Buku Jandanda ja Mbili

12 Sambano aŵa ali achalume ŵaŵayiche kwa Daudi ku Sikilagi. Achalume ŵeleŵa ŵaliji ŵane mwa asilikali ŵakwe ŵamachili ŵaŵamkamuchisyaga jwalakwejo pakuputa ngondo. Pandaŵiji jwalakwejo nganaŵa jwagopoka kwendajenda ligongo lya Sauli mwanache jwa Kisi. 2 Achalume ŵeleŵa ŵajigele maukunje, mwamti ŵakombolaga kukamulichisya masengo mkono wawo wamlyo ni wamchiji wakwe pakuponya maganga ni chinawo* kapena pakuponya mipamba ni ukunje. Achalume ŵeleŵa ŵaliji achalongo achimjakwe ŵa Sauli ŵakutyochela mu mbumba* ja Benjamini. 3 Jwakulongolela jwa achalume ŵeleŵa ŵaliji Ahiyeseli, soni jwakuyichisya jwakwe ŵaliji Yowasi. Wosope ŵaŵiliŵa ŵaliji ŵanache ŵa Semeya jwakutyochela ku Gibeya. Papalisoni Yesiyeli ni Pelete ŵanache ŵa Asimafeti. Nambosoni papali Belaka, Yehu jwa ku Anatoti, 4 soni Isamaya jwa mtundu wa Agibiyoni. Jwalakweju ŵaliji jumo mwa asilikali ŵamachili 30 ŵala, soni ŵaliji jwakulongolela pasikati pa asilikali 30 ŵelewo. Papalisoni Yelemiya, Yahasiyele, Yohanani, Yosabadi jwa ku Gedela, 5 Elusayi, Yelimoti, Beyaliya, Semaliya, soni Sefatiya jwa ku Halifu.* 6 Papalisoni yisukulu ya Kola ayi: Elikana, Isaya, Asalele, Yowesa, soni Yasobewamu. 7 Achalume ŵanesoni ŵaliji Yowela soni Sebadiya ŵanache ŵa Yelohamu jwa ku Gedoli.

8 Achalume ŵane ŵa mu mbumba ja Gadi ŵapite kuti akaŵe kumbali ja Daudi paŵaliji m’chipululu kumalo gakusawusya kwika. Jemanjaji ŵaliji asilikali ŵamachili ŵalijiganye kuputa ngondo soni ŵakumanyilila chenene kukamulichisya masengo yakuchijila yekulungwakulungwa soni mapanga. Ngope syawo syawonekaga mpela ngope sya masimba, soni ŵaliji ŵakombola kuwutuka mpela mwasikusatendela ngolombwe sya m’matumbi. 9 Jwakulongolela jwa achalume ŵeleŵa ŵaliji Eseli, jwaŵili Obadiya, jwatatu Eliyabu, 10 jwamcheche Misimana, jwamsano Yelemiya, 11 jwa 6 Atayi, jwa 7 Eliyele, 12 jwa 8 Yohanani, jwa 9 Elisabadi, 13 jwa 10 Yelemiya jwine, soni jwa 11 Makibanayi. 14 Ŵeleŵa ŵaliji achakulungwakulungwa ŵa asilikali ŵakutyochela mu mbumba ja Gadi. Pa gulu jawoji, mundu jwangali machili ŵaliji jwakombola kulimbana ni adani 100, pele mundu jwamachili mnope ŵaliji jwakombola kulimbana ni adani 1,000. 15 Achalume ŵeleŵa ni ŵaŵajombweche Lusulo lwa Yolodani luli lusefuchile mesi m’mwesi wandanda. Ni ŵatopolenye ŵandu wosope ŵaŵatamaga m’malambo, mwamti ŵanduwo ŵatilile kungopokolyuŵa soni ŵane kungapililolyuŵa.

