Chikalata Chakwawula kwa Aefeso
3 Paligongo lyeleli, une Paulo ndili mkayidi ligongo lyakuŵa jwakumkuya jwa Klistu Yesu soni ligongo lyakumkamuchisya jemanja ŵandu ŵamitundu jine. 2 Naga mwapikene kuti Mlungu ŵambele masengo gakulolela mwa umbone mtima wakwe wekulungwa, ŵatesile yeleyi kuti namkamuchisye jemanja. 3 Mlungu ŵambele masengoga paŵamanyisye yakusisika yakwe, mpela yandite pakumlembela mwakata munyumamu. 4 Myoyo pachimŵalanje yeleyi, chimsimichisye yakuti une ngumanyilila yakusisika ya Mlungu yakwamba Klistu. 5 Yakusisika yeleyi yaliji yangamanyika kwa ŵandu ŵa mibado* jakala. Nambo apano Mlungu ayisasile kwa ŵandumetume soni ŵakulochesya ŵakwe ŵaswela kupitila mwa msimu weswela. 6 Yakusisika yakwe yili yakuti ŵandu ŵamitundu jine aŵe ŵakupochela nawo chipanje soni kuti aŵe yiŵalo ya chilu chimpepe, nambosoni kuti apochele nawo yindu yele Mlungu ŵatusalile kuti chachitupa. Yeleyi yichikomboleka ligongo lyakuti jemanjaji ali ŵakamulana ni Klistu Yesu soni ligongo ŵapikanile ngani syambone. 7 Une naŵele jwakutumichila jwa yakusisika yeleyi ligongo lya umbone mtima wekulungwa soni walulele wele Mlungu ŵambele mwamachili gakwe.
8 Uneji jwandili jwamnandi mnope kupunda mundu jwamnandi mwa ŵaswelawo, napochele umbone mtima wekulungwawu kuti lalichile kwa ŵandu ŵamitundu jine ngani syambone syakwamba chipanje changali malile cha Klistu. 9 Nambosoni ŵambele masengo gakuti namlosye mundu jwalijose yakutenda Mlungu pakwendesya yakusisika yakwe. Yakusisika yeleyi yasunjiche mwakusisika mnope kwa yaka yejinji mwa Mlungujo, jwele ŵapanganyisye yindu yosope. 10 Yaŵele myoyo ni chakulinga chakuti Mlungu akamulichisye masengo mpingo pakulosya lunda lwakwe kwa maboma soni maulamusi gakwinani. Yisyene, jemanjaji chachilola lunda lwa Mlungu lwakusalulosya m’matala gakulekanganalekangana. 11 Yeleyi yili yakamulana ni chakulinga chakwe changamala chiŵakwete chele chichikwanilichikwa kupitila mwa Klistu Yesu Ambuje ŵetu. 12 Kupitila mwa jwalakwejo m’weji tukusaŵecheta mwagopoka, soni mpaka tumyichile Mlungu mwagopoka ligongo tukwete chikulupi mwa jwalakwe. 13 Myoyo ngumŵenda kuti mkawujila munyuma pakulola yakusawusya yangusimana nayo pangumkamuchisya jemanja, pakuŵa yeleyi yikuyikasya uchimbichimbi kwa jemanja.
14 Paligongo lyeleli ngwatindiŵalila Atati,* 15 ŵele ŵatamilikasisye* liŵasa lililyose kwinani soni pachilambo chapasi. 16 Ngumŵenda Mlungu jwali jwakuchimbichika mnope kuti akamulichisye masengo msimu wakwe pakulimbisya mitima jenu soni nganisyo syenu. 17 Nguŵendasoni kuti, kupitila m’chikulupi chimkwete, Klistu atamilichiche m’mitima jenu pampepe ni chinonyelo chimkwete. Nambosoni mŵe ŵatitimiche michiga soni ŵakutamilichika pa fendeshoni* jakulimba. 18 Mtende yeleyi ni chakulinga chakuti jemanja pampepe ni ŵaswela wosope mkombole kumanyilila chenene m’chijipi, m’chilewu, kukwela, soni kusokoka, 19 nambosoni kuti mmanyilile chinonyelo cha Klistu chachikusapunda lunda losope. Pambesi pakwe, chimchikola ndamo syosope sya Mlungu syakusapeleka jwalakwe.
20 Sambano Mlungu mpaka atende yindu yekulungwa mnope kupunda yosope yampaka tuŵende kapena kuyiganichisya ligongo lya machili gakwe gagakukamula masengo mwa m’weji. 21 Mlungujo apochele uchimbichimbi kupitila mumpingo soni mwa Klistu Yesu ku mibado josope soni mpaka kalakala. Ame.