Buku Jaŵili ja Ayimwene

17 Mu chaka cha 12 cha Mwenye Ahasi jwa ku Yuda, Hosiya mwanache jwa Ela jwaŵele mwenye jwa Ayisalayeli ku Samaliya mwamti jwalamulile kwa yaka yakwana 9. 2 Jwalakwe jwapitilisye kutenda yakusakala pameso pa Yehofa nambo nganayika pakutenda yakusakala mpela muŵatendele mamwenye ga ku Isalayeli gagapali jwalakwejo mkanaŵe kuŵa mwenye. 3 Mwenye Salimanesa jwa ku Asiliya jwayiche kukumjimuchila Hosiya, mwamti Hosiyajo jwaŵele jwakutumichila jwa mwenyewo soni jwatandite kupeleka msongo. 4 Nambope mwenye jwa ku Asiliya jwapikene kuti Hosiya akumlinganyichisya chiwembu jwalakwe, pakuŵa Hosiyajo jwatumisye ŵamitenga kwa Mwenye So jwa ku Iguputo nambosoni nganapeleka msongo kwa mwenye jwa ku Asiliya mpela muŵatendelaga yaka yamunyuma. Paligongo lyeleli mwenye jwa ku Asiliya ŵamkamwile jwalakwe ni kumtaŵa, kaneko ŵamwugalile mundende.

5 Mwenye jwa ku Asiliya jwachijimuchile chilambo chosopecho, mwamti jwalakwe ŵayiche ni kuwusyungulila msinda wa Samaliya kwa yaka yitatu. 6 Mu chaka cha 9 cha Hosiya, mwenye jwa ku Asiliya ŵawusumwile msinda wa Samaliya. Kaneko mwenyejo ŵajigele Ayisalayeli ni kwawula nawo ku ukapolo ku chilambo cha ku Asiliya. Jwalakwe ŵaŵisile jemanjaji ku Halaha, ku Haboli kulwaliji lusulo lwa Gosani soni ku misinda ja Amedi.

7 Yeleyi yatendekwe ligongo lyakuti Ayisalayeli ŵamlemwechesye Yehofa Mlungu jwawo juŵakopwesye jemanjajo m’chilambo cha Iguputo ni kwatyosya mmyala mwa Falawo mwenye jwa ku Iguputo. Jemanjaji ŵatindiŵalilaga* milungu jine. 8 Jemanjaji ŵakuyagasoni ndamo sya ŵandu ŵamitundu jine jele Yehofa ŵajitopwesye pameso pa Ayisalayeliwo. Soni jemanjaji ŵakuyaga ndamo syele mamwenye ga ku Isalayeli gatamilikasisye.

9 Ayisalayeli ŵagambaga kukuya yindu yayaliji yangaŵajilwa pameso pa Yehofa Mlungu jwawo. Jemanjaji ŵapitilisye kutaŵa malo gakwela m’misinda jawo josope. Ŵatesile yeleyi kutandila kusyaliji sanja syawo mpaka kumisinda* jajakwete yakulichenjela. 10 Jemanjaji ŵapitilisye kupanganya yipilala yapadela soni njalamila* syapadela ni kuyiŵikaga pa litumbi lililyose lyelewu soni pasi pachitela chilichose chekulungwa. 11 Jemanjaji ŵapelekaga mbopesi syakoposya lyosi pamalo gosope gakwela. Ŵatendaga yeleyi mpela muŵatendelaga ŵandu ŵamitundu jine jele Yehofa ŵajitopwesye pameso pawo ni kujijawusya ku yilambo yine. Ŵapitilisye kutenda yindu yakusakala yakumtumbilikasya Yehofa.

12 Jemanjaji ŵapitilisye kujitumichila milungu jakunyalaya* jele Yehofa ŵaliji ali ŵasalile kala kuti , “Ngamkusosekwa kutenda yeleyi.” 13 Yehofa jwapitilisye kwakalamusya Ayisalayeli soni Ayuda kupitila mwa ŵakulochesya ŵakwe wosope soni kupitila mwa ŵandu ŵaŵalosyaga mesomkulola. Ŵakalamusyaga jemanjaji kuti, “Jemanja mleche matala genu gakusakala. Mpikanile malamusi gangu mwakamulana ni yosope yele une nalamwile achinangolo ŵenu soni gele une namtumichisye jemanja kupitila mwa ŵakulochesya ŵali ŵakutumichila ŵangu.” 14 Nambo jemanjaji nganapikanila. Ŵapitilisye kumusya mitima jawo mpela muŵatendele achinangolo ŵawo ŵele nganalosya kuti akumsamkulupilila Yehofa Mlungu jwawo. 15 Jemanjaji ŵapitilisye kukana malamusi ga Mlungu soni chilanga chakwe chele Mlungujo ŵatesile ni achinangolo ŵawo. Nganasakasoni kupikanila yindu yakwakumbusya yele Mlungu ŵapele jemanjajo pakusaka kwakalamusya. Jemanjajo ŵapitilisye kukuya milungu jangali mate, yayatendekasisye kuti nombenawo aŵe ŵangali mate. Ŵasyasyaga yaŵatendaga ŵandu ŵamitundu jine josope jajasyungulile jele Yehofa ŵaliji ali ŵalamwile kala jemanjajo kuti akajisyasyaga.

