Buku Jaŵili ja Samuyele
17 Kaneko Ahitofeli ŵamsalile Abisalomu kuti, “Chonde angunde kuti sagule achalume ŵakwana 12,000 ni chakulinga chakuti tunyakuche ni kumkuya Daudi chilo chino. 2 Chingamsimane jwalakwejo pandaŵi japesile mnope soni panganakola machili. Chingatende yakuti jwalakwe akasoŵe pakamula. Pelepo ŵandu wosope ŵali ni jwalakwe chakatile, kaneko chingamwulaje mwenyejo. 3 Panyuma pakwe chinjiwujila nawo ŵandu wosope kwa wawojo. Kuwujila kwa ŵandu wosopeŵa kukajigalile naga mundu jwakumsosasosa wawojojo chakawe. Naga yeleyo yikuja kutendekwa, ŵandu wosope chachiŵa pamtendele.” 4 Yaŵaŵendile Ahitofeliyi yamnonyele Abisalomu soni achakulungwakulungwa wosope ŵa Ayisalayeli.
5 Nambo Abisalomu ŵatite, “Amŵilanje Husayi jwa mumbumba ja Aliki jula, kuti tupikane yachaŵechete nombenajo.” 6 Myoyo Husayi ŵayiche kwa Abisalomu. Kaneko Abisalomu ŵamsalile jwalakwejo kuti, “Yeleyi ni yaŵechete Ahitofeli. Ana tukuye yaŵecheteyi? Naga iyayi, mtusalile yakuti tutende.” 7 Pelepo Husayi ŵamjanjile Abisalomujo kuti, “Yaŵechete Ahitofeliyi nganiyiŵa yakamuchisya pandaŵi ajino.”
8 Husayi ŵapitilisye kuŵecheta kuti, “Wawojo akumanyilila chenene kuti baba ŵawo soni achalume ŵa baba ŵawowo ali ŵamachili, soni kuti jemanjajo ali ŵawukali mnope mpela chimbalangondo chele ŵanache ŵakwe asokonechele mwitinji. Nambosonitu baba ŵawowo ali ŵakumanyilila kuputa ngondo, mwamti nganaŵa agonile yimpepe ni ŵandu ŵane chilochi. 9 Mwamti patukuŵecheta pano ŵalakwewo ajuŵile kumbanga* jinejakwe kapena kumalo ganegakwe, ni naga ŵalakwewo akuŵa ŵandanda kutujimuchila ŵandu ŵachapikane yeleyi chaŵechete kuti, ‘Ŵandu ŵakumkuya Abisalomu ŵala ŵagomeche.’ 10 Mwamti ŵandu ŵali ŵakulimba mtima mpela lisimba chachitetemela ni woga, ligongo Ayisalayeli wosope akumanyilila kuti baba ŵawo wawojo ali ŵamachili soni achalume ŵawo ali ŵakulimba mtima. 11 Une ni ngusaka kwasalila wawojo kuti ŵasonganganye Ayisalayeli wosope kutyochela ku Dani mpaka ku Beele-seba kuti ayiche kwa wawo. Jemanjaji atupe mpela msanga wa mungulugulu nyasa, soni wawojo ŵalongolele jemanjajo kungondojo. 12 M’weji chitumjawulile jwalakwe kulikose kwachasimanikweko, soni chitumjawulile mpela mangame gagakusagwila pasi, mwamti pangali jumo mwa jemanjajo juchachikulupuka, chinga jwalakwejo kapena jwalijose mwa achalume ŵali ni jwalakwe. 13 Naga jwalakwejo akutilila mumsinda, Ayisalayeli wosope chachijigala ngonji ni kwawula mumsindawo ni kugawutila mapupa ga msindawo mu chitiŵi, mwamti pangali atamose kaganga kamo kakachisigala.”
14 Kaneko Abisalomu soni achalume wosope ŵa ku Isalayeli ŵatite, “Yaŵechete Husayi jwa mumbumba ja Alikiju yili yakamuchisya kulekangana ni yaŵechete Ahitofeli.” Pakuŵa Yehofa ni juŵatendekasisye kuti ŵandu akakuya lunda luŵapeleche Ahitofeli ni chakulinga chakuti Yehofajo amjonanje Abisalomu.
15 Panyuma pakwe Husayi ŵamsalile Sadoki soni Abiyatala ŵaŵaliji ŵakutaga mbopesi kuti, “Yeleyi ni yaŵechete Ahitofeli pakumkamuchisya lunda Abisalomu soni achakulungwakulungwa ŵa ku Isalayeli. Nambo ayi ni yambechete une pakwakamuchisya lunda jemanjajo. 16 Sambano mwachitema atumisye utenga kwa Daudi soni akamkalamusye kuti, ‘Chilochi akatama pamalo gakombochela ga m’chipululu, nambo ajomboche soni akalepela kutenda yeleyi. Ligongo naga ngakutenda yeleyi nikuti wawojo mwenye soni ŵandu wosope ŵali ni wawojo mpaka ŵapyajile.’”
