Lefitiko
26 “‘Mkalipanganyichisya milungu ni kujitindiŵalilaga. Milungu jeleji jili jangali mate. Ngamkusosekwasoni kwimika yiwanichisyo yakusepa kapena yipilala yapajika ni kuyitindiŵalilaga. Mkaŵikasoni m’chilambo chenu yakusepa yamaganga kuti myitindiŵalileje, pakuŵa une ndili Yehofa Mlungu jwenu. 2 Msunjeje masabata gangu soni mgachimbichisyeje* malo gangu geswela. Une ndili Yehofa Mlungu jwenu.
3 “‘Naga mkupitilisya kwenda mwakuya malamusi gangu, soni kupikanila yangumlamula ni kuyitendaga, 4 une chinjimgwichisyaga wula pandaŵi jakwe, mwamti chilambocho chichimpaga yakulya yejinji soni yitela ya m’chilambomo yichisogolaga yisogosi. 5 Ndaŵi jenu jakuputa tiligu jichipelenganya mpaka kusimanilana ni ndaŵi jakutyosya yisogosi ya mipeleya m’migunda jenu. Nambosoni ndaŵi jakutyosya yisogosi ya mipeleya jichipelenganya mpaka kusimanilana ni ndaŵi jakupanda mbeju. Jemanja chimchilyaga yakulya yenu mpaka kwikuta soni chimchitamaga mwamtendele m’chilambo chenu. 6 Chinjitendekasyaga m’chilambomo kuti muŵe mwana mtendele, mwamti jemanja chimchigonaga pali pangali mundu jwalijose juchachimjogoyaga. Unejo chinjitendekasya kuti yinyama yakogoya yakwitinji yikasimanikwaga m’chilambomo soni pangali mundu jwalijose juchachiyika kuti amjimuchile jemanja m’chilambo chenu. 7 Jemanja nditu chimchikombola kwatoposya adani ŵenu soni chimchagomeka adani ŵenuwo ni upanga.* 8 Ŵandu msano kutyochela pasikati penu chachatoposya ŵandu 100, soni ŵandu 100 kutyochela pasikati penu chachatoposya ŵandu 10,000, mwamti jemanja chimchikombola kwagomeka adani ŵenuwo ni upanga.
9 “‘Chinjimpa upile jemanja* mwamti chimchiŵelekana ni kutupa soni chinjisunga chilanga changu chanatesile ni jemanja. 10 Chimchigowolaga yakulya yejinji yachimchilyaga mpaka kusimanilana ni yakulya yine ya m’chaka chakuyichisya. Mwamti chimchisosekwaga kutyosya yakulya yakala yamwasunjile kuti msunje yasambano. 11 Chinjiŵika chitenti changu pasikati penu soni unejo ngasinamkana jemanja. 12 Chinjiŵa Mlungu jwenu mwamti chinjijendaga pasikati penu soni jemanja chimchiŵa ŵandu ŵangu. 13 Une ndili Yehofa Mlungu jwenu jwanamkopwesye jemanja m’chilambo cha Iguputo kuti mkaŵasoni achikapolo ŵawo. Unejo ni jwanatemangwile makongwa genu ni kumtendekasya kuti mjendeje mwagopoka.*
14 “‘Nambope naga jemanja ngamkumbikanila kapena kusunga malamusi gangu gosopega, 15 nambosoni naga mkukana malamusi gangu soni naga mkuŵengana ni yangumlamula ni chakulinga chakuti mkapikanila malamusi gangu gosope, nambosoni naga mkukasa chilanga changu, 16 pelepo unejo chinjimtenda yindu ayi: Chinjimpa chilango* mwakumtendekasya kuti msimaneje ni yakusawusya. Yakusawusya yakwe yichiŵa mpela ulwele wakosomola mnope* soni kukasanya kwa chilu mwamti meso genu ngasigalolechesyaga soni machili genu gosope gachimala. Chimchipandaga mbeju syenu nambo ngasimgungula chilichose ligongo adani ŵenu ni ŵachachilyaga mbeju syampandilesyo. 17 Unejo chinjimtumbilila jemanja, mwamti adani ŵenu chachimgomeka soni ŵandu ŵakusaŵengana ni jemanja chachimlagasya. Nambosoni jemanja chimchitila pali pangali jwalijose jwakumtoposya.
