Lefitiko

8 Yehofa ŵapitilisye kuŵecheta ni Mose kuti, 2 “Mumjigale Aloni pampepe ni ŵanache ŵakwe ŵachalume soni yakuwala yawo yakamulila masengo, mawuta gakamulichisya masengo pakwasagula ŵakutaga mbopesi, ng’ombe jamkambako jambopesi jaulemwa, ngondolo siŵili syamkambako nambosoni lukalala* lwa mikate* jangali yakusasaŵisya. 3 Kaneko mwasonganganye pampepe Ayisalayeli wosope kumlango wakwinjilila ku chitenti chakusimanilana.”

4 Mose ŵatesile yaŵamlamwile Yehofayo mwamti Ayisalayeli wosope ŵasongene pampepe kumlango wakwinjilila ku chitenti chakusimanilana. 5 Sambano Mose ŵasalile ŵanduwo kuti, “Ayi ni yatulamwile Yehofa kuti tutendeje.” 6 Myoyo Mose ŵayiche najo Aloni pakuŵandika pampepe ni ŵanache ŵakwe ni kwajojesya* ni mesi. 7 Kaneko ŵajigele mkanjo ni kum’wecha Aloni soni ŵamtaŵile lamba jwa mkanjowo. Jwalakwe ŵam’wechichesoni malaja gangali makono nambosoni ŵam’wechiche chakuwala cha efodi ni ŵachitaŵile chakuwala cha efodicho ni lamba jwakwe. Lambajo ŵajitaŵile mwamachili. 8 Kaneko ŵam’wechiche chakuwala cha pamtima soni ŵaŵisile Ulimu ni Tumimu mu chakuwala cha pamtimacho. 9 Panyuma pakwe, ŵamtaŵile nduŵila mumtwe mwakwe. Pasogolo pa nduŵilajo ŵaŵisile kachisyano kakunyesima ka golide. Kachisyanoka kaliji chimanyisyo cheswela chakulosya kulipeleka. Mose ŵatesile yeleyi mwakamulana ni yaŵamlamwile Yehofa.

10 Kaneko Mose ŵajigele mawuta gakwasagulila ŵakutaga mbopesi ni kupaka chitenti cha Mlungu nambosoni yosope yayaliji mkati mwakwe. Pelepo yosope yeneyo yaŵele yeswela. 11 Panyuma pakwe, jwalakwe ŵamisile gane mwa mawutago pamalo gakupelechela mbopesi kwa maulendo 7. Ŵapachilesoni mawutago pa yiwiya* yakwe yosope nambosoni pa libeseni ni chakutamichila chakwe. Ŵatesile yeleyi ni chakulinga chakuti yindu yeleyo yiŵe yeswela. 12 Pambesi pakwe, ŵajigele gane mwa mawutago ni kugataga pamtwe wa Aloni ni chakulinga chakuti amsagule soni kumswejesya.

13 Kaneko Mose ŵayiche nawo ŵanache ŵa Aloni pakuŵandika ni kwawecha mikanjo. Jwalijose ŵamtaŵilesoni lamba jwa mkanjowo. Nambosoni ŵam’wechiche mpango wetaŵe mpela chisoti. Mose ŵatesile yeleyi mwakamulana ni yaŵamlamwile Yehofa.

