Numeli

6 Yehofa ŵaŵechetesoni ni Mose kuti, 2 “Mŵechete ni Ayisalayeli. Mwasalile jemanjajo kuti, ‘Naga jwamlume kapena jwamkongwe atesile chilanga chapadela chakulipeleka kwa Yehofa kuti aŵe Mnasili,* 3 jwalakwe akamwaga finyo nambosoni yakumwa yiliyose yampaka yimtendekasye kukolelwa. Ngakusosekwa kumwa finyo jwakujulujusya kapena yakumwa yiliyose yakujulujusya yampaka yimtendekasye kukolelwa. Ngakusosekwasoni kumwa yakumwa yakupanganya kutyochela ku yisogosi ya mipeleya. Nambosoni akalyaga yisogosi ya mipeleya, chinga yeŵisi kapena yejumu. 4 Pandaŵi josope jichaŵe Mnasili, jwalakwe ngakusosekwa kulya yakulya yiliyose yakupanganya kutyochela ku yisogosi ya mipeleya nambosoni yisogosi yangajiwula ya mipeleya kapena makoŵa gakwe.

5 “‘Pandaŵi josope jichaŵe Mnasili, mwakamulana ni chilanga chiŵatesile, lesala jikapita mumtwe mwakwe.* Jwalakwe chachipitilisya kuŵa jwamswela naga akusileka wumbo syakwe kuti sigambeje kukula mpaka gali gamasile masiku gakwe gaŵatesile chilanga kwa Yehofa chakuŵa Mnasili. 6 Jwalakwe ngakusosekwa kumŵandichila mundu jwam’we pandaŵi josope jichaŵe ali alipeleche kwa Yehofa. 7 Atamose pawile baba ŵawo, mama ŵawo, apwawo kapena akuluŵawo kapenasoni alumbuŵawo, jwalakwe ngakusosekwa kulisakasya. Ngakusosekwa kulisakasya ligongo lyakuti chimanyisyo chakwe chakuti ali Mnasili kwa Mlungu jwakwe chili chiŵela pamtwe pakwe.

8 “‘Pandaŵi josope jali Mnasili mundujo ali jwamswela kwa Yehofa. 9 Nambo naga mwangosi mundu jwine am’wilile pambali pakwe mwamti alisakesye pandaŵi jele chimanyisyo chakuti ali Mnasili kwa Mlungu chili chiŵela pamtwe wakwe, jwalakwe akusosekwa kusenga wumbo syakwe sya mumtwe palisiku lyakwe lyakuliswejesya, lyalili lisiku lya 7. 10 Pa lisiku lya 8, jwalakwe ayicheje kwa jwakutaga mbopesi kumlango wa chitenti chakusimanilana ali ajigele mawunda gaŵili kapena ŵanache ŵaŵili ŵa njuŵa. 11 Kaneko jwakutaga mbopesijo apelecheje chijuni chimocho mpela mbopesi jaulemwa, soni apelecheje chijuni chinecho mpela mbopesi jakutinisya. Jwalakwe atendeje yeleyi kuti asimasye ulemwa wa mundujo wawuyiche ligongo lyakumŵandichila mundu jwam’we. Pelepo jwalakwe aliswejesyeje.* 12 Panyuma pakwe, jwalakwe atandilejesoni kumtumichila Yehofa mpela Mnasili, mwamti ayicheje ni mwanache jwa ngondolo jwamkambako jwangapunda chaka chimo kuti juŵe mbopesi jamagambo. Nambope masiku gakwe gamunyuma paŵaliji Mnasili ngasagaŵalanjila ligongo lyakuti ŵalisakesye.

