Buku Jaŵili ja Ayimwene
18 Mu chaka chatatu cha Hosiya mwanache jwa Ela mwenye jwa ku Isalayeli, Hesekiya mwanache jwa Mwenye Ahasi jwa ku Yuda jwaŵele mwenye. 2 Jwalakwe jwaŵele mwenye ali ni yaka 25 soni jwalamulile ku Yelusalemu kwa yaka 29. Lina lya mamagwe lyaliji Abi* mwanache jwamkongwe jwa Sekaliya. 3 Jwalakwe ŵapitilisye kutenda yambone pameso pa Yehofa mpela muŵatendele Daudi nangolo jwakwe. 4 Jwalakwe ni juŵatyosisye malo gakwela, ni juŵakasenye yipilala yapadela soni ni juŵagwisisye lunjalamila lwapadela.* Nambosoni jwalakwe ŵakasenye chiwanichisyo cha lijoka chakopa chele Mose ŵapanganyisye, pakuŵa mpaka pandaŵiji Ayisalayeli ŵaliji ali mkupeleka mbopesi syakukoposya lyosi kuchiwanichisyochi. Mwamti ŵachikolangaga kuti chiwanichisyo cha lijoka lya kopa.* 5 Hesekiya jwamkulupililaga mnope Yehofa Mlungu jwa Ayisalayeli, mwamti pangali mwenye juŵaliji mpela jwalakwe pa mamwenye gosope ga ku Yuda gagalamulile panyuma pa jwalakwejo kapena jwalakwejo mkanaŵe kuŵa mwenye. 6 Jwalakwe nganamleka Yehofa soni nganaleka kumkuya jwalakwe. Hesekiya jwapitilisye kupikanila malamusi gele Yehofa ŵampele Mose. 7 Yehofa ŵaliji ni jwalakwe, mwamti kulikose kuŵajawulaga ŵatendaga yindu mwalunda. Jwalakwe ŵamjimuchile mwenye jwa ku Asiliya soni ŵakanile kumtumichila mwenyejo. 8 Jwalakwe ŵagomeche Afilisiti mpaka kuja kwika ku Gasa pampepe ni madela gawo gosope kutyochela kwasyaliji sanja syawo mpaka ku misinda* jakola yakulichenjela.
9 Mu chaka chamcheche cha Mwenye Hesekiya chachaliji chaka cha 7 cha Hosiya mwanache jwa Ela mwenye jwa ku Isalayeli, Mwenye Salimanesa jwa ku Asiliya jwayiche kukulimbana ni msinda wa Samaliya, mwamti jwawusyungulile msindawo. 10 Jemanjaji ŵawusumwile msindawu panyuma pa yaka yitatu chachaliji chaka cha 6 cha Hesekiya, chelesoni chaliji chaka cha 9 cha Mwenye Hosiya jwa ku Isalayeli. Pandaŵi jeleji msinda wa Samaliya wasumulidwe. 11 Kaneko mwenye jwa ku Asiliya ŵajigele Ayisalayeli ni kwawula nawo ku ukapolo ku Asiliya, soni ŵaŵisile jemanjanji ku Halaha, ku Haboli kulwaliji lusulo lwa Gosani soni ku misinda ja Amedi. 12 Yaliji myoyo ligongo lyakuti jemanjaji nganapikanila maloŵe ga Yehofa Mlungu jwawo. Nambo ŵapitilisye kukasa chilanga chakwe, mwamti nganapikanila yosope yele Mose jwakutumichila jwa Yehofa ŵalamwile. Jemanjaji nganapikanila soni kuyikuya yeleyi.