14 Panyuma pakwe, jwalakwe ŵajigele ng’ombe jamkambako ja mbopesi jaulemwa jila. Kaneko Aloni ni ŵanache ŵakwe ŵasajiche makono gawo pamtwe wa ng’ombe ja mbopesi jaulemwajo. 15 Mose ŵajisikite ng’ombejo ni kujigala myasi jakwe. Jwalakwe ŵachuyiye chala chakwe m’myasimo ni kujipaka pamisengo jajaliji mumbali mwa malo gakupelechela mbopesi. Pelepo jwalakwe ŵagaswejesye* malo gakupelechela mbopesigo. Nambo myasi josope jakusigalajo ŵajijitile pasi mumbali mwa malo gakupelechela mbopesi. Ŵatesile yeleyi ni chakulinga chakuti agaswejesye malogo kuti apelechelejepo mbopesi syakusimasya ulemwa. 16 Panyuma pakwe, jwalakwe ŵajigele mawuta gosope gagagumbilile matumbo, mawuta gagagumbilile litoga nambosoni mbyo siŵili pampepe ni mawuta gagagumbilile mbyosyo. Kaneko Mose ŵajochiche yindu yeleyi pamoto pamalo gakupelechela mbopesi kuti yikoposyeje lyosi. 17 Pambesi pakwe, jwalakwe ŵajigele nyama josope jakusigala ja ng’ombe jamkambakojo, lipende lyakwe nambosoni ndoŵe syakwe ni ŵajile kuyijocha pamoto kusa kwa malo gaŵakunjile matenti. Mose ŵatesile yeleyi mwakamulana ni yaŵamlamwile Yehofa.

18 Sambano jwalakwe ŵajigele ngondolo jamkambako ja mbopesi jakutinisya ni kwika najo pakuŵandika. Kaneko Aloni ni ŵanache ŵakwe ŵasajiche makono gawo pamtwe wa ngondolojo. 19 Panyuma pakwe, Mose ŵajisikite ngondolojo ni ŵajigele myasi jakwe ni kujimisila mumbali mosope mwa malo gakupelechela mbopesi. 20 Jwalakwe ŵajikatenye ngondolojo mapisimapisi. Kaneko ŵajigele mtwe wa ngondolojo, mapisigo nambosoni mawuta* ni kuyijocha yosope yeneyi pamoto kuti yikoposyeje lyosi. 21 Jwalakwe ŵajigele matumbo nambosoni ngongolo syakwe ni ŵayichapile ni mesi. Mose ŵajijochiche nyama ja ngondolo josope jenejo pamoto pamalo gakupelechela mbopesi kuti jikoposyeje lyosi. Jeleji jaliji mbopesi jakutinisya ja kaliwungo kambone kakusangalasya.* Mbopesi jeleji jaliji jakocha pamoto jakwawula kwa Yehofa. Mose ŵatesile yeleyi mwakamulana ni yaŵamlamwile Yehofa.

22 Kaneko jwalakwe ŵajigele ngondolo jamkambako jaŵili jila. Ngondolo jeleji jaliji jakuti ajipeleche pakusagula ŵakutaga mbopesi. Sambano Aloni pampepe ni ŵanache ŵakwe ŵasajiche makono gawo pamtwe wa ngondolojo. 23 Mose ŵajisikite ngondolojo ni ŵajigele jine mwa myasi jakwe ni kujipaka paliwiwi lyakumlyo lya Aloni. Ŵampachilesoni jine mwa myasijo pachala chakwe chachikongo chamkono wamlyo nambosoni pachala chakwe chachikongo cha lusajo lwakumlyo. 24 Kaneko Mose ŵajigele ŵanache ŵa Aloni ni kwika nawo pasogolo. Jwalakwe ŵapachilesoni jemanjaji jine mwa myasijo pamawiwi gawo gakumlyo. Ŵapachilesoni myasijo payala yawo yachikongo ya mkono wamlyo nambosoni payala yawo yachikongo ya lusajo lwakumlyo. Myasi jine josope jakusigala Mose ŵajijigele ni kujimisila mumbali mosope mwa malo gakupelechela mbopesi.