13 “‘Sambano lilamusi lyakwamba Mnasili ni ali: Masiku gakwe gakuŵa Mnasili pagamasile, jwalakwe ayicheje kumlango wa chitenti chakusimanilana. 14 Payiche kweleko apelecheje kwa Yehofa mbopesi asi: apelecheje mwanache jwa ngondolo jwamkambako jwangapunda chaka chimo kuti juŵe mbopesi jakutinisya, mwanache jwa ngondolo jwamkolo jwangakwana chaka chimo kuti juŵe mbopesi jaulemwa nambosoni ngondolo jimo jamkambako jangalemala kuti jiŵe mbopesi jamkamulano. 15 Apelechejesoni lukalala* lwa mikate* jangali yakusasaŵisya jesyungulile jepowole katikati jepanganye ni utandi wetililiche wewanganye ni mawuta, mikate jepwapwatiche jepache mawuta nambosoni mbopesi jambeju pampepe ni mbopesi jachakumwa. 16 Jwakutaga mbopesi ayicheje nayo yindu yosope yeneyi pameso pa Yehofa. Kaneko apelecheje kwa Mlungu mbopesi jaulemwa nambosoni mbopesi jakutinisyajo. 17 Jwalakwe apelecheje kwa Yehofa ngondolo jamkambako ja mbopesi jamkamulano pampepe ni lukalala lwa mikate jangali yakusasaŵisya. Pakupeleka yindu yeleyi, apelechejesoni mbopesi jambeju pampepe ni mbopesi jachakumwa.

18 “‘Kaneko Mnasili jula asenjeje wumbo syakwe siŵasungaga sila. Wumbosyo asenjeleje kumlango wa chitenti chakusimanilana. Pasenjile wumbo syakwe syasyaliji chimanyisyo chakuti ali Mnasili, ajigaleje wumbosyo ni kusiponya pamoto wawuli pasi pa mbopesi jamkamulano. 19 Kaneko jwakutaga mbopesi ajigaleje lukongolo lwakusogolo lwa ngondolo jamkambako lwagambile kutokotesya. Ajigalejesoni mu lukalala mula mkate umo wangali yakusasaŵisya wesyungulile wepowole katikati soni mkate umo wepwapwatiche wangali yakusasaŵisya. Ajigaleje yindu yosope yeneyi ni kuyiŵika mmyala mwa Mnasilijo panyuma pakuti asenjile wumbo syakwe syasyaliji chimanyisyo chakuti ali Mnasili. 20 Panyuma pakwe, jwakutaga mbopesijo ayikwesyeje yinduyo mwinani ni kuyiyuya aku nakuku pameso pa Yehofa mpela mbopesi jakuyuya. Yindu yeleyi yili yeswela, mwamti ayipelecheje kwa jwakutaga mbopesi pampepe ni chidali cha mbopesi jakuyuya soni lukongolo lwakunyuma lwa mbali japadela. Pambesi pakwe, mundu jwali Mnasilijo mpaka amweje finyo.

21 “‘Lilamusi lyakwamba Mnasili jwatesile chilanga nali: jwalakwe naga atesile chilanga chakuti chapeleche mbopesi kwa Yehofa, mbopesi jakwe jangakwayana ni mbopesi syakusosekwa kupeleka ligongo lyakuti ali Mnasili, jwalakwe akwanilisyeje chilanga chakwecho pakusaka kuchimbichisya lilamusi lyakwamba Unasili wakwe.’”

22 Yehofa ŵamsalilesoni Mose kuti, 23 “Mumsalile Aloni soni ŵanache ŵakwe kuti, ‘Mŵecheteje ayi pakwapa upile Ayisalayeli. Mwasalileje kuti,

24 “Yehofa ampe upile jemanja soni amchenjeleje.

25 Yehofa amlosye umbone mtima jemanja soni amsalalile mtima.

26 Yehofa amtendele yambone jemanja soni ampe mtendele.”’

27 Aloni ni ŵanache ŵakwe alolechesyeje kuti lina lyangu ngalikutyoka pasikati pa Ayisalayeli. Atendeje yeleyi kuti une nape upile Ayisalayeliwo.”