16 Achalume ŵane ŵa mu mbumba ja Benjamini soni mu mbumba ja Yuda nombenawo ŵayiche kwa Daudi paŵatamaga kumalo kwakusawusya kwika kula. 17 Kaneko Daudi ŵakopweche kumbanga kuŵajuŵileko ni kusimana ni jemanjaji. Pelepo jwalakwe ŵasalile jemanjajo kuti, “Naga myiche kwa une ni yakulinga yambone, chitukamulane yakutenda. Nambo naga myiche ni chakulinga chakuti mungamule ni kumbeleka kwa adani ŵangu, Mlungu jwa achinangolo ŵetu alole yeleyi soni awelusye. Atende yeleyi ligongo makono gangu nganigatenda chilichose chakulemwa.” 18 Kaneko msimu wa Mlungu wayiche pa* Amasayi, juŵaliji jwakulongolela jwa achalume 30, ni ŵatite,

“M’weji tuli ŵandu ŵawo, wawo Daudi, soni m’weji tuli kumbali jawo, wawo mwanache jwa Jese.

Pelepo Daudi ŵapochele jemanjajo ni kwaŵika mu gulu ja ŵakulongolela asilikali.

19 Nombenawo achalume ŵane ŵa mu mbumba ja Manase ŵatyosile mu gulu ja asilikali ŵa Sauli ni kwawula kwa Daudi. Yeleyi yatendekwe pandaŵi jele Daudi ŵapite pampepe ni Afilisiti kuti akamenyane ni Sauli. Nambope jwalakwejo nganiŵakamuchisya Afilisitiwo, ligongo ŵakulamulila ŵa Afilisiti, panyuma pakukambilana ŵamtopwele jwalakwejo. Jemanjajo ŵatiga, “Jwalakweju chakatuleche ni kuwujila kwa ambuje ŵakwe Sauli, mwamti yichitendekasya kuti umi wetu uŵe pangosi.” 20 Daudi paŵapite ku Sikilagi, achalume ŵanesoni ŵa mu mbumba ja Manase ŵatyosile mu gulu ja asilikali ja Sauli ni kwawula kwa Daudi. Achalume ŵakwe ŵaliji Adinala, Yosabadi, Yediyele, Mikayeli, Yosabadi jwine, Elihu, soni Siletayi. Jemanjaji ŵaliji ŵakulongolela ŵa asilikali masausande ŵa mu mbumba ja Manase. 21 Jemanjaji ŵamkamuchisye Daudi pakulimbana ni gulu ja ŵachiswamba. Yaliji myoyo ligongo lyakuti wosopeŵa ŵaliji achalume ŵamachili soni ŵakulimba mtima. Jemanjaji ŵaŵisilesoni kuti aŵe ŵane mwa ŵakulongolela gulu ja asilikali ŵakwe. 22 Lisiku lililyose ŵandu ŵaliji mkwika kwa Daudi kukumkamuchisya mpaka gulu jakwe ja asilikali jakusile mnope mpela gulu ja asilikali ŵa Mlungu.

23 Sambano chiŵalanjilo chakuyichisyachi chili cha achalume ŵakulongolela ŵakosechela kuputa ngondo ŵaŵayiche kwa Daudi ku Hebuloni. Jemanjaji ŵayiche kukumkamuchisya kujigala umwenye wa Sauli mwakamulana ni yaŵalamwile Yehofa. 24 Chiŵalanjilo cha achalume ŵa mu mbumba ja Yuda ŵakujigala yakuchijila yekulungwakulungwa soni mapanga chaliji 6,800. Wosopeŵa ŵaliji asilikali ŵakosechela kuputa ngondo. 25 Chiŵalanjilo cha asilikali ŵamachili soni ŵakulimba mtima ŵa mu mbumba ja Simiyoni chaliji 7,100.

26 Chiŵalanjilo cha ŵa mu mbumba ja Lefi chaliji 4,600. 27 Yehoyada ni juŵaliji jwakulongolela jwa ŵanache ŵachalume ŵa m’liŵasa lya Aloni. Chiŵalanjilo cha achalume ŵaŵaliji nawo chaliji 3,700. 28 Pa achalume ŵeleŵa papalisoni Sadoki, mnyamata jwamachili soni jwakulimba mtima. Jwalakweju ŵayichesoni ni ŵakulongolela ŵakwana 22 ŵakutyochela m’maŵasa gakumanyika ni mena ga nangolo jwakwe.

