵapitilisye kuŵecheta ni Mose kuti, 2 “Mpeleche kwa une ŵanache wosope ŵachalume ŵandanda kupagwa pasikati pa Ayisalayeli. Mwanache jwalijose jwamlume jwandanda kupagwa chinga aŵe jwa mundu, chinga jwa chinyama, ali jwangu.”
3 Pelepo Mose ŵasalile ŵanduwo kuti, “Mkusosekwa mlikumbuchileje lisiku lyalelo, lisiku lyamwakopweche m’chilambo cha Iguputo, kutyoka m’nyumba ja ukapolo, ligongo Yehofa ŵamkopwesye jemanja m’chilambo chelechi ni mkono wakwe wamachili. Myoyo ngamkusosekwa kulya chindu chilichose chachikwete yakusasaŵisya. 4 Jemanja mkukopoka lelo m’mwesi wa Abibu.* 5 Yehofa pachachimjinjisya jemanja m’chilambo cha Akanani, Ahiti, Aamoli, Ahifi soni Ayebusi, chilambo chaŵalumbilile achinangolo ŵenu kuti chachapa, chilambo chakwenda mkaka ni uchi, mkusosekwa mkatendeje mwambo welewu mwesi wakwe awuno. 6 Mkusosekwa mkalyeje mikate* jangali yakusasaŵisya kwa masiku 7, soni palisiku lya 7 lyelelyo mkatendeje chisangalalo pakulosya kumchimbichisya Yehofa. 7 Mkusosekwa mkalyeje mikate jangali yakusasaŵisya kwa masiku 7, soni chindu chilichose chakola yakusasaŵisya chikaja kusimanikwa ni jemanja soni mtanda wakola yakusasaŵisya ukaja kusimanikwa palipose m’chilambo chenu. 8 Soni chimumsalile mwanache jwenu palisiku lyelelyo kuti, ‘Ngutenda yeleyi ligongo lya yindu yaŵandendele Yehofa pandaŵi jiŵangoposyaga m’chilambo cha Iguputo.’ 9 Myoyo chisangalalo chelechi chichiŵa mpela chimanyisyo chakulembedwa pamkono wenu soni pausyo penu, soni chichimkumbusya jemanja kuti mŵecheteje ya chilamusi cha Yehofa. Nambosoni chichimkumbusya kuti Yehofa ni juŵamkulupwisye jemanja ni mkono wakwe wamachili kutyoka m’chilambo cha Iguputo. 10 Mkusosekwa msunjeje lilamusili chaka chilichose, ni kutendaga mwambo welewu pandaŵi jakwe jajitamilikasisye.
11 “Yehofa pachachimjinjisya m’chilambo cha Akanani, chele ŵalumbilile kuti chachimpa jemanja soni achinangolo ŵenu, 12 chimchisosekwa kupeleka kwa Yehofa mwanache jwamlume jwalijose jwandanda kupagwa. Chimchisosekwasoni kupeleka mwanache jwamlume jwalijose jwandanda kupagwa jwa yilango yimkwete. Chachilume chilichose chili cha Yehofa. 13 Mwanache jwa bulu jwalijose jwandanda kupagwa mkusosekwa mumwomboleje ni ngondolo, nambo naga mkulepela kumwombola mkusosekwa mumwulajeje mwakumposokola lukosi. Nambosoni mwanache jwenu jwamlume jwalijose jwandanda kupagwa mkusosekwa mumwomboleje.
14 “Naga msogolo mwanache jwenu akumwusya kuti, ‘Ana yamkutendayi yikugopolela chichi?’ Pelepo jemanja chimumjanje jwalakwejo kuti, ‘Yehofa ŵatukopwesye m’chilambo cha Iguputo ni mkono wakwe wamachili soni ŵatutyosisye m’nyumba ja ukapolo. 15 Nambo Falawo paŵajumwisye mtima wakwe ni kukana yakuti m’weji tutyoche, Yehofa ŵawuleje mwanache jwalijose jwandanda kupagwa m’chilambo cha Iguputo, kutandila ni ŵanache ŵandanda kupagwa ŵa ŵandu mpaka ŵanache ŵandanda kupagwa ŵa yinyama. Ni ligongo lyakwe tukwapeleka mbopesi kwa Yehofa ŵanache wosope ŵachalume ŵandanda kupagwa, soni tukusamwombola mwanache jwetu jwalijose jwamlume jwandanda kupagwa. 16 Mwambo welewu uŵe mpela chimanyisyo pamkono wenu soni uŵe mpela chakutaŵa pausyo penu, pakuŵa Yehofa ŵatukopwesye m’chilambo cha Iguputo ni mkono wakwe wamachili.”
17 Sambano Falawo paŵakundile ŵanduwo kutyoka, Mlungu nganakunda kuti jemanjaji apitile m’chilambo cha Afilisiti atamose kuti lyaliji litala lyakata, pakuŵa Mlungujo jwatite, “Ŵanduŵa mpaka atenguche pachasimane ni ngondo ni kuwujila ku Iguputo.” 18 Myoyo Mlungu ŵatendekasisye ŵanduwo kuti apitile litala lyakupita m’chipululu chachaliji chiŵandika Nyasa Jechejewu. Ayisalayeliwo paŵatyokaga m’chilambo cha Iguputo ŵajendaga mpela gulu jakosechela kuputa ngondo. 19 Mose ŵajigelesoni mawupa ga Yosefe paulendowu pakuŵa Yosefe ŵalumbilikasisye ŵanache ŵa Isalayeli pakwasalila kuti, “Mlungu ngasalepela kumkumbuchila jemanja, myoyo chimjigale mawupa gangu pakutyoka akuno.” 20 Myoyo jemanjaji ŵatyosile ku Sukoti ni kuja kukunga matenti gawo ku Etamu mumbali mwa chipululu.
21 Sambano Yehofa ŵaliji mkwenda pasogolo pa jemanjaji musi mu liwunde lyakwima mpela chipilala pakwalongolela jemanjaji litala, soni chilo jwalakwe ŵaliji mkwalongolela jemanjaji m’moto wakwima mpela chipilala kuti ŵamulichileje. Ŵatendaga yeleyi ni chakulinga chakuti jemanjaji ajendeje musi ni chilo chakwe. 22 Myoyo liwunde lyakwima mpela chipilalalyo nganilityokaga pasogolo pa ŵanduwo musi, soni chilo moto wakwima mpela chipilalawo nganiwutyokaga.