18 “‘Nambo naga jemanja chimchipitilisya ngambikanila une atamose mli msimene ni yeleyi unejo chinjimpa chilango kwa maulendo gakwana 7 kupunda chilango chanampele pandanda. Chinjitenda yeleyi ligongo lya yakulemwa yenu. 19 Chinjimasya kulikwesya kwenu nambosoni chinjitendekasya kwinani kuŵa mpela chisyano cha ayiloni* soni chilambo chenu kuŵa mpela chisyano cha kopa.* 20 Chimchimala machili genu pachabe ligongo pachimchipanda mbeju m’migunda mwenu ngasimgungula chilichose soni yitela ya m’migunda ngasiyisogola yisogosi.
21 “‘Nambo naga chimchipitilisya kutenda yindu yakunjimuchila soni kukana kumbikanila, unejo chinjimpa chilango kwa maulendo 7 kupunda chilango chanampele chila. Chinjitenda yeleyi mwakamulana ni yakulemwa yenu. 22 Chinjitumisya yinyama yakwitinji pasikati penu mwamti yichiwulaga ŵanache ŵenu soni yichimala yilango yenu. Yeleyi yichitendekasya kuti chiŵalanjilo chenu chinandipe soni pangali jwalijose juchachijendaga m’misewu jenu.
23 “‘Nambo naga panyuma pakusimana ni yeleyi ngasimjongolelape matala genu, soni kupitilisya kutenda yakunjimuchila, 24 unesoni chinjilimbana ni jemanja mwamti chinjimpa chilango kwa maulendo 7 ligongo lya yakulemwa yenu. 25 Unejo chinjitendekasya adani ŵenu kuti ampe chilango mwakumenyana ngondo ni jemanja ligongo lyakuti mkasile chilanga. Naga chimchitilila m’misinda jenu, une chinjitendekasya yilwele pasikati penu soni chinjimpeleka jemanja mmyala mwa adani ŵenuwo. 26 Pachinjijonanga malo genu gakusunjila* mikate,* achakongwe 10 chachitelechela mikate mu ufuni umo. Kaneko chachilingaga mikatejo pasikelo mwamti jemanja chachimpaga kamnono. Jemanja chimchilyaga nambo ngajikuta.
27 “‘Naga panyuma pa yeleyi ngasimumbikanila une soni naga chimchipitilisya kwenda mwakunjimuchila, 28 une chinjilimbana mnope ni jemanja soni chinjimpa chilango kwa maulendo 7 ligongo lya yakulemwa yenu. 29 Myoyo jemanja chimchiwulaga ŵanache ŵenu ŵachalume soni ŵachakongwe ni kulyaga mitembo jawo. 30 Une chinjijonanga malo genu gakwela gamkusatindiŵalilaga milungu jaunami soni chinjigwisya malo genu gakutinichisya yakununjila. Chinjiwunjika mitembo jenu penani pa milungu jenu jakusepa jajili jakunyalaya soni jangali umi.* Pelepo chinjigalawuka ni kumleka jemanja ligongo mŵele ŵandu ŵakunyalaya kwa une. 31 Chinjijonaga misinda jenu soni malo genu geswela. Kaliwungo kambone ka mbopesi syenu ngasikaŵa kakusangalasya* kwa une. 32 Chinjimtopola jemanja m’chilambo chenu mwamti adani ŵenu ŵachachiyika ni kutama m’chilambocho, chachisimonga pachachiyiwona yeleyi. 33 Chinjim’balalikanganya mwamti chimchitama pasikati pa ŵandu ŵamitundu jine. Chinjitendekasya adani ŵenu kwika kuti amenyane ni jemanja ni upanga mwamti chilambocho chichiŵa masame soni misinda jenu chachijijonanga.