13 Mu chaka cha 14 cha Mwenye Hesekiya, Senakelibu mwenye jwa ku Asiliya jwayiche kukulimbana ni misinda josope ja Ayuda jakola yakulichenjela, mwamti ŵajisumwile misindajo. 14 Myoyo Mwenye Hesekiya jwa ku Yuda jwatumisye utenga ku Lakisi kwa mwenye jwa ku Asiliya wakuti, “Unejo ni jwandemwisye. Myoyo mleche kulimbana ni une, soni une chinampe yiliyose yachimulamule.” Pelepo mwenye jwa ku Asiliya jwamlamwile Mwenye Hesekiya jwa ku Yuda kuti apeleche matalente* gasilifa gakwana 300, soni matalente gagolide gakwana 30. 15 Myoyo Hesekiya jwajigele silifa josope jujwaliji m’nyumba ja Yehofa soni jujwaliji mwakusunjila chipanje m’nyumba ja mwenye. 16 Pandaŵi jeleji Hesekiya mwenye jwa ku Yuda jwatyosisye matanga ga nyumba ja Yehofa soni mafelemu gele Hesekiya msyenejo ŵagapakesye golide ni ŵampele yindu yeleyi mwenye jwa ku Asiliya.
17 Kaneko mwenye jwa ku Asiliya ŵamtumile Tatani,* Labisalisi* soni Labisaki* yimpepe ni gulu jekulungwa ja asilikali ŵa ku Lakisi kuti ajawule kwa Mwenye Hesekiya ku Yelusalemu. Jemanjaji ali ayiche ku Yelusalemu ŵajimi chiŵandika ni ngalande ja litanda lyakulutando lyalyaliji pamsewu wekulungwa wakwinjilila kumgunda wa jwamlume jwakuchapa yakuwala. 18 Jemanjaji paŵaŵendile kuti awonegane ni mwenye, Eliyakimu mwanache jwa Hilikiya juŵaliji jwakulolela nyumba ja mwenye, Sebina juŵaliji mlembi soni Yowa mwanache jwa Asafu juŵaliji jwakulemba yakutendekwa ŵakopweche kuti awonegane ni jemanjaji.
19 Myoyo Labisaki ŵasalile jemanjajo kuti, “Amsalile Hesekiya kuti, ‘Mwenye jwamkulungwa mnope, jwali mwenye jwa ku Asiliya aŵechete kuti, “Ana mmwejo mkudalila chichi kusyesyene? 20 Mmwejo mkuŵecheta kuti une ngumanyilila matala gakuputila ngondo soni ngwete machili. Nambotu mkulilambusya. Ana ŵani ŵakumlimbisya mtima mmwejo kuti mpaka myiche pakunjimuchila une? 21 Mpikane, mmwejotu mkudalila litete lyekasiche, jwali Iguputo, sonitu litete lyakwe lili lyakuti naga mundu akulijegamila mpaka ligambe kumtota mmyala mwakwe. Mwelemutu ni mwaŵelele Falawo mwenye jwa Iguputo kwa ŵandu wosope ŵakumjegamila jwalakwe. 22 Naga jemanja mkuŵecheta kwa une kuti, ‘M’we tukumdalila Yehofa Mlungu jwetu,’ ana ngaŵa Mlungu jwakwe jujojo jwele Hesekiya amtyochesye malo gakwe gakwela soni malo gakwe gakupelechela mbopesi? Sonitu jwalakwe jwasalile ŵandu ŵa ku Yuda ni ku Yelusalemu kuti, ‘Jemanja mkusosekwa mtindiŵalileje malo gakupelechela mbopesi ga ku Yelusalemupe.’”’ 23 Sambano jemanja mtende bechi ni ambuje ŵangu mwenye jwa ku Asiliya. Une chinampe jemanja mahachi gakwana 2,000 ni tulole naga chimkombole kupata ŵandu ŵakwela pa mahachigo. 24 Ana mpaka mkombole kumtoposya atamose bwanamkubwa jumo jwali jwakutuluka mnope pasikati pa ŵakutumichila ŵa ambuje ŵangu, chitamilecho jemanja mli mkwegamila Iguputo kuti champeje magaleta* soni ŵakwela pamahachi? 25 Ana nganaŵa Yehofa jwangundile uneji kuti mbiche kukulimbana ni malo gelega soni kuti nagajonanje? Yehofa jwenejo ni jwasalile une kuti, ‘Mjawule mkalimbane ni chilambocho soni mkachijonanje.’”
