Masalimo
91 Jwalijose jwakusatama m’malo gakusisika ga Jwakwinani Mnope
Chachijuŵa mu m’bulili wa Jwamachili Mnopejo.
2 Une chinjimsalila Yehofa kuti, “Wawojo ali malo gangu gakuuŵa soni gakulimbangana,
Mlungu jwangu jwangusinamdalila.”
3 Pakuŵa jwalakwe chachimkulupusya mmwejo ku chitega cha jwakusakula yijuni,
Chachimkulupusya mmwejo ku mlili wakonanga.
4 Ni mang’omba gakwe chachimwunichila mmwejo,*
Soni chimchitilila kusi kwa mapapiko gakwe.
Kukulupichika kwakwe kuchiŵa mpela chakuchijila chekulungwa soni lipupa lyakumchenjela mmwejo.
5 Mmwejo ngasimjogopa yindu yakogoya yakutendekwa chilo,
Kapena mipamba jakwika kwa mmwejo musi.
6 Ngamsimjogopasoni mlili wakwika kwa mmwejo chilo,
Kapena mlili wakonanga wakwika musi.
7 Ŵandu 1,000 chachiwila pambali penu ni mliliwu
Soni ŵandu 10,000 chachiwila kumbali jenu ja mkono wamlyo.
Nambo mmwejo mliliwo ngasiwumŵandichila.
8 Mmwejo chimchigambaga kuyiwona yeleyi yili mkutendekwa,
Pandaŵi jachachipochelaga chilango* ŵandu ŵakusakala.
9 Pakuŵa mmwejo mwatite, “Yehofa ali malo gangu.”
Mwamtesile Jwakwinani Mnopejo kuŵa malo genu gakutama.*
10 Myoyo pangali yakogoya yiliyose yayichimgwila mmwejo,
Soni pangali mlili uliwose wawuchiyika chiŵandika tenti jenu.
11 Pakuŵa jwalakwe chachigalamula malayika gakwe pakwamba ya mmwejo,
Kuti gamchenjele m’matala genu gosope.
12 Malayikago gachimjangata