34 “‘Pandaŵi jele chilambo chenu chichiŵa masame, jemanja ni kutamaga m’chilambo cha adani ŵenu, chilambo chenu chichipumula* pakuwuchisya masabata gele nganichisungaga. 35 Masiku gosope gele chilambocho chichiŵa masame chichiŵa chili mkupumula. Yeleyi yichiŵa myoyo ligongo lyakuti pamasiku gosope gamwatamaga mwelemo chilambocho nganichipumulaga pa masabata genu.
36 “‘Nambo kwa ŵandu ŵachachikulupuka, ŵachachitamaga m’yilambo ya adani ŵawo, chinjitendekasya kuti wakamuleje mnope woga. Jemanjajo chachitilaga atamose lisegwe lya lisamba lyalikuguluka ni mbepo. Chachitilaga mpela kuti akutila ngondo soni chachigwa pali pangali mundu jwalijose jwakwatoposya jemanjajo. 37 Jwalijose chachimkuŵala mjakwe ni kugwisyanaga mpela kuti akutila ngondo nambo pali pangali mundu jwalijose jwakwatoposya. Jemanjajo ngasakombola kulimbana ni adani ŵawo. 38 Ŵajinji mwa jemanja chimchiwila pasikati pa ŵandu ŵamitundu jine, mwamti chilambo cha adani ŵenuwo chichimmila jemanja. 39 Ŵandu ŵakusigala pelepo chachilagasika m’chilambo cha adani ŵawowo ligongo lya yakulemwa yawo soni jemanjajo chachilagasika ligongo lya yakulemwa ya achinangolo ŵawo. 40 Kaneko jemanjajo chachijitichisya yakulemwa yawo soni yakulemwa ya achinangolo ŵawo. Chachijitichisya kuti wosope ŵaliji ŵangakulupichika mwakutenda yindu yakusisyana ni une. 41 Pelepo unesoni chinjitenda yindu yakusisyana ni jemanjajo mwakwajawusya m’chilambo cha adani ŵawo.
“‘Chinjitenda yeleyi kuti mwine mitima jawo jakumulajo* jilinandiye ni kulipila yakulemwa yawo. 42 Myoyo chinjikumbuchila chilanga chanatesile ni Yakobo soni chilanga chanatesile ni Isaki nambosoni chilanga chanatesile ni Abulahamu. Chinjichikumbuchilasoni chilambocho. 43 Pandaŵi jele Ayisalayeli chachityoka m’chilambo chawo chilambocho ni kuŵa masame, chilambocho chichiŵa chili mkuwuchisya masabata gakwe. Pandaŵi jelejo jemanjajo chachiŵa ali mkulipila yakulemwa yawo ligongo lyakuti ŵakanile kukuya yanalamwile soni nganachimbichisya malamusi gangu. 44 Nambope atamose pachachisimana ni yindu yosope yeneyi m’chilambo cha adani ŵawo, une ngasinakana mpaka kalakala kapena kwajasa jemanjajo mpaka kwikana pakuti mtundu wosope kumala, ligongo kutenda yeleyo kuchiŵa kukasa chilanga chanatesile ni jemanjajo, pakuŵa une Yehofa ndili Mlungu jwawo. 45 Chinjaganichisya jemanjaji ligongo lyakukumbuchila chilanga chanatesile ni achinangolo ŵawo ŵanakopwesye m’chilambo cha Iguputo ŵandu ŵamitundu jine ali mkulola. Natesile yeleyi pakulosya kuti une ndili Mlungu jwawo, une ndili Yehofa.’”
46 Gelega gali malamusi soni yindu yaŵalamwile Yehofa ni kwapa Ayisalayeli pa Litumbi lya Sinai kupitila mwa Mose.