Chiwunukuko Chakwawula kwa Yohane
17 Lilayika limo mwa malayika 7 gagajigele mbale 7 gala lyayiche kwa une ni kusalila kuti, “Kwende ngamlosye chilango* chachilipochele lihule lyekulungwa lyalitemi pamesi gejinji. 2 Lihule lyeleli lyatesile chikululu* ni mamwenye ga pachilambo chapasi, soni lyatendekasisye ŵandu ŵakutama pachilambo chapasi kukolelwa ni finyo jwa chikululu* chakwe.”
3 Mwamachili ga msimu weswela, lilayikali lyanjigalile ku chipululu. Kweleko nam’weni jwamkongwe ali akwesile pachilombo chechejewu. Chilombocho chakwete mena gejinji gakunyosya Mlungu soni chakwete mitwe 7 ni misengo 10. 4 Jwamkongwejo ŵawete yakuwala yakwawulila ku uchejewu soni yine yechejewu mnope. Nambosoni jwalakwe ŵalisalalisye ni golide, maganga ga mtengo wapenani soni ngale.* Ŵajigelesoni chikapu chagolide mmyala mwakwe chegumbale ni yindu yakunyalaya soni yausakwa ya ndamo jakwe ja chikululu.* 5 Pausyo pakwe paliji pana lina lyakusisika ngopolelo jakwe. Ŵalembilepo kuti, “Babulo Jwamkulungwa, mama jwa mahule soni jwa yindu yakunyalaya ya pachilambo chapasi.” 6 Kaneko nayiweni kuti jwamkongwejo ŵaliji ali akolelwe ni myasi ja ŵaswelawo soni ni myasi ja mboni sya Yesu.
Panam’weni jwamkongwejo, nasimonjile mnope. 7 Pelepo lilayika lila lyambusisye kuti, “Ligongo chichi mkusimonga? Chinamsalile yakusisika yakwamba jwamkongwejo soni ya chilombo chakwesile chila, chele chikwete mitwe 7 soni misengo 10. 8 Chilombo chimwachiwenicho chapali, nambo apano pangali, nambope chisigele panandi kukopoka mwisimbo, soni kaneko chichijawula kukonasika. Ŵandu ŵakutama pachilambo chapasi ŵele nganiŵalemba mena mu mpukutu wa umi kutandila paŵachitamilikasisye chilambo,* chachisimonga mnope pachachiyiwona kuti chilombocho chapali, soni pangali, nambo chichiŵaposoni.
9 “Apatu ni pakusosekwa lunda kuti mundu apikanichisye yeleyi. Mitwe 7 jimwajiweni jila jikwimila matumbi 7 gele jwamkongwejo atemi penani pakwe. 10 Matumbiga gakwimila mamwenye gakwana 7. Msano gagwile kala, jumo jupali, soni jwinejo nganijuŵe kwika. Nambo pajuchiyika, juchisosekwa kutama kwakandaŵi kamnono. 11 Nambosoni chilombo chele chapali nambo apano pangali, chelecho chikwimila mwenye jwa 8, nambo jwapali ligongo lya mamwenye 7 gala, soni jukwawula kukonasika.
12 “Misengo 10 jimwajiweni jila jikwimila mamwenye 10 gele nganigaŵe kupochela uchimwene, nambo gachipochela machili kuti galamulile kwa awala jimo pampepe ni chilombo chila. 13 Mamwenyega gakwete nganisyo syakulandana, myoyo gachipeleka machili soni ulamusi wawo kwa chilombo chila. 14 Jemanjaji chachimenyana ni Mwanache Jwangondolo. Nambo Mwanache Jwangondolojo chachagomeka jemanjaji ligongo jwalakwe ali Ambuje ŵa achambuje soni Mwenye jwa mamwenye. Nambosoni, ŵele Mlungu ŵaŵilasile soni kwasagula, ŵelesoni ŵali ŵakulupichika, chachigomeka nawo.”
15 Kaneko lilayikalyo lyasalile kuti, “Mesi gamwagaweni pele lihulelyo litemi, gakwimila ŵandu ŵa mitundu jakulekanganalekangana, magulu ga ŵandu, soni ŵandu ŵa yilambo ni yiŵecheto yakulekanganalekangana. 16 Misengo 10 jimwajiweni jila soni chilombocho, yichiŵengana ni lihulelyo. Yichilipapulanya lihulelyo ni kulileka lili makonope. Nambosoni yichilya mnowu wakwe ni kulitinisya ni moto. 17 Mlungu ŵaŵisile yeleyi m’mitima jawo kuti jemanjaji atende yakusaka yakwe. Pakutenda yeleyi, Mlungu chachatendekasya kukwanilisya chakulinga chawo chimpepe, chakuti apeleche uchimwene wawo kwa chilombocho, kuti chilamulileje mpaka pandaŵi jele maloŵe ga Mlungu gachikwanilichikwa. 18 Soni jwamkongwe jumwam’weni jula akwimila msinda wekulungwa wawukusalamulila mamwenye ga pachilambo chapasi.”