Numeli
13 Sambano Yehofa ŵaŵechete ni Mose kuti, 2 “Mwatume achalume kuti akasonde chilambo cha Kanani, chilambo changusaka kwapa Ayisalayeli. Mu mbumba* jilijose mumjigale jwamkulungwa jumo jwakulongolela ŵandu ŵa mu mbumbajo ni mwatumisye jemanjajo.”
3 Myoyo Mose ŵatumisye jemanjajo kutyochela mu chipululu cha Palana pakupikanila yaŵalamwile Yehofa. Achalume ŵaŵatumisyewo, wosope ŵaliji ŵakulongolela ŵa Ayisalayeli. 4 Mena ga achalumewo ni aga: kutyochela mu mbumba ja Lubeni, ŵamtumisye Samuwa mwanache jwa Sakuli. 5 Kutyochela mu mbumba ja Simiyoni, ŵamtumisye Safati mwanache jwa Holi. 6 Kutyochela mu mbumba ja Yuda, ŵamtumisye Kalebe mwanache jwa Yefune. 7 Kutyochela mu mbumba ja Isakala, ŵamtumisye Igali mwanache jwa Yosefe. 8 Kutyochela mu mbumba ja Efulayimu, ŵamtumisye Hosiya mwanache jwa Nuni. 9 Kutyochela mu mbumba ja Benjamini, ŵamtumisye Paliti mwanache jwa Lafu. 10 Kutyochela mu mbumba ja Sebuloni, ŵamtumisye Gadiyeli mwanache jwa Sodi. 11 Kutyochela mu mbumba ja Yosefe jajili mbumba ja Manase, ŵamtumisye Gadidi mwanache jwa Susi. 12 Kutyochela mu mbumba ja Dani, ŵamtumisye Amiyele mwanache jwa Gemali. 13 Kutyochela mu mbumba ja Aseli, ŵamtumisye Setuli mwanache jwa Mikayeli. 14 Kutyochela mu mbumba ja Nafitali, ŵamtumisye Nahibi mwanache jwa Fofisi. 15 Soni kutyochela mu mbumba ja Gadi, ŵamtumisye Geuyeli mwanache jwa Maki. 16 Gelega gali mena ga achalume ŵaŵatumile Mose kuti akasonde chilambocho. Mose ŵampele Hosiya mwanache jwa Nuni lina lyakuti Yoswa.*
17 Mose paŵatumaga jemanjajo kuti akasonde chilambo cha Kanani, ŵasalile kuti, “Mjawule kweleko kupitila ku Negebu, kaneko ni mkajawule kudela jamatumbi. 18 Mkalole mwachiŵelele chilambocho nambosoni mkalole naga ŵandu ŵakutama kweleko ali ŵamachili kapena iyayi, soni naga ali ŵajinji kapena ŵamnono. 19 Mkalolesoni naga chilambocho chili chambone kapena iyayi, soni naga ŵandu ŵakutama kweleko akutama m’misinda jakola lutenje kapena jangali. 20 Mkalolesoni naga chilambocho chili chakusichila* kapena chakulaga,* soni naga m’chilambomo mwana yitela kapena mwangali. Mkusosekwa kuŵa ŵakulimba mtima nambosoni mkakaŵe yine mwa yisogosi ya m’chilambocho.” Ndaŵi jiŵatumagaji jaliji ndaŵi jiyatandaga kwiwula yisogosi ya mipeleya.
21 Myoyo jemanjaji ŵapite ni kuja kusonda chilambocho kutandila ku chipululu cha Sina mpaka kuja kwika ku Lehobu chiŵandika msinda wa Lebohamati.* 22 Paŵapitile ku Negebu ŵajile kwika ku Hebuloni kuŵatamaga Ahimani, Sesayi soni Talimai ŵanache ŵakuŵeleka Anaki. Msinda wa Hebuloni pawataŵidwe papite yaka 7 ni kutaŵidwaga msinda wa Sowani ku Iguputo. 23 Kaneko jemanjaji ŵayiche ku Chitiŵi* cha Esikolo. Kweleko ŵakatile nyambi jakola chikonyo chekulungwa cha yisogosi ya mipeleya, mwamti ŵanyakusyanaga ŵandu ŵaŵili pachitela chakunyakulila. Ŵakaŵilesoni yimanga yachisungu* nambosoni nguju. 24 Malo gelego ŵagapele lina lyakuti Chitiŵi cha Esikolo* ligongo lya chikonyo cha mipeleya chaŵakaŵile Ayisalayeli kweleko.
25 Pambesi pa masiku 40, ŵandu ŵala ŵawusile kutyochela kukusonda chilambo kula. 26 Myoyo jemanjajo ŵayiche kwa Mose, Aloni soni Ayisalayeli wosope ku Kadesi mu chipululu cha Palana. Jemanjajo ŵasalile ŵanduwo muŵajendele ulendowo nambosoni ŵalosisye yisogosi yiŵajigele m’chilambocho. 27 Jemanjajo ŵamsalile Mose kuti, “Twapite kukwinjila m’chilambo chila, kwaŵatutumile wawojo kula, soni yili yisyene kuti chili chilambo chakwenda mkaka ni uchi mwamti yisogosi yakwe ni ayi. 28 Nambope ŵandu ŵakutama m’chilambocho ali ŵamachili nambosoni akusatama m’misinda jekulungwa mnope jakola ndenje. Kweleko twasimenesoni ŵandu ŵamtundu wa Aanaki. 29 Aamaleki akutama mudela ja Negebu. Ahiti, Ayebusi soni Aamoli akutama mudela jamatumbi. Nambosoni Akanani akutama mumbali mwa nyasa soni mumbali mwa lusulo lwa Yolodani.”
30 Nambo Kalebe ŵaŵechete maloŵe pakusaka kwatamika mtima pasi ŵanduwo ali ajimijimi pameso pa Mose. Jwalakwe ŵatite, “Kwende tujawule mwachitema, nditu chitukajigale chilambochi kuŵa chetu ligongo ŵandu ŵa kweleko chitukagomeche basi.” 31 Nambo achalume ŵaŵaliji nawo paulendowo ŵatite, “Nganituŵa tukombwele kwagomeka ŵandu ŵakweleko ligongo ŵandu ŵakwe ali ŵamachili kutupunda m’wejo.” 32 Ŵanduwo ŵapitilisye kwasalila Ayisalayeli yakusakala yakwamba chilambo chiŵapite kukuchisondacho. Ŵatiga, “Chilambo chatwapite kukuchisondacho chikusamila ŵandu ŵakwe, soni ŵandu wosope ŵatwaweni kweleko ali ŵamachili soni achalewulewu. 33 Kweleko twawenisoni Anefili ŵali ŵanache ŵa Aanaki, yisukulu ya ŵandu ŵamtundu wa Anefili, mwamti m’wejo twaliwonaga mpela yitete pakulilandanya ni jemanjajo, soni jemanjajo ŵatuwonaga mpela yitete.”