Genesesi
39 Sambano Yosefe ŵamjigalile ku Iguputo, mwamti mundu jwine jwa ku Iguputoko lina lyakwe Potifala juŵaliji nduna ja Falawo soni jwamkulungwa jwa asilikali ŵakumlondela, ŵamsumile Yosefejo kutyochela kwa Ayisimayeli ŵaŵamjigalile kweleko ŵala. 2 Nambo Yehofa ŵaliji ni Yosefe mwamti panyuma pakwe, jwalakwe yindu yamjendelaga chenene soni ŵampele udindo m’nyumba ja abwana ŵakwe ŵaŵaliji ŵa ku Iguputoko. 3 Abwana ŵakwewo ŵayiweni kuti Yehofa ali ni jwalakwe soni Yehofa akutendekasya kuti chilichose chimjendeleje chenene.
4 Sambano Potifala ŵapitilisye kumnonyela Yosefe soni jwalakwe jwaŵele jwakutumichila jwakwe juŵamdalilaga. Myoyo Potifala ŵamsagwile Yosefe kuti aloleleje nyumba jakwe soni yindu yosope yaŵakwete jwalakwe ŵayiŵisile mmyala mwakwe. 5 Kutandila pandaŵi jele Potifala ŵamsagwile Yosefe kuti aloleleje nyumba jakwe soni yindu yakwe yosope yaŵakwete, Yehofa ŵapitilisye kupeleka upile kwa ŵandu wosope ŵa m’nyumba ja Potifala ligongo lya Yosefe. Nambosoni upile wa Yehofa waŵele pa yindu yosope yaŵakwete Potifala m’nyumba mwakwe soni yakumigunda. 6 Pambesi pakwe Potifala ŵayilesile yindu yakwe yosope mmyala mwa Yosefe. Jwalakwe nganadandawulaga ya chilichose. Chindu chaŵasosekwaga kuganichisya chaliji kusagula yakulya yachalye basi. Nambosoni Yosefe jwaŵele jwa chilu chakuwoneka chenene soni jwaliji jwakusalala.
7 Panyuma pakwe, ŵamkwawo abwana ŵala ŵatandite kumlolechesya Yosefe mwakumkumbila, mwamti ŵamsalilaga kuti, “Myiche mgone ni une.” 8 Nambo jwalakwe ŵakanile mwamti ŵasalile ŵamkwawo abwana ŵakwewo kuti, “Abwana ŵangu ŵangadandawula ya chilichose chachili m’nyumba muno soni yindu yawo yosope ŵayiŵisile mmyala mwangu kuti nayiloleleje. 9 M’nyumba muno mwangali jwakutumichila jwine jwamkulungwa kupunda une, soni abwana ŵangu ŵalesile chilichose cha m’nyumbamu mmyala mwangu kulekapo wawojo ligongo lyakuti wawojo ali ŵamkwawo. Sambano ana mpaka ndende uli chakulemwa chekulungwa chelechi ni kumleŵela Mlungu?”
10 Nambo jwamkongwejo ŵagambaga kuŵecheta lisiku lililyose ya ngani jeleji kwa Yosefe, nambo Yosefe nganakunda kuti agone ni ŵamkwawo ŵa abwana ŵakwewo kapena kuŵa nawo pampepe. 11 Lisiku line Yosefe ŵapite m’nyumbamo kukukamula masengo gakwe. Pandaŵiji m’nyumbamo mwaliji mwangali jwamasengo jwalijose. 12 Kaneko jwamkongwejo ŵakamwile mwamachili chakuwala cha Yosefe ni kumsalilaga kuti, “Mgone ni une mmwe.” Nambo Yosefe ŵachilesile chakuwalacho mmyala mwa jwamkongwejo ni kutilila pasa. 13 Jwamkongwejo paŵayiweni kuti Yosefe amlechele chakuwala chakwe chila soni atilile pasa, 14 ŵatandite kwaŵilanga ŵamasengo ŵane ŵa panyumbapo ni kwasalilaga kuti, “Alole, ŵayiche najo mundu jwa Chihebeliju kuti atujalusye m’weji. Jwalakwe ŵayiche kuti agone ni une, nambo natandite kugumila mnope. 15 Kaneko jwalakwe paŵayiweni kuti ngugumila mnope ŵachilesile chakuwala chakwe panaliji une ni kutilila pasa.” 16 Panyuma pakwe jwamkongwejo ŵajigele chakuwala cha Yosefe chila ni kuchiŵika pambali pakwe kwembecheya kuti ŵamkwakwe ŵaŵaliji abwana ŵa Yosefejo ayiche.
17 Ŵamkwakwewo paŵayiche, ŵasalilesoni yilayila kuti, “Jwamasengo jwa Chihebeli jwaŵayiche najo akunoju ŵayiche kwa une kuti anjalusye. 18 Nambo panatandite kugumila ni kukwesya mnope maloŵe gangu, jwalakwe ŵachilesile chakuwala chakwe pambali pangu ni kutilila pasa.” 19 Abwana ŵakwe ŵa Yosefe paŵagambile kupikana maloŵe ga ŵamkwawo gakuti, “Yeleyi ni yandendele jwakutumichila jwawoju,” ndaŵi jijojo abwana ŵakwe ŵapile mtima mnope. 20 Myoyo abwana ŵala ŵamjigele Yosefe ni kuja mumponya mundende. Ŵamŵisile jwalakwe kumalo kwaŵaŵikaga achikayidi ŵakumleŵela mwenye, mwamti jwalakwe ŵatemi kundende peko.
21 Nambo Yehofa ŵapitilisye kuŵa ni Yosefe soni kumlosya jwalakwe chinonyelo changamala, mwamti ŵamtendekasisye jwakulolela ndende kuti amnonyeleje mnope jwalakwe. 22 Myoyo jwakulolela ndendejo ŵamsagwile Yosefe kuti aŵe jwakulolela jwa achikayidi wosope mundendemo. Soni chilichose chaŵatendaga achikayidiwo mundendemo, jwalakwe ni juŵalamulaga kuti chinducho chitendekwe. 23 Jwakulolela ndendejo nganasosekwaga kulolela chilichose chachaliji mmyala mwa Yosefe pakuŵa Yehofa ŵaliji ni jwalakwe, soni Yehofa ŵatendekasisye kuti yindu yosope yaŵatendaga jwalakwe yimjendeleje chenene.