Ngani Syambone Syaŵalembile Luka
15 Sambano ŵakomesya msongo wosope soni ŵakulemwa wosope ŵasongangene kwa Yesu kuti apikanile maloŵe gakwe. 2 Kweleko Afalisi ni alembi ŵaliji mkuŵechetana yakwamba jwalakwejo kuti, “Mundu aju akusiŵapochela chenene ŵakulemwa soni akusalya nawo pampepe.” 3 Pelepo Yesu ŵasalile jemanjajo chiwanichisyo. Jwatite, 4 “Tujile kuti mundu akwete ngondolo 100. Sambano jimo pajisokonechele, ana ngasasileka sine 99 sila m’chipululu ni kwawula kukujisosasosa jajisokonechelejo mpaka ali ajipatile? 5 Pajipatile akusajiŵika pekoyo soni akusasangalala mnope. 6 Soni payiche kumangwakwe, akusiŵaŵilanga achimjakwe soni ŵakuŵandikana nawo nyumba ni kwasalila kuti, ‘Kwende tusangalale yimpepe, ligongo ngondolo jangu jasokonechele nambo najipatile.’ 7 Une ngumsalila jemanja kuti, kwinani kuchiŵasoni chisangalalo chekulungwa ligongo lya jwakulemwa jumo jwagalawiche mtima kulekangana ni ŵandu 99 ŵakulungama ŵele ngakusosekwa kugalawuka mtima.
8 “Kapena ana jwamkongwe jwapi jwakwete mbiya 10 sya dalakima, jwele mbiya jimo pajimjasiche, nganaŵa apambile nyali ni kupyajila m’nyumba mwakwe soni kujisosasosa mwakusamala mpaka ali ajipatile? 9 Soni pajipatile, akusiŵaŵilanga achimjakwe soni ŵakuŵandikana nawo nyumba ni kwasalila kuti, ‘Kwende tusangalale yimpepe, ligongo mbiya jangu ja dalakima jajasiche nambo najipatile.’ 10 Une ngumsalila jemanja kuti, malayika ga Mlungu gakusasangalalasoni ligongo lya jwakulemwa jumo jwagalawiche mtima.”
11 Kaneko jwalakwe ŵatite, “Mundu jwine jwakwete ŵanache ŵaŵili ŵachalume. 12 Mwanache jwamnandi ŵasalile babagwe kuti, ‘Baba, ambe mbali jangu pa chipanje chaŵasosekwaga kumba.’ Myoyo babawo ŵagaŵenye chipanje chawo kwa ŵanachewo. 13 Pali papite masiku gamnono, mwanache jwamnandijo jwalongenye yindu yakwe yosope ni kwawula ku chilambo chine. Kweleko ŵajonasile yindu yakwe mwakutama umi wakulijasilila. 14 Yindu yakwe yosope payamasile, sala jakogoya jagwile m’chilambocho, mwamti jwalakwejo jwatandite kulaga. 15 Jwalakwe jwayikene pakwawula kukulipeleka jika kwa mundu jwine jwa m’chilambocho. Mundujo ŵamtumisye jwalakwejo kukulisya maguluŵe kwitinji. 16 Jwalakwe ŵaliji ni sala mwamti ŵaliji mkulalamika yakulya ya maguluŵe, nambo pangali mundu juŵasakaga kumpa kandu.
17 “Nambo lunda palwamyichile, jwatite, ‘Ŵaganyu ŵa baba ŵangu akwete yakulya yejinji, nambo une nguwa ni sala akuno! 18 Sambano chinyakuche kwawula kwa baba ŵangu, ni chingasalile kuti, “Baba, ndemwisye pameso pa Mlungu jwakwinani soni pameso pawo. 19 Nganguŵajilwasoni kukolanjidwa kuti mwanagwawo. Agambe kunjigala mpela jumo mwa ŵaganyu ŵawo.”’ 20 Myoyo jwalakwe ŵanyakwiche kwawula kwa babagwe. Ali chapakutalichila, babagwewo ŵam’weni ni ŵamtendele chanasa. Myoyo ŵamwutuchile ni kumkumbatila mwachinonyelo.* 21 Kaneko mwanachejo ŵasalile babagwewo kuti, ‘Baba, ndemwisye pameso pa Mlungu jwa kwinani soni pameso pawo. Nganguŵajilwasoni kukolanjidwa kuti mwanagwawo.’ 22 Nambo babawo ŵasalile achikapolo ŵawo kuti, ‘Mwutuche, mjigale mkanjo wambone ula ni mum’weche mwanacheju. Mum’wechesoni mbete soni sapato kusajo syakwe. 23 Nambosoni mjigale mwanache jwa ng’ombe jwakwimbala ni kumwulaga, kuti tulye ni kusangalala, 24 pakuŵa mwananguju jwaliji jwam’we nambo sambano ali jwaumi, jwasokonechele nambo sambano jupatikene.’ Myoyo jemanjajo ŵatandite kusangalala.
25 “Pandaŵiji mwanache jwamkulungwa jula jwaliji kumigunda. Paŵaliji mkuwujila kunyumba, ali aŵandichile, ŵapikene nyimbo soni kuŵina kwa ŵandu. 26 Myoyo ŵamŵilasile jwamasengo jumo ni kumwusya yayikutendekwa. 27 Jwamasengojo ŵamjanjile kuti, ‘Mpwenu juyiche, soni baba ŵenu amwulajile kang’ombe kakwimbala ligongo juyiche juli chenene.’ 28 Nambo jwalakwejo ŵatumbile soni ŵakanile kwinjila m’nyumbamo. Kaneko babagwewo ŵakopweche ni kutanda kumchondelela. 29 Nambo jwalakwe ŵajanjile babagwewo kuti, ‘Baba, yaka yosope yeneyi mbele ndili mkwatumichila soni mbele ndili kutenda chilichose chandumile, nambo nganambeje atamose kamwanache ka mbusi kuti sangalale ni achimjangu. 30 Nambo pagambile kwika mwanagwawoju, juŵajonasile chipanje chawo ni mahule, amwulajile kang’ombe kakwimbala.’ 31 Babawo ŵamsalile jwalakwejo kuti, ‘Mwanangu, ndaŵi josopeji mŵele mli ni une, soni yindu yangu yosope yili yenu. 32 Nambo mwayiŵelelemu twasosekwaga kutenda pwando ni kusangalala, pakuŵa mpwenuju jwaliji jwam’we nambo sambano ali jwaumi, jwasokonechele nambo sambano jupatikene.’”