16 Jemanjaji ŵapitilisye kugaleka malamusi ga Yehofa Mlungu jwawo, mwamti ŵapanganyisye yiwanichisyo yiŵili yachisyano ya ŵanache ŵang’ombe, soni ŵapanganyisye lunjalamila lwapadela.* Nambosoni jemanjaji ŵapitilisye kuyitindiŵalila yindu yakwinani soni ŵamtumichilaga Baala. 17 Jemanjaji ŵajochagasoni ŵanache ŵawo ŵachalume soni ŵachakongwe pamoto, ŵatendaga yamasenga soni ŵalondolaga chisango. Jemanjaji ŵapitilisye kulipeleka pa kutenda yindu yayaliji yakusakala pameso pa Yehofa ni kumtumbilikasya jwalakwe.

18 Myoyo Yehofa ŵatumbilile mnope Ayisalayeli mwamti ŵatyosisye kuti akawoneka pameso pakwe. Jwalakwe ŵatyosisye mbumba* syosope sya Ayisalayeli ni gamba kuleka mbumba ja Yudape.

19 Nambo nombenawo Ayuda nganapitilisya kupikanila malamusi ga Yehofa Mlungu jwawo. Jemanjaji ŵatendagasoni ndamo syele Ayisalayeli ŵakuyaga. 20 Yehofa ŵayikanile yisukulu yosope ya Isalayeli, soni ŵayitendekasisye sooni nambosoni ŵayipeleche mmyala mwa ŵandu ŵaŵasumulaga yindu. Jwatesile yeleyi mpaka paŵayikene pakwatyosya jemanjaji pameso pakwe. 21 Jwalakwe ŵapapwile Ayisalayeli ni kwatyosya m’nyumba ja Daudi. Kaneko jemanjajo ŵamŵisile Yelobowamu mwanache jwa Nebati kuŵa mwenye. Nambo Yelobowamu ŵatendekasisye Ayisalayeli kuleka kumkuya Yehofa soni jwalakwe ŵatendekasisye jemanjaji kutenda ulemwa wekulungwa. 22 Nambosoni Ayisalayeli ŵapitilisye kutenda yakulemwa yosope yele Yelobowamu ŵatesile. Jemanjaji nganaleka kutenda yakulemwayi 23 mpaka pandaŵi jele Yehofa ŵatyosisye Ayisalayeli kuti akawonekasoni pameso pakwe. Jwalakwe jwatesile yeleyi mwakamulana ni yaŵaŵechete kupitila mwa ŵakulochesya wosope ŵaŵaliji ŵakutumichila ŵakwe. Myoyo Ayisalayeli ŵajigalidwe m’chilambo chawo ni kwawula ku ukapolo ku Asiliya mwamti ali kweleko mpaka lelojino.

24 Kaneko mwenye jwa ku Asiliya ŵajigele ŵandu ŵa ku Babulo, ŵa ku Kuta, ŵa ku Afa, ŵa ku Hamati soni ŵa ku Sefalafaimu ni kwaŵika m’misinda ja ku Samaliya mmalo mwa Ayisalayeli. Jemanjaji ŵajigele dela ja Samaliya ni kutamaga m’misinda jakwe. 25 Jemanjaji paŵatandite kutama ku Samaliya nganamjogopaga* Yehofa. Myoyo Yehofajo ŵatumichisye jemanjajo masimba, mwamti masimbago gawuleje ŵane mwa ŵanduwo. 26 Kaneko utenga wayiche kwa mwenye jwa ku Asiliya wakuti, “Mitundu ja ŵandu jaŵajityosisye msimangwawo ni kujiŵika mu dela ja Samaliya ngajikumanyilila dini* ja Mlungu jwa m’chilambocho. Myoyo Mlungujo aŵele ali mkwatumichisya jemanjajo masimba gagakwawulaga ŵanduwo. Yili myoyo ligongo lyakuti pangali ata jumo mwa jemanjajo jwakumanyilila dini ja Mlungu jwa m’chilambomo.”

