Buku Jaŵili ja Samuyele
13 Sambano Abisalomu mwanache jwa Daudi ŵakwete mlumbugwe juŵaliji jwakusalala mnope lina lyakwe Tamala. Aminoni juŵalijisoni mwanache jwa Daudi ŵamnonyele Tamalajo. 2 Aminoni ŵalagasiche mnope nganisyo mpaka kwikana pakulwala ligongo lyamkusaka Tamala juŵaliji mlumbugwe. Nambosoni pakuŵa Tamalajo ŵaliji jwakuti nganagonejepo ni jwamlume, Aminonijo ŵayiwonaga kuti yili yangakomboleka kuti atende najo chilichose. 3 Sambano Aminoni ŵakwete mjakwe lina lyakwe Yehonadabu juŵaliji mwanache jwa Simeya, mlongo mjakwe Daudi. Yehonadabujo ŵaliji jwakalamuka mnope. 4 Jwalakwe ŵamwusisye Aminoni kuti, “Ligongo chichi mmweji mwanache jwa mwenye kundaŵi kulikose mkuwoneka kuti mkulagasika nganisyo? Ligongo chichi ngamkusalila une? Aminoni ni ŵamjanjile jwalakwejo kuti, “Une ngumsaka Tamala, mlumbugwe Abisalomu jwali mpwanga.” 5 Pelepo Yehonadabu ŵamsalile Aminonijo kuti, “Mkagone pabedi jenu ni mlambuchisye kuti mkulwala. Baba ŵenu patayiche kukumlola mwasalile kuti, ‘Chonde amkunde mlumbugwangu Tamala kuti ayiche kukumba yakulya. Naga jwalakwe akulinganya yakulya yakupeleka kwa jwakulwala une ndili mkulola, une nditu chindye kutyochela mmyala mwakwe.’”
6 Myoyo Aminoni ŵagonile ni kulambuchisyaga kuti akulwala, mwamti mwenye ŵayiche kukumlola. Kaneko Aminoni ŵasalile mwenyewo kuti, “Chonde amkunde mlumbugwangu Tamala kuti ayiche ni alinganyile makeke* gaŵili ndili mkulola ni chakulinga chakuti ndye kutyochela mmyala mwakwe.” 7 Myoyo Daudi ŵatumisye utenga kwa Tamala juŵaliji ku nyumba ni kumsalila kuti, “Chonde mjawule ku nyumba ja achimwene ŵenu Aminoni ni mkalinganyile yakulya.” 8 Myoyo Tamala ŵapite ku nyumba ja Aminoni, mchimwene jwakwe jula kwaŵamsimene jwalakwe ali agonile. Kaneko jwalakwe ŵajigele mtanda wewunye ni kupanganya makeke Aminonijo ali mkulola, panyuma pakwe ŵagateleche makekego. 9 Kaneko jwalakwe ŵajigele makekego ni kumpa Aminoni. Nambo Aminonijo jwakanile kulya ni jwatite, “Jwalijose akopoche!” Myoyo ŵandu wosope ŵakopweche.
