Buku Jaŵili ja Ayimwene

23 Myoyo mwenyewo ŵatumisye utenga mwamti ŵasongangenye achakulungwakulungwa wosope ŵa ku Yuda soni ku Yelusalemu. 2 Kaneko mwenyewo ŵapite ku nyumba ja Yehofa yimpepe ni achalume wosope ŵa ku Yuda, ŵandu wosope ŵaŵatamaga ku Yelusalemu, ŵakutaga mbopesi soni ŵakulochesya. Ŵapite yimpepe ni ŵandu wosope kutandila jwamwana mpaka jwamkulungwa. Jwalakwe jwaŵalasile maloŵe gosope gagaliji m’buku ja chilanga jajasimanikwe m’nyumba ja Yehofa kuti ŵanduwo apikane. 3 Mwenyewo ŵajimi chiŵandika ni chipilala ni ŵatesile chilanga *pameso pa Yehofa, kuti chachimkuya Yehofa, ni kupikanila yosope yaŵalamwile, yakwakumbusya soni malamusi gakwe ni mtima wawo wosope soni umi wawo wosope. Chachitenda yeleyi mwakukuya maloŵe ga chilanga gaŵagalembile m’buku jeleji. Ŵandu wosope ŵakamulene ni chilangacho.

4 Kaneko mwenyewo ŵamlamwile jwamkulungwa jwa ŵakutaga mbopesi Hilikiya, ŵakutaga mbopesi ŵaŵamkamuchisyaga Hilikiyajo, soni alonda ŵa pamlango kuti ajinjile m’nyumba ja Yehofa ni kukoposya yiwiya* yosope ya Baala, ya lunjalamila lwapadela* soni ya yindu yosope yakwinani. Kaneko jwalakwe ŵayijochiche yeleyi kusa kwa msinda wa Yelusalemu pamalo gakuseleleka ga Kidiloni. Liwu lyakwelyo ŵalijawisye ku Beteli. 5 Myoyo jwalakwe ŵatyosisye pamasengo ŵakutaga mbopesi ŵa milungu jachilendo ŵele mamwenye ga ku Yuda ŵasagwile kuti apelecheje mbopesi syakoposya lyosi pamalo gakwela, m’misinda ja ku Yuda soni malo gakusyungulila Yelusalemu. Ŵatyosisyesoni ŵandu ŵaŵapelekaga mbopesi syakoposya lyosi kwa Baala, kwa lyuŵa, kwa mwesi, kwa ndondwa soni kwa yindu yosope yakwinani. 6 Jwalakwe jwakopwesye lunjalamila lwapadela* mu nyumba ja Yehofa ni kulujawusya kusa kwa msinda wa Yelusalemu, ku Chitiŵi cha Kidiloni mwamti jwalakwe ŵalujochiche lunjalamilalo ku Chitiŵi cha Kidilonicho. Yayasigalile pakocha lunjalamilalo ŵayikasenyekasenye mpaka kuŵa luwundu. Kaneko ŵamwasenye luwundulo m’malembe ga ŵandu wamba. 7 Jwalakwe ŵakasenyesoni nyumba sya achalume ŵaŵatendaga uhule m’malo gakutindiŵalila milungu jaunami, syasyaliji m’nyumba ja Yehofa. Ŵapasulenyesoni malo gele achakongwe ŵaluchilaga matenti gakutindiŵalila lunjalamila lwapadela.*