25 Kaneko jwalakwe ŵajigele mawuta gosope ga ngondolojo. Mawuta gakwe galiji: mawuta gosope gamchila wakwe, mawuta gosope gagagumbilile matumbo, soni mawuta gagagumbilile litoga. Ŵajigelesoni mbyo siŵili pampepe ni mawuta gagagumbilile mbyosyo nambosoni lukongolo lwakumlyo lwakunyuma. 26 Kaneko jwalakwe ŵajigele lukalala lwa mikate jangali yakusasaŵisya lwalwaliji pameso pa Yehofa. Mwelemo ŵajigele mkate umo wangali yakusasaŵisya wesyungulile wepowole katikati soni mkate umo wesyungulile wepowole katikati wetaje mawuta nambosoni mkate umo wepwapwatiche. Kaneko jwalakwe ŵajigele yosope yeneyi ni kuyiŵika papaliji mawuta nambosoni lukongolo lwakumlyo lula. 27 Panyuma pakwe, ŵayiŵisile yosope yeneyi mmyala mwa Aloni. Kaneko ŵayikwesisye mwinani ni kutanda kuyiyuya aku nakuku pameso pa Yehofa mpela mbopesi jakuyuya. Ŵatesilesoni yeleyi ni ŵanache ŵakwe wosope ŵala. 28 Kaneko Mose ŵayijigele yeleyi myala mwawo ni kuyijocha pamoto pamalo gakupelechela mbopesi kuti yikoposyeje lyosi. Ŵayijochele yindu yeleyi penani pa mbopesi jakutinisya jajaliji kala pamoto. Jeleji jaliji mbopesi ja kaliwungo kambone kakusangalasya* jakupeleka pakwasagula ŵakutaga mbopesi. Mbopesi jeleji jaliji jakocha pamoto jakwawula kwa Yehofa.

29 Kaneko Mose ŵajigele chidali cha ngondolo jakupeleka pakwasagula ŵakutaga mbopesi ni ŵachikwesisye mwinani ni kutanda kuchiyuya aku nakuku pameso pa Yehofa mpela mbopesi jakuyuya. Pambesi pakwe, Mose ŵajigele chidalicho mpela mbali jakwe jakupochela kutyochela pambopesijo. Mose ŵatesile yeleyi mwakamulana ni yaŵamlamwile Yehofa.

30 Panyuma pakwe, Mose ŵajigele gane mwa mawuta gala nambosoni jine mwa myasi jajaliji pamalo gakupelechela mbopesi ni kummisila yeleyi Aloni soni pa yakuwala yakwe. Ŵamisilesoni mawuta soni myasijo pa ŵanache ŵa Aloni soni pa yakuwala yawo. Mwakutenda yeleyi jwalakwe ŵamswejesye Aloni soni yakuwala yakwe nambosoni ŵanache ŵakwe soni yakuwala yawo.

31 Kaneko Mose ŵamsalile Aloni ni ŵanache ŵakwe kuti, “Nyama jakusigalaji mjitelechele kumlango wakwinjilila ku chitenti. Kaneko nyamajo mlile kukoko pampepe ni mikate jajili mu lukalala,* pakuŵa Mlungu ŵandamwile kuti Aloni ni ŵanache ŵakwe alye yindu yeleyi. 32 Nyama soni mikate yachiyisigale pelepo ayitinisye pamoto. 33 Mkakopoka pamlango wa chitenti chakusimanilana mpaka gali gamasile masiku 7 gakumsagulila jemanja kuŵa ŵakutaga mbopesi, pakuŵa pakusosekwa pamale masiku 7 kuti mwambo wosope wakumsagula kuŵa ŵakutaga mbopesi umale. 34 Yehofa ŵatulamwile kuti tutende yatutesile leloyi kuti yisimasye ulemwa wa jemanja. 35 Mtame mwakuŵandikana ni mlango wa chitenti chakusimanilana kwa masiku 7 musi ni chilo soni mlolechesye kuti mkutenda yosope yamlamwile Yehofa, kuti mkawa, pakuŵa yeleyi ni yaŵandamwile.”

36 Aloni soni ŵanache ŵakwe ŵatesile yosope yaŵalamwile Yehofa kupitila mwa Mose.