27 Pelepo mwenye jwa ku Asiliya jwalamwile kuti, “Amjigale jwakutaga mbopesi jumo juŵamjigele kutyochela kweleko kuti awujile kumangwakweko ni chakulinga chakuti akajiganye jemanjajo dini ja Mlungu jwa m’chilambomo.” 28 Myoyo jumo mwa ŵakutaga mbopesi ŵele jemanjajo ŵajigele kutyochela ku Samaliya jwawujile kweleko ni kutamaga ku Beteli. Mwamti jwalakwe jwatandite kwajiganya ŵanduwo yampaka atende pakumjogopa* Yehofa.

29 Nambo mtundu uliwose wapanganyisye mlungu* jwakwe. Milunguji ŵajiŵisile m’nyumba syakutindiŵalila milungu syasyaliji pamalo gakwela gele Asamaliya ŵapanganyisye. Mtundu uliwose wapanganyisye mlungu jwakwe ku misinda jiŵatamaga. 30 Achalume ŵa ku Babulo ŵapanganyisye Sukoti-benoti, ŵa ku Kuti ŵapanganyisye Neliga, ŵa ku Hamati ŵapanganyisye Asima, 31 ŵa ku Afa ŵapanganyisye Nibihasi soni Talitaki, ŵa ku Sefalafaimu ŵajochaga ŵanache ŵawo pamoto kwa milungu jakolanjikwa Adilameleki soni Anameleki. Jeleji jaliji milungu ja ku Sefalafaimu. 32 Atamose kuti jemanjaji ŵamjogopaga Yehofa, nambope ŵasagulaga ŵandu wamba kuti aŵe ŵakutaga mbopesi ŵa m’malo gakwela. Ŵakutaga mbopesiŵa ŵatumichilaga jemanjajo m’nyumba syakutindiŵalila milungu sya m’malo gakwela. 33 Jemanjajitu ŵamjogopaga Yehofa, nambope ŵatindiŵalilaga milungu jawo mwakamulana ni dini* ja mitundu ja ŵandu ŵa kumangwawo kuŵatyochele.

34 Mpaka lelojino, jemanjaji akukuya yasyatendaga dini* syawo syakala. Pangali jumo mwa jemanjaji juŵamtindiŵalilaga* Yehofa, pangali juŵakuyaga yosope yaŵasalile kuti atendeje, nganapikanilaga chilamusi nambosoni nganapikanilaga malamusi gosope gele Yehofa ŵapeleche kwa ŵanache ŵa Yakobo, juŵamchenjile lina ni kuŵa Isalayeli. 35 Yehofa paŵatendaga chilanga ni jemanjaji ŵalamwile kuti, “Ngamkusosekwa kujijogopa milungu jine soni ngamkusosekwa kujitindiŵalila milungujo kapena kujitumichila kapenasoni kupeleka mbopesi kwa milungujo. 36 Nambo mkusosekwa kumjogopa Yehofa juŵamkopwesye jemanja m’chilambo cha Iguputo ni machili gakwe gekulungwa soni ni mkono wakwe wetambasukule. Mumtindiŵalileje jwalakwe pejo soni mpelecheje mbopesi kwa jwalakwe pejo. 37 Nambosoni ndaŵi syosope mkusosekwa mkuyeje mwakusamala yosope yaŵamsalile kuti mkuyeje, chilamusi chakwe soni malamusi gosope gaŵamlembele jemanja, nambosoni ngamkusosekwa kujijogopa milungu jine. 38 Ngamkusosekwasoni kuliŵalila chilanga chanatesile ni jemanja soni ngamkusosekwa kujijogopa milungu jine. 39 Nambo mumjogopeje Yehofa Mlungu jwenu, pakuŵa jwalakwe ni juchachimkulupusya jemanja mmyala mwa adani ŵenu wosope.”

40 Nambo jemanjaji nganapikanila, mwamti ŵakuyaga yasyatendaga dini* syawo syakala. 41 Mitundu ja ŵandu jeleji jamjogopaga Yehofa, nambope jatumichilagasoni milungu jawo jakusepa. Ŵanache ŵawo soni yisukulu yawo akutendape yaŵatendaga achinangolo ŵawo mpaka lelojino.