17 Yonatani soni Ahimasi ŵatamaga ku Eni-logeli kusa kwa msinda wa Yelusalemu ni chakulinga chakuti ŵandu akawona ali mkwinjila mu msindamo. Myoyo jwakutumichila jwamkongwe ŵapite kukwasalila jemanjajo utengawo, soni jemanjajo ŵapite kukumsalila Mwenye Daudi. 18 Nambope mnyamata jwine jwaweni jemanjaji ni ŵapite kukumsalila Abisalomu. Myoyo jemanjajo mwachitemachitema ŵatisile ni kwawula kwa jwamlume jwine jwa ku Bahulimu juŵakwete chisima pa luŵala pakwe. Jemanjajo ŵajinjile m’chisimacho, 19 soni ŵamkwakwe ŵa munduju ŵawunichile pachisimapo ni chindu ni kwanikapo tiligu, mwamti pangali ŵaŵamanyilile yayatendekwe. 20 Kaneko ŵakutumichila ŵa Abisalomu ŵayiche kwa jwamkongwejo ni ŵamwusisye kuti, “Ana Ahimasi ni Yonatani ali kwapi?” Jwamkongwejo ni ŵajanjile kuti, “Jemanjajo ajinjilile ku lusuloku.” Pelepo achalumewo ŵatandite kwasosasosa jemanjajo nambo nganiŵapata ni ŵawujile ku Yelusalemu.
21 Panyuma pakwe achalume ŵala ali apite, Ahimasi ni Yonatani ŵakopweche m’chisima mula ni kuja kumsalila Mwenye Daudi utenga wula. Jemanjajo ŵasalile mwenyewo kuti, “Anyakuche soni ajomboche lusulolu mwachitema pakuŵa Ahitofeli apeleche lunda lwakwajimuchila wawojo.” 22 Ndaŵi jijojo Daudi yimpepe ni ŵandu ŵaŵaliji ni jwalakwe ŵanyakwiche ni komboka lusulo lwa Yolodani, mwamti pakwachaga pangali atamose jumo juŵasigele mkanajomboche lusulo lwa Yolodani.
23 Ahitofeli paŵayiweni kuti ŵandu nganakamulichisya masengo lunda lwaŵapeleche, ŵakwesile bulu ni kwawula ku nyumba jakwe ku msinda wakumangwakwe. Panyuma pakuti jwalakwe aŵechetene ni ŵandu ŵa m’liŵasa lyakwe, jwalakwe ŵalitaŵilile mwamti jwawile. Kaneko ŵamsichile m’malembe ga achinangolo ŵakwe.
24 Pandaŵiji Daudi ŵaliji alipite ku Mahanaimu, nambo Abisalomu ŵaliji ajombweche lusulo lwa Yolodani pampepe ni achalume wosope ŵa ku Isalayeli. 25 Abisalomu ŵamŵisile Amasa kuti aŵe mlongola jwa gulu ja asilikali mmalo mwa Yowabu. Amasa ŵaliji mwanache jwa jwamlume jwine jwa Chiyisalayeli lina lyakwe Itila. Itila jweleju jwagonile ni Abigayeli mwanache jwamkongwe jwa Nahasi juŵaliji mlumbugwe jwa Seluya, mamagwe Yowabu. 26 Ayisalayeliŵa pampepe ni Abisalomu ŵakunjile matenti gawo mu dela ja Giliyadi.
27 Daudi paŵagambile kwika ku Mahanaimu, Sobi mwanache jwa Nahasi jwakutyochela ku Laba ku Amoni, Makili mwanache jwa Amiyele jwakutyochela ku Lo-debala soni Balisilayi jwa ku Giliyadi ku Logelimu 28 ŵayiche ni mabedi, mabeseni, mipika, tiligu, balele, utandi, tiligu jwamkalanje, mbwanda syekulungwakulungwa, mbweso soni yakulya yine yekalanje, 29 uchi, mawuta, ngondolo soni mkaka wekamatane. Jemanjaji ŵayiche ni yindu yosopeyi kukumpa Daudi soni ŵandu ŵaŵaliji ni jwalakwe kuti alye, pakuŵa jemanjaji ŵatite, “Ŵanduŵa jakwete sala soni apesile, nambosoni jakwete njota m’chipululumu.”