29 Chiŵalanjilo cha asilikali ŵa mu mbumba ja Benjamini, ŵaŵaliji achalongo achimjakwe ŵa Sauli, chaliji 3,000. Ŵajinji mwa jemanjaji pandanda ŵaliji mkumchenjela Sauli soni liŵasa lyakwe mwakulupichika. 30 Chiŵalanjilo cha asilikali ŵa mu mbumba ja Efulayimu chaliji 20,800. Jemanjaji ŵaliji achalume ŵamachili soni ŵakulimba mtima, ŵaŵalijisoni ŵakupikanika m’maŵasa gakumanyika ni mena ga achinangolo ŵawo.

31 Chiŵalanjilo cha asilikali ŵakutyochela mu hafu ja mbumba ja Manase chaliji 18,000. Achalume ŵeleŵa ŵasagwile mwapadela kuti ayiche kwa Daudi kukumŵika kuŵa mwenye. 32 Chiŵalanjilo cha achalume ŵakulongolela ŵa mu mbumba ja Isakala chaliji 200. Jemanjaji ŵaliji achalume ŵaŵamanyililaga yaŵasosekwaga kutenda Ayisalayeli mwakamulana ni yayikutendekwa pandaŵijo. Jemanjaji ŵalijisoni ni achalongo achimjawo wosope ŵaŵalongolelaga. 33 Chiŵalanjilo cha achalume ŵa mu mbumba ja Sebuloni chaliji 50,000. Achalume ŵeleŵa ŵaliji ŵakosechela kuputa ngondo soni ŵakwete yida ya mtundu wine uliwose. Wosopeŵa ŵalipeleche ni mtima wosope* kuŵa kumbali ja Daudi. 34 Chiŵalanjilo cha ŵakulongolela ŵa mu mbumba ja Nafitali chaliji 1,000. Jemanjaji ŵalijisoni ni asilikali ŵakwana 37,000. Asilikaliŵa ŵanyakulaga yakuchijila yekulungwakulungwa soni mapanga. 35 Chiŵalanjilo cha asilikali ŵa mu mbumba ja Dani chaliji 28,600. Jemanjaji ŵaliji asilikali ŵaŵajimaga mwa dongosolo jakwe jakuputila ngondo. 36 Chiŵalanjilo cha asilikali ŵa mu mbumba ja Aseli ŵaŵajimaga mwa dongosolo jakwe jakuputila ngondo chaliji 40,000.

37 Chiŵalanjilo cha asilikali ŵakutyochela mu mbumba ja Lubeni, mbumba ja Gadi, soni hafu ja mbumba ja Manase chaliji 120,000. Jemanjaji ŵatyochelaga ku lisi line lya Lusulo lwa Yolodani. Asilikali ŵeleŵa ŵakwete yida ya mtundu wine uliwose. 38 Achalume wosopeŵa ŵaliji asilikali ŵakoseka kuputa ngondo ŵaŵajimaga mwa dongosolo jakwe jakuputila ngondo. Jemanjaji ŵayiche ku Hebuloni ni mtima wosope kuti amŵiche Daudi kuŵa mwenye jwa Ayisalayeli wosope. Nombenawo Ayisalayeli ŵane wosope ŵakamulene pakusaka* kumŵika Daudi kuŵa mwenye. 39 Jemanjaji ŵatemi ni Daudi kweleko kwa masiku gatatu. Ali kweleko ŵamwaga soni kulya yakulya yaŵalinganyichisye achalongo achimjawo. 40 Konjechesya pelepa, ŵandu ŵane ŵapakuŵandika, atamosesoni ŵane ŵaŵatamaga kutali mpela ŵa mu mbumba ja Isakala, Sebuloni, soni Nafitali, ŵayikaga ni yakulya. Yakulyayi ŵayikaga nayo pa abulu, ngamila, soni pa ng’ombe syawo. Jemanjaji ŵayikaga ni yakulya yejinji mpela utandi, makeke gakupanganya ni yisogosi yejumu ya nguju soni ya mipeleya, finyo, mawuta, ng’ombe soni ngondolo. Ŵayikaga ni yindu yeleyi ligongo lyakuti mu Isalayeli mwaliji chisangalalo.