8 Kaneko jwalakwe ŵakopwesye ŵakutaga mbopesi wosope m’misinda ja Yuda, mwamti jwalakwe jwatendekasisye kuti malo gakwela gele ŵakutaga mbopesi ŵapelechelagapo mbopesi syakoposya lyosi gaŵe gangaŵajilwa kuŵa malo gakupopelela. Ŵatesile yeleyi kutyochela ku Geba mpaka ku Beele-seba. Jwalakwe ŵagwisisyesoni malo gakwela gagaliji pa mageti, pamlango wakwinjila wa Yoswa, juŵaliji jwamkulungwa jwa mumsinda. Malo gelega galiji kumchiji mundu pakwinjila pamlango wakwinjilila mumsinda. 9 Ŵakutaga mbopesi ŵa m’malo gakwela nganatumichilaga pa malo gakupelechela mbopesi kwa Yehofa ku Yelusalemu. Nambo jemanjaji ŵalyaga mkate* wangali chakusasaŵisya yimpepe ni achalongo achimjawo. 10 Jwalakwe jwatendekasisyesoni kuti ku Tofeti gaŵe malo gangaŵajilwa kupopelela. Malo gelega galiji mu Chitiŵi cha Ŵanache ŵa Hinomu. Jwalakwe ŵatesile yeleyi ni chakulinga chakuti pakasimanika mundu jwakumpeleka mbopesi mwanache jwakwe jwamlume kapena jwamkongwe kwa Moleki mwakumjocha pamoto. 11 Jwalakwe ŵagalekasisyesoni mahachi gele mamwenye ga ku Yuda ŵagapeleche kwa lyuŵa kuti gakajinjilaga mu nyumba ja Yehofa kupitila pa chipinda* cha Natani-meleki juŵaliji nduna ja ku nyumba ja mwenye. Chipinda chelechi chaliji pa lipenu. Jwalakwe jwajochichesoni pamoto magaleta* ga lyuŵa. 12 Mwenyewo ŵagwisisyesoni malo gakupelechela mbopesi gele mamwenye ga ku Yuda gataŵile pamsakasa wa chipinda cha Ahasi. Ŵagwisisyesoni malo gakupelechela mbopesi gele Manase ŵataŵile m’maluŵala gaŵili ga pa nyumba ja Yehofa. Jwalakwe ŵakasenye maloga soni luwundu lwakwe ŵalumwasenye mu Chitiŵi cha Kidiloni. 13 Jwalakwe jwatesile yakuti malo gakwela gagaliji kusogolo kwa Yelusalemu cha kummwela* kwa Litumbi lya Masame* gaŵe malo gangaŵajilwa kupopelela. Malo gelega ni gele Mwenye Solomoni jwa Ayisalayeli ŵataŵile kuti gaŵe ga Asitoleti juŵaliji mlungu jwamkongwe jwakunyalaya jwa Asidoni soni Kemosi mlungu jwakunyalaya jwa Amowabu nambosoni Milikomu mlungu jwakunyalaya jwa Aamoni. 14 Jwalakwe jwakasenye yipilala yapadela ni kugwisyasoni njalamila syapadela.* Pamalo payaliji yeleyi ŵagumbesyepo mawupa ga ŵandu. 15 Jwalakwe ŵagwisisyesoni malo gakupelechela mbopesi ga ku Beteli soni malo gakwela gele Yelobowamu mwanache jwa Nebati ŵatendekasisye nago Ayisalayeli kulemwa. Panyuma pakuti jwalakwe agwisisye malo gakupelechela mbopesi soni malo gakwela, jwalakwe ŵagajochiche malo gakwelaga, soni yakusigala yakwe ŵayikasenyekasenye mpaka kuŵa luwundu. Soni jwalakwe ŵajochiche lunjalamila lwapadela.*

16 Yosiya paŵagalawiche ni kugawona malembe petumbi, jwalakwe ŵasalile ŵandu kuti ajigale mawupa gagaliji m’malembemo ni kugajocha pamalo gakupelechela mbopesi gala, yayatendekasisye kuti malogo gaŵe gangaŵajilwa kuŵa gakupopelela. Yeleyi yatendekwe mwakamulana ni maloŵe ga Yehofa gaŵaŵechete kupitila mwa mundu jwa Mlungu jwakuwona jwele ŵasasile kuti yindu yeleyi yichitendekwa. 17 Kaneko jwalakwe ŵawusisye kuti, “Ana malembe gangugawona apopogo ga ŵani?” Pelepo achalume ŵa mumsindamo ŵamjanjile jwalakwejo kuti, “Gali ga mundu jwa Mlungu jwakuwona jwa ku Yuda jwele ŵalochesye yakwamba malo gakupelechela mbopesi ga ku Beteli. Yaŵalochesyeyo ni yatesile wawojoyi.” 18 Jwalakwe ni ŵatite, “Amleche apumuleje. Akakunda kuti jwalijose agakwaye mawupa gakwe.” Myoyo jemanjajo ŵagalesile ngagakwaya mawupago, nambosoni nganagakwaya mawupa ga jwakulochesya juŵatyochele ku Samaliya.

19 Yosiya jwatyosisyesoni nyumba syosope syakutindiŵalila milungu jaunami syasyaliji m’malo gakwela, m’misinda ja ku Samaliya syele mamwenye ga ku Isalayeli gataŵile kuti amtumbilikasye Mlungu. Nyumbasi ŵasitesile yakulandana ni yaŵatesile ku Beteli. 20 Jwalakwe ŵapeleche pamalo gakupelechela mbopesi, ŵakutaga mbopesi wosope ŵa m’malo gakwela ŵaŵaliji kweleko. Jwalakwe ŵajochichesoni mawupa ga ŵandu pa malo gakupelechela mbopesigo. Paŵatesile yeleyi ŵawujile ku Yelusalemu.

21 Sambano mwenyewo ŵalamwile ŵandu wosope kuti, “Mtende Chisangalalo cha Pasika pakumchimbichisya Yehofa Mlungu jwenu mwakamulana ni yaŵalembile m’buku ja chilangaji.” 22 Chisangalalo cha Pasika mpela chelechi nganichitendekwejepo kutandila m’masiku gele ŵakulamula ŵalamulilaga Ayisalayeli, kapena m’masiku gosope ga mamwenye ga ku Isalayeli soni m’masiku gosope ga mamwenye ga ku Yuda. 23 Nambo chisangalalo chakumchimbichisya Yehofa cha Pasika chelechi, chatendekwe ku Yelusalemu m’chaka cha 18 cha Mwenye Yosiya.