26 Pelepo Eliyakimu mwanache jwa Hilikiya soni Sebina ni Yowa ŵamsalile Labisakijo kuti, “Chonde aŵechete ni m’weji ŵakutumichila ŵawo mu chiŵecheto cha Chialamu pakuŵa tukusachipikanasoni. Akaŵecheta ni m’weji mu chiŵecheto cha Ayuda kutendela ŵandu ŵajimi pepupaŵa kuti akapikana.” 27 Nambo Labisaki ŵajanjile jemanjajo kuti, “Ana ambuje ŵangu andumile kuti mbechete ni jemanja soni ni ambuje ŵenupe? Ana nganandumasoni kuti mbechete kwa achalume ŵatemi pepupawo, ŵele chachilya chimbusi chawo soni kumwa makweso gawo yimpepe ni jemanja?”
28 Kaneko Labisaki ŵajimi ni kuŵecheta mwagumila m’chiŵecheto cha Ayudawo kuti, “Apikane jemanja maloŵe ga mwenye jwamkulungwa mnope, jwali mwenye jwa ku Asiliya. 29 Mwenyewo aŵechete kuti, ‘Jemanja mkakunda kuti Hesekiya amloŵesye, pakuŵa jwalakwe nganaŵa akombwele amta panandi kumkulupusya jemanja mmyala mwangu. 30 Mkakunda kuti Hesekiya amtendekasye jemanja kuti mumdalileje Yehofa, ni kumsalilaga kuti, “Yehofa chatukulupusye nditu, soni msinda welewu nganiwuŵa upelechedwe mmyala mwa mwenye jwa ku Asiliya.” 31 Jemanja mkampikanila Hesekiya ligongotu mwenye jwa ku Asiliya aŵechete kuti, “Jamanja mkamulane ni une soni mjimiche makono. Pachimtende yeleyi jwalijose jwa jemanja chachilyaga yisogosi yakutyochela mu chitela chakwe cha mipeleya soni mu chitela chakwe cha mkuju. Nambosoni jwalijose chachimwaga mesi gakutyochela mu chisima chakwe. 32 Yindu yichiŵa myiyi mpaka pandaŵi jele une chinjiyika ni kumjigalila jemanja kuchilambo chakulandana ni chamkutamacho. Kuchilambo chakola mbeju soni finyo jwasambano. Chilambo chakola mkate* soni migunda ja mipeleya. Chakola yitela ya maolifi soni uchi. Naga mkukunda yeleyi nikuti chimtame ni umi mwamti ngam’wa. Jemanja mkampikanila Hesekiya ligongotu jwalakwe akumlambusya pakumsalila kuti, ‘Yehofa chatukulupusye.’ 33 Ana pana mlungu julijose jwa mitundu jine jwakombwele kwakulupusya ŵandu ŵa m’chilambo chakwe mmyala mwa mwenye jwa ku Asiliya? 34 Ana jili kwapi milungu ja ku Hamati soni ku Alipadi? Nambi milungu ja ku Sefalafaimu, ku Hena soni Ifa jili kwapi? Ana jakombwele kumkulupusya Samaliya mmyala mwangu? 35 Ana ni mlungu jwapi pa milungu josope ja yilambo jwakombwele kwakulupusya ŵandu ŵakwe mmyala mwangu? Naga milungu jeleji jilepele, ana Yehofa mpaka akombole kumkulupusya Yelusalemu mmyala mwangu?”’”
36 Nambo ŵanduwo ŵagambile kutama ngajanga chilichose, pakuŵa mwenye ŵaliji ali ŵalamwile kuti, “Mkaja kumjanga chilichose jwalakwe.” 37 Sambano Eliyakimu mwanache jwa Hilikiya juŵaliji jwakulolela nyumba ja mwenye, Sebina juŵaliji mlembi soni Yowa mwanache jwa Asafu juŵaliji jwakulemba yakutendekwa ŵayiche kwa Hesekiya ali apapwile yakuwala yawo ni kumsalila maloŵe gosope gaŵaŵechete Labisaki.