Buku Jaŵili ja Samuyele
6 Daudi ŵasongangenyesoni Asilikali wosope ŵa ku Isalayeli ŵakumanyilila mnope kuputa ngondo ŵakwana 30,000. 2 Kaneko Daudi yimpepe ni achalume wosope ŵaŵaliji ni jwalakwe ŵanyakwiche ni kwawula ku Baale-yuda kuti akajigale Libokosi lya Mlungu jwakuwona lyele ŵandu ŵaŵilanjilagapo lina lya Yehofa jwakulamulila yakwinani, jwele jwakusatama pampando penani* pa akelubi. 3 Jemanjaji ŵalikwesisye Libokosi lya Mlungu jwakuwona lila pa ngolo jasambano kuti alisamisye ku nyumba ja Abinadabu jijaliji petumbi. Usa ni Ahiyo, ŵanache ŵa Abinadabujo, ni ŵaŵajilongolelaga ngolo jasambanojo.
4 Jemanjaji ŵalisamisye libokosi lya Mlungu jwakuwona lila, kulityosya ku nyumba ja Abinadabu jijaliji petumbi, soni Ahiyo jwajendaga pasogolo pa libokosilyo. 5 Daudi soni ŵandu wosope ŵa m’nyumba ja Isalayeli ŵaliji mkusangalala pameso pa Yehofa pakamulichisya masengo yida yakwimbila yakulekanganalekangana yachitela cha janipa, yakwimbila yangonji, yakwimbila yangonji yamtundu wine, tugoma,* michekeche soni yakwimbila yakusyungulila yakuwoneka mpela mbale. 6 Nambo jemanjaji paŵayiche pamalo gakuputila mbeju ga Nakoni, Usa jwajongwele mkono wakwe ni kukamula Libokosi lya Mlungu jwakuwona lila, pakuŵa ng’ombesyo syasigele panandi kuligwisya Libokosilyo. 7 Payatendekwe yeleyi, Yehofa ŵamtumbilile Usa, soni Mlungu jwakuwona ŵamwuleje jwalakwe pelepo ligongo lyakutenda yindu mwangali ulemu mwamti jwalakwe ŵawilile papopo, pambali pa Libokosi lya Mlungu jwakuwonalyo. 8 Nambo Daudi ŵatumbile mnope ligongo lyakuti ukali wa Yehofa wamgwilile Usa, mwamti malo gelega gakusakolanjikwa kuti Pelesi-usa* mpaka lelojino. 9 Myoyo Daudi ŵamjogwepe mnope Yehofa palisiku lyeleli. Ni ŵatite, “Ana Libokosi lya Yehofa chilikayiche wuli kwangutama uneji?” 10 Pelepo Daudi ŵaganisisye yakuti Libokosi lya Yehofa akalijawusya kwaŵatamaga jwalakwejo ku Msinda wa Daudi. Mmalomwakwe Daudi ŵalijawisye Libokosilyo kunyumba ja Obedi-edomu jwa ku Gati.
11 Libokosi lya Yehofalyo lyatemi ku nyumba ja Obedi-edomu jwa ku Gati kwa myesi jitatu, mwamti Yehofa ŵapitilisye kumpa upile Obedi-edomujo pampepe ni ŵandu wosope ŵa m’nyumba jakwe. 12 Kaneko ŵandu ŵasalile Mwenye Daudi kuti, “Yehofa akumpa upile Obedi-edomu soni ŵandu ŵa m’nyumba jakwe ni yindu yosope yakwete jwalakwejo ligongo lya Libokosi lya Mlungu jwakuwona.” Myoyo Daudi ŵapite ku nyumba ja Obedi-edomu kukujigala Libokosi lya Mlungu jwakuwonalyo ni kulijawusya ku Msinda wa Daudi ali mkusangalala. 13 Ŵakunyakula Libokosi lya Yehofalyo paŵagambile kwenda ndangulo 6, Daudi ŵajigele ng’ombe ni chinyama chine chakwimbala ni kuyipeleka mbopesi.
14 Daudi jwaŵinaga mwakusyungulila pameso pa Yehofa ni machili gakwe gosope. Pandaŵi josopeji jwalakwe ŵaliji ali awete chakuwala cha Efodi. 15 Daudi soni ŵandu wosope ŵa m’nyumba ja Isalayeli ŵayikaga ni Libokosi lya Yehofa ali mkugumila mwakusangalala soni kwineku ali mkwimba lipenga. 16 Libokosi lya Yehofalyo palyayiche mu Msinda wa Daudi, Mikala mwanache jwamkongwe jwa Sauli ŵalingulile paliwindo ni ŵam’weni Mwenye Daudi ali mkugulukaguluka soni ali mkuŵina mwakusyungulila pameso pa Yehofa. Pelepo jwalakwe ŵatandite kumnyosya Daudijo mumtima mwakwe. 17 Kaneko ŵandu ŵala ŵajinjisye Libokosi lya Yehofa lila mu tenti jele Daudi ŵakunjile soni ŵaliŵisile pamalo gakwe. Panyuma pakwe Daudi ŵapeleche mbopesi syakutinisya soni syamkamulano pameso pa Yehofa. 18 Daudi paŵamalisisye kupeleka mbopesi syakutinisya soni syamkamulanosyo, ŵapele upile ŵandu mu lina lya Yehofa jwakusalamulila yakwinani. 19 Kaneko jwalakwe ŵapeleche kwa ŵandu wosopewo, gulu josope ja Ayisalayelijo, jwamlume soni jwamkongwe jwalijose mkate wesyungulile wepowole pasikati, keke jwa yisogosi ya chitela cha kanjesa soni keke jwa yisogosi yejumu ya mipeleya. Panyuma pakwe ŵanduwo ŵatyosile, jwalijose ŵawujile kunyumba jakwe.
20 Daudi paŵawujile kuti akape upile ŵandu ŵa m’nyumba jakwe, Mikala mwanache jwa Sauli jula ŵakopweche kuti akasimane ni jwalakwe. Ni ŵatite, “Nambo mwenye jwa Ayisalayeli alichimbichisyetu lelo paŵawusile yakuwala yakwe pameso pa achikapolo ŵachakongwe ŵa ŵakutumichila ŵakwe mpela mwakusatendela mundu jwamasoka pakuwula yakuwala yakwe pameso pa ŵandu.” 21 Pelepo Daudi ŵamjanjile Mikalajo kuti, “Une naliji mkumsangalalila Yehofa jwele jwasagwile une mmalo mwa baba ŵenu soni ŵandu wosope ŵa m’nyumba jawo kuti mbe jwakwalongolela ŵandu ŵa Yehofa, Ayisalayeli. Myoyo une chimbepe ndili mkumsangalalila Yehofa, 22 soni une chinalinandiyejepe kupunda pelepa soni chimbe ndili mkuliwona kuŵa jwakutuluka mnope. Nambo pakwamba ya achikapolo ŵachakongwe ŵamwasasile ŵala, chachinjimbichisya.” 23 Myoyo Mikala mwanache jwa Sauli nganakola mwanache mpaka palisiku lyaŵawile.