24 Yosiya ŵatyosisyesoni ŵandu ŵakuŵechetana ni misimu soni ŵakusala yamsogolo. Nambosoni ŵatyosisye yiwanichisyo* ya atelafi, milungu jakunyalaya* soni yindu yosope yakunyalaya yayaliji ku Yuda ni ku Yelusalemu. Jwalakwe ŵatesile yeleyi pakukuya maloŵe ga m’Chilamusi gaŵagalembile m’buku jele jwakutaga mbopesi Hilikiya ŵajipatile m’nyumba ja Yehofa. 25 Yosiya mkanaŵe kuŵa mwenye nganipapagweje mwenye jwine jwakulandana ni jwalakwe, juŵawujile kwa Yehofa ni mtima wakwe wosope, umi* wakwe wosope soni ni machili gakwe gosope, mwakamulana ni yosope yayaliji m’Chilamusi cha Mose. Nambosoni panyuma pa jwalakwejo nganipapagweje mwenye jwine jwakulandana ni jwalakwe.

26 Atamose kuti yaliji myoyo, nambope Yehofa nganatyosya ukali wakwe wawakolelaga pa Ayuda ligongo lya yindu yakunyalaya yosope yele Manase ŵatesile ni kumtumbilikasya Yehofa. 27 Yehofa jwatite, “Une chinjimtyosya Yuda pameso pangu mpela yanatite pakumtyosya Isalayeli. Soni une chinjiwukana msinda wa Yelusalemu wele une nawusagwile. Une chinjijikanasoni nyumba jele nasasile kuti, ‘Lina lyangu lichipitilisya kuŵa kweleko.’”

28 Mbili jine ja Yosiya soni yosope yajwatesile, ŵayilembile m’buku ja mbili ja mundaŵi ja achayimwene ŵa ku Yuda. 29 M’masiku ga Yosiya, Falawo Neko mwenye jwa ku Iguputo, jwayiche kukusimana ni mwenye jwa ku Asiliya ku Lusulo lwa Filate. Sambano Mwenye Yosiya ŵapite kweleko kuti akamenyane najo. Nambo Neko paŵam’weni Yosiyajo ŵamwuleje ku Megido. 30 Myoyo ŵakutumichila ŵakwe ŵajigele mtembo wakwe pa ligaleta kutyoka ku Megido ni kwawula nawo ku Yelusalemu, mwamti ŵawusichile kweleko m’malembe gakwe. Kaneko ŵandu ŵa m’chilambomo ŵamjigele mwanache jwa Yosiya lina lyakwe Yehoyahasi ni kumtaga mawuta gakumtaga mundu pakumsagula, mwamti ŵamŵisile kuŵa mwenye mmalo mwa babagwe.

31 Yehoyahasi jwaŵele mwenye ali ni yaka 23, soni jwalamulile ku Yelusalemu kwa myesi jitatu. Lina lya mamagwe lyaliji Hamutali mwanache jwamkongwe jwa Yelemiya jwa ku Libina. 32 Jwalakwe jwatandite kutenda yakusakala pameso pa Yehofa, yakulandana ni yosope yaŵatesile achinangolo ŵakwe. 33 Falawo Neko ŵamŵisile mundende Yehoyahasijo ku Libula m’chilambo cha Hamati. Ŵatesile yeleyi kuti Yehoyahasijo aleche kulamulila ku Yelusalemu. Kaneko Falawo Neko ŵalipikasisye ŵandu ŵa m’chilambo cha Yuda matalente* gasilifa gakwana 100 soni talente jimo jagolide. 34 Konjechesya pelepa, Falawo Neko jwatesile yakuti mwanache jwa Yosiya lina lyakwe Eliyakimu aŵe mwenye mmalo mwa Yosiyajo ŵaŵaliji babagwe. Nambosoni ŵamchenjile lina Eliyakimujo ni kuŵa Yehoyakimu. Ni kaneko ŵamjigele Yehoyahasi jula ni kumjawusya ku Iguputo kwele mkupita kwandaŵi jwawile. 35 Yehoyakimu jwapeleche silifa soni golide kwa Falawo, nambo jwalakwe jwalokotelaga msongo kwa ŵandu kuti akombole kupeleka silifa jwele Falawo ŵalamwile. Jwalakwe jwatamilikasisye winji wa silifa soni golide jwele mundu jwalijose jwa m’chilambocho ŵasosekwaga kupeleka kwa Falawo Neko.

36 Yehoyakimu jwaŵele mwenye ali ni yaka 25, soni jwalamulile ku Yelusalemu kwa yaka 11. Lina lya mamagwe lyaliji Sebida mwanache jwamkongwe jwa Pedaya jwa ku Luma. 37 Jwalakwe jwapitilisye kutenda yakusakala pameso pa Yehofa, yakulandana ni yosope yaŵatesile achinangolo ŵakwe.