Yobu
36 Elihu jwapitilisye kuŵecheta kuti:
2 “Chonde ambikanile mwakuwusimana mtima pandaŵi jangulondesya,
Pakuŵa ngwetepe maloŵe gakuti mbechete mmalo mwa Mlungu.
3 Une chimbechete mwakupikanika chenene yindu yangumanyilila,
Soni chimbechete mwakulosya kuti Juŵambanganyisye une ali jwakulungama.
4 Nditu maloŵe gangu nganigaŵa gaunami.
Jwakusamanyilila yosope ali pameso pangu.
5 Yisyene, Mlungu ali jwamachili soni ngakusamkana jwalijose.
Jwalakwe akwete machili gekulungwa gakupikanichisya yindu.
6 Jwalakwe ngasawukulupusya umi wa ŵandu ŵakusakala.
Nambo jwalakwe akusamtendela yachilungamo mundu jwakulagasika.
7 Jwalakwe jwangaleka kwalola ŵandu ŵakulungama.
Akusiŵaŵika jemanjaji kuti aŵe yimpepe ni mamwenye,* soni akusiŵakwesya mpaka kalakala.
8 Nambo naga ŵataŵile jemanjajo ni maunyolo,
Ni kwatanjisya mu ngonji syakulagachisya,
9 Akusiŵasalila jemanjaji kuti amanyilile yindu yatesile,
Yakulemwecheka yawo yayatandite ligongo lya kunyada kwawo.
10 Jwalakwe akusawugula mawiwi gawo kuti jemanjaji apikane maloŵe gakwajamuka
Soni akusiŵasalila jemanjaji kuti aleche kutenda yakusakala.
11 Naga jemanjajo akupikanila ni kumtumichila jwalakwe,
Yindu yichajendela chenene paumi wawo,
Mwamti masiku ga yaka yawo gachiŵa gakusangalasya.
12 Nambo naga jemanjajo ngakupikanila, chachiwa ni upanga*
Soni chachiwa ali ŵangali lunda.
13 Ŵandu ŵangajogopa Mlungu* mumtima mwawo akusasunga chakulukosi.
Jemanjaji ŵangaŵendaga chikamuchisyo atamose jwalakwe ali ŵataŵile.
14 Jemanjaji akusawa ali ŵanache,
Jemanjaji akusamalila umi wawo ali yimpepe ni achalume ŵakutenda uhule pamalo gakutindiŵalila milungu jaunami.
15 Nambo Mlungu akusiŵakulupusya ŵandu ŵakulagasika pandaŵi jakulagasidwa.
Jwalakwe akusawugula mawiwi ga jemanjaji pandaŵi jakulagasidwa.
16 Jwalakwe akusiŵakulupusya wawojo pandaŵi jakusaka kusimana ni yakusawusya
Akusiŵakulupusya ni kwajawusya ku malo gekulungwa gangali yakusokonasya,
Ku malo gakola yakulya yejinji patebulo jawo kuti yamyalasye.
17 Pelepo wawojo chachijikutila ni chilango* chachachipochela ŵandu ŵakusakala,
Pandaŵi jele chachalamula soni pele chilungamo chichitendekwa.
18 Nambo wawojo asamale kuti kutumbila kukatendekasya kola umi wakwaŵenga ŵane,
Soni akakunda kuti yipupu yasokonasye.
19 Ana kulilila kwawo chikamuchisyo,
Kapena kulingalinga kwawo mpaka yakamuchisye kuti akasimana ni yakusawusya?
20 Akakumbilaga chilo,
Pandaŵi jele ŵandu akusatyoka pamalo gawo.
21 Asamale kuti akagalawuka ni kutanda kutenda yindu yakusakala,
Akasagula yakusakalayi kuti akasimana ni yakusawusya.
22 Apikane, Mlungu ali jwapenani ligongo lya machili gakwe.
Ana apali jwakwiganya jwali jwakulandana ni jwalakwe?
23 Ana apali juŵamsalile Mlungu yakusosekwa kutenda*
Kapena kumsalila jwalakwejo kuti, ‘Yatesileyi yili yakulemwecheka’?
24 Akaliŵalilaga kugakwesya masengo gakwe,
Gele ŵandu ajimbile pakwamba ya masengogo.
25 Ŵandu ŵamitundu josope agaweni,
Mundu agaweni ali pakutalichila.
26 Yisyene, Mlungu ali jwamkulungwa kupunda mwatukusaganichisya.
Winji wa yaka yakwe nganituŵa tukombwele kuwupikanichisya.*
27 Jwalakwe akusagawuta madondo ga mesi.
Madondogo gakusatenda lipundugulu ni kupanganya wula.
28 Kaneko mawunde gakusagwisya wulajo,
Soni wulajo jikusagwilila ŵandu.
29 Ana apali jwampaka apikanichisye mwagakusatamila mawunde,
Soni kulindima kwakutyochela ku tenti jakwe?
30 Alole yakusati pakutambasukula njasi penani pa mawundego
Soni alole yakusati pakugumbasya mesi m’malo gakusokoka ga m’nyasa.
31 Kupitila mu yindu yeleyi jwalakwe akusiŵalisya ŵandu.
Jwalakwe akusiŵapaga yakulya yejinji.
32 Ni magasa gakwe jwalakwe akusawunichila njasi,
Soni akusajilongolela ku malo kwakuti jikagwile.
33 Kulindima kwakwe kukusasala yakwamba jwalakwe.
Atamose yilango yikusamanyilila kuti jwinejwakwe akwika.*