Nyimbo ja Solomoni
1 Nyimbo jakupunda nyimbo syosope,* nyimbo ja Solomoni:
2 “Mungomasye une mwachinonyelo* ni ngomo syenu,
Ligongo yamkusati pakundosya chinonyelo chenu yikusapunda kunong’a kwa finyo.
3 Kununjila kwa mawuta genu kuli kwakusangalasya.
Lina lyenu lili mpela mawuta gakununjila gagakuswile.
Ni ligongo lyakwetu tusikana tukusamnonyela mmwejo.
4 Kwende munjigale. Kwende tutile.
Pakuŵa mwenye anjigalile une mu yipinda yamkati.
Kwende tusangalale yalumo.
Kwende tuchilapilile chinonyelo chamkusalosya kupunda kumlapilila finyo.
Ni ligongo lyakwetu jemanja jila* akusamnonyela mmwejo.
5 Jemanja ŵanache ŵa achakongwe ŵa ku Yelusalemu, unetu ndili jwampiliwu nambo jwakusalala,
Ndili mpela matenti ga ku Kedala soni mpela nguwo sya matenti ga Solomoni.
6 Mkasimundolechesya une ligongo lya upiliwuwu,
Lyelelitu lyuŵa lite kumbilisya.
Achalumbuŵangu ŵandumbilile une,
Jemanjajo ŵambisile une kuti ndoleleje migunda ja mipeleya,*
Mwamti nalepele kuwulolela mgunda wangu wa mipeleya.
7 Musalile mmwe jwangusinamnonyela mnope,
Musalile malo gamkusalichisya yilango yenu.
Ana musi mkusaja kuyigoneka kwapi yilango yenuyo?
Ana mkusaka kuti une mbe mpela jwamkongwe jwaliwunichile mumtwe mwakwe,
Jwali pasikati pa yilango ya achimjenu?
8 “Naga ngamkumanyilila mmwe jwamkongwe jwakusalala mnope pa achakongwe wosope,
Mnyakuche ni mkuyeje mwayipondileje yilango
Soni mkalisyeje tuŵanache twenu twa mbusi chiŵandika ni matenti ga ŵakulisya yilango.”
9 “Mmweji jwakunonyelwa jwangu, unetu ngusinamlandanya mmwejo ni hachi jekongwe jajili pa magaleta* ga Falawo.
10 Majeje genu gakusasalala mnope pam’wete yakulisalalichisya,
Soni lukosi lwenu lukusasalala pam’wete mikufu japenani.
11 Chitumpanganyichisye mmwejo yakulisalalichisya yagolide
Yakola mikufu jasilifa.”
12 “Mwenye patemi patebulo jawo jakusyungulila,
Mawuta gangu gakununjila gakusakoposya kaliwungo kambone.
13 Kwa une jwakunonyelwa jwangu ali mpela kamsaku ka yakununjila ya mule
Kakakusatama pa maŵele gangu chilo chosope.
14 Kwa une jwakunonyelwa jwangu ali mpela liluŵa lya hena*
Lyalili m’migunda ja mipeleya ja ku Eni-gedi.”
15 “Mpikane, mmwe jwakunonyelwa jwangu. Mmwejitu mli ŵakusalala.
Mpikane, mmwejitu mli ŵakusalala mnope. Tumeso twenu tuli mpela tumeso twa njuŵa.”
16 “Mpikane jwakunonyelwa jwangu, mmwejitu mli jwakusalala soni mli jwakusangalasya.
Malo getu gagona gali pamanyasi gakubiliŵitila.
17 Njalamila sya nyumba jetu sili sya yitela ya mkungusa,
Soni mbalaŵala syakwe sili sya yitela ya janipa.