10 Sambano Aminoni ŵamsalile Tamalajo kuti, “Myiche nayo yakulyayo kuchipinda kuno kuti ndye kutyochela mmyala mwenu.” Myoyo Tamala ŵajigele makeke gaŵatelechego ni kwika nago kuchipinda kuŵaliji Aminoni mchimwene jwakwejo. 11 Tamala paŵayiche ni makekego kuti Aminoni alye, Aminonijo ŵamkamwile jwalakwe ni kumsalila kuti, “Myiche apa mgone ni une alumbuŵangu.” 12 Nambo Tamala ŵamsalile jwalakwe kuti, “Iyayi achimwene, mkasimundesya sooni pakuŵa yeleyi yangatendekwaga mu Isalayeli muno. Mkatenda chindu chakutesya sooni mnopechi. 13 Nambi chinjikombola chamtuli kuleka kutenda sooni? Nambosonitu ŵandu chachawonaga wawojo kuti ali m’gulu ja achalume ŵakutesya sooni mu Isalayeli. Sambano chonde, aŵechetane ni mwenye, pakuŵa ŵalakwewo nganaŵa ŵakanyisye kuti wawo anjigale.” 14 Nambo Aminoni nganampikanila jwalakwe, ni pakuŵa jwaliji jwamachili kumpunda Tamala, jwalakwe ŵamkamulile Tamalajo yayaliji yakutesya sooni. 15 Pelepo Aminoni ŵatandite kumŵenga mnope Tamala, mwamti kumŵenga kwaŵamŵenjile pelepa kwaliji kwekulungwa kupunda muŵamnonyelelaga pandanda. Aminonijo ni ŵamsalile Tamala kuti, “Mnyakuche, mkopoche amuno!” 16 Pelepo Tamala ŵamsalile jwalakwejo kuti, “Iyayi achimwene ligongo kundopola apanopano chili chindu chakusakala mnope kupunda ni yatesile ni uneyi.” Nambo jwalakwe ŵakanile kumpikanila Tamala.
17 Kaneko Aminoni ŵamŵilasile jwamasengo jwakwe jwachinyamata ni kumsalila kuti, “Mumtyosye munduju pameso pangu, soni pachakopochepo mkiye litangalyo.” 18 Tamala ŵaliji ali awete dilesi jakusalala mnope, pakuŵa madilesi gelega ni gaŵawalaga ŵanache ŵachakongwe ŵamwenye ŵakuti nganagonejepo ni jwamlume. Pelepo jwamasengojo ŵamkopwesye Tamala pasa soni jwalakwe ŵakiyile litangalyo Tamala paŵakopweche. 19 Kaneko Tamala ŵatasile liwu mumtwe mwakwe soni jwalakwe jwapapwile dilesi jakwe jakusalala jaŵawete. Kaneko jwalakwe ŵaŵisile makono mumtwe ni kutyoka pamalopo soni ŵajendaga ali mkulila mnope.
20 Panyuma pakwe Abisalomu ŵaŵaliji achimwene ŵakwe ŵa Tamala ŵamwusisye jwalakwe kuti, “Ana ngati achimwene ŵenu Aminoni ni ŵaŵaliji ni mmwejo? Mkamsalila jwalijose yayitendekweyi mlumbugwangu. Aminonitu ali achimwene ŵenu. Mkayiganisyaga mnope yeleyi.” Kaneko Tamala ŵatamaga jika ku nyumba ja Abisalomu achimwene ŵakwewo. 21 Mwenye Daudi paŵapikene yosopeyi, ŵatumbile mnope. Nambope jwalakwejo nganasakaga kutenda yindu yakumtumbilikasya Aminoni ligongo lyakuti ŵamnonyelaga, pakuŵa ŵaliji mwanache jwakwe jwandanda. 22 Nambosoni Abisalomu nganaŵecheta chilichose kwa Aminoni, chinga chambone kapena chakusakala, pakuŵa Abisalomujo ŵamŵenjile Aminoni ligongo lyakuti jwalakwe ŵamtesisye sooni Tamala juŵaliji mlumbugwe.
23 Panyuma pa yaka yiŵili yamtundu, ŵakusenga ubweya* wa ngondolo ŵa Abisalomu ŵaliji ku Baala-hasoli chiŵandika ni ku Efulayimu. Myoyo Abisalomu ŵaŵilasile ŵanache wosope ŵa mwenye kuti ayiche ku chisangalalo. 24 Kaneko Abisalomu ŵapite kwa mwenye ni kwasalila kuti, “Jwakutumichila jwawo akuja kusenga ubweya wa ngondolo. Chonde wawo mwenye kwende tujawule yalumo pampepe ni ŵakutumichila ŵawo.” 25 Nambo mwenyewo ŵamsalile Abisalomu kuti, “Iyayi mwanangu. Naga tukwawula wosope chitukamsitopesye mmwejo.” Atamose kuti Abisalomu ŵalimbichilaga yakuti mwenyewo ajawule nambo ŵakanile, mmalomwakwe ŵagambile kumpa upile. 26 Kaneko Abisalomu ŵatite, “Naga wawojo ngajawula, chonde amkunde Aminoni achimwene ŵangu kuti ajawule yimpepe ni m’weji.” Mwenyewo ni ŵamwusisye Abisalomu kuti, “Ligongo chichi mkusaka kwawula ni jwalakwe?” 27 Nambo Abisalomu ŵalimbichilepe, mwamti mwenyewo ŵakundile kuti Aminoniwo ajawule ni jwalakwe yimpepe ni ŵanache wosope ŵa mwenyewo.
28 Kaneko Abisalomu ŵalamwile ŵamasengo ŵakwe kuti, “Mŵe mesope, soni mtima wa Aminoni pawukatande kusangalala ligongo lya finyo, chingamsalile jemanja kuti, “Mumwulaje Aminoni!” Pelepo mkusosekwa kuja kumwulaga jwalakwe. Ngamkusosekwa kutenda woga, pakuŵa une ni jwanamlamwile. Mtende yindu mwamachili soni mwakulimba mtima.” 29 Myoyo ŵamasengo ŵa Abisalomu ŵamwuleje Aminoni mwakamulana ni yaŵalamwile Abisalomu. Kaneko ŵanache ŵane wosope ŵa mwenye ŵanyakwiche, jwalijose ŵakwesile pa bulu jwakwe ni kutila. 30 Ŵanachewo paŵaliji mwitala, utenga wayiche kwa Daudi wakuti, “Abisalomu awuleje ŵanache wosope ŵa mwenye, soni pangali ata jumo jwajukulupwiche.” 31 Pelepo mwenyewo ŵajimwiche ni kupapula yakuwala yawo ni kugona pasi. Nombenawo ŵakutumichila ŵa mwenye ŵajimi pambali pa mwenyewo ali apapwile yakuwala yawo.
32 Nambope, Yehonadabu mwanache jwa Simeya mlongomjakwe jwa Daudi jwatite, “Ambuje ŵangu akaganisya kuti jemanjaji awuleje ŵanache wosope ŵa mwenye, ligongo Aminonipe ni jwawulajidwe. Abisalomu ni jwalamwile yeleyi. Jwalakwe ŵaganisisye yakutenda yeleyi kutandila palisiku lyele Aminoni ŵamtesisye sooni Tamala, mlumbugwe Abisalomu mwakumkamulila. 33 Sambano ambuje mwenye akakulupilila utenga wakuti, ‘Ŵanache wosope ŵa mwenye awile,’ pakuŵa Aminonipe ni jwawile.”
34 Pandaŵiji Abisalomu ŵaliji ali atisile. Kaneko mlonda paŵalolite, ŵaweni ŵandu ŵajinji ali mkwika kutyochela kumsewu wawaliji kunyuma kwakwe wele wapitaga chiŵandika litumbi. 35 Pelepo Yehonadabu ŵasalile mwenyewo kuti, “Alole! Ŵanache ŵa mwenye ŵala akwika. Yikamulenetu ni yambecheteje yila une jwakutumichila jwawo.” 36 Jwalakwe paŵamalisyaga kuŵecheta, ŵanache ŵa mwenye ŵala ŵajinjile ali mkulila mnope. Nombenawo mwenye ni ŵakutumichila ŵawo wosope ŵalisile mnope mwakutesya chanasa. 37 Nambo Abisalomu ŵatisile ni ŵapite kwa Talimai juŵaliji mwanache jwa Amihudi mwenye jwa ku Gesuli. Daudi ŵamlilile mwanache jwakwe Aminoni kwa masiku gejinji. 38 Abisalomu paŵatisile ni kwawula ku Gesuli, ŵatemi kweleko kwa yaka yakwana yitatu.
39 Pambesi pakwe Mwenye Daudi ŵasachilile mnope kwawula kwaŵaliji Abisalomu, pakuŵa mwenyewo ŵaliji ali amkululuchile jwalakwe ligongo lya chiwa cha Aminoni.