Buku Jaŵili ja Samuyele

8 Pali papite ndaŵi Daudi ŵamenyene ni Afilisiti soni ŵagomeche jemanjajo, mwamti jwalakwe ŵasumwile Afilisitiwo msinda wa Metegi-ama.

2 Daudi ŵagomeche Amowabu. Kaneko ŵagoneche jemanjaji pasi mumsela ni kwapima ni lukonji. Ŵandu ŵaŵapimile ulewu wa ngonji siŵili ŵawulagaga, soni ŵandu ŵaŵapimile ulewu wa lukonji lumo ŵalekaga ni umi. Myoyo Amowabuwo ŵaŵele ŵakutumichila ŵa Daudi soni ŵapelekaga msongo kwa jwalakwejo.

3 Daudi ŵamgomeche Hadadesa mwanache jwa Lehobu juŵaliji mwenye jwa ku Soba pandaŵi jele Hadadesajo ŵajawulaga ku Lusulo lwa Filate kukuwuchisya ulamusi wakwe. 4 Daudi ŵakamwile achalume ŵakwela pa mahachi ŵakwana 1,700 soni asilikali ŵakwenda pasi ŵakwana 20,000 ŵa Hadadesa. Kaneko Daudi ŵagatendekasisye mahachi gakwendesya magaleta* kuti galemale ni kwamba kusigasya gakwana 100 basi.

5 Asiliya ŵa ku Damasiko paŵayiche kukumkamuchisya Mwenye Hadadesa jwa ku Soba, Daudi ŵawuleje Asiliya ŵakwana 22,000. 6 Kaneko Daudi ŵataŵile malo gakutama asilikali ku Damasiko, msinda wa ku Siliya. Asiliyawo ŵaŵele ŵakutumichila ŵa Daudi soni ŵapelekaga msongo kwa jwalakwejo. Yehofa ŵamkamuchisyaga Daudi kuti awineje pangondo kulikose kwaŵajawulaga. 7 Nambosoni Daudi ŵajigele yakulichinjilichisya yakusyungulila yagolide yayaliji ya ŵakutumichila ŵa Hadadesa ni ŵayiche nayo ku Yelusalemu. 8 Mwenye Daudi ŵajigelesoni kopa jwamjinji kutyochela ku Beta soni ku Belotayi jajaliji misinda ja Hadadesa.

9 Sambano Mwenye Toyi jwa ku Hamati ŵapikene kuti Daudi ŵagomeche asilikali wosope ŵa Hadadesa. 10 Myoyo Toyi ŵamtumile Yolamu mwanache jwakwe kwa Daudi kuti akamwusye mwayiŵelele yindu paumi wakwe, soni kuti akamyamichile jwalakwe ligongo lyakulimbana soni kumgomeka Hadadesa (pakuŵa ndaŵi syejinji Hadadesa ŵaliji mkumenyana ni Toyi). Nambosoni pa ulendowu ŵajigele yindu yasilifa, golide soni kopa. 11 Mwenye Daudi ŵayiswejesye yindu yeleyi ni kuyipeleka kwa Yehofa. Ŵapelechesoni silifa ni golide juŵamswejesye jwele ŵamjigele kutyochela ku mitundu josope jiŵajigomeche. 12 Ŵamjigele kutyochela ku Siliya, Mowabu, kwa Amoni, kwa Afilisiti, kwa Amaleki nambosoni kwa Hadadesa mwanache jwa Lehobu juŵaliji mwenye jwa ku Soba. 13 Daudi jwatendekasisyesoni lina lyakwe kuŵa lyakupikanika paŵawuleje Aedomu ŵakwana 18,000 mu Chitiŵi cha Njete. 14 Jwalakwe ŵataŵile malo gakutama asilikali ku Edomu. Ŵataŵile maloga mu Edomu mosope, nambosoni Aedomu wosope ŵaŵele ŵakutumichila ŵa Daudi. Yehofa ŵamkamuchisyaga Daudi kuwina pa ngondo* kulikose kwaŵajawulaga.

15 Daudi ŵapitilisye kwalamulila Ayisalayeli wosope, soni jwalakwe jwawelusyaga ŵandu ŵakwe wosope mwachilungamo. 16 Yowabu mwanache jwa Seluya ŵaliji mlongola jwa gulu ja asilikali, soni Yehosafati mwanache jwa Ahiludi jwaliji jwakulemba mbili. 17 Sadoki mwanache jwa Ahitubi ni Ahimeleki mwanache jwa Abiyatala ŵaliji ŵakutaga mbopesi, soni Seleya ŵaliji mlembi. 18 Benaya mwanache jwa Yehoyada jwalongolelaga Akeleti ni Apeleti, soni ŵanache ŵa Daudi ŵaliji achakulungwakulungwa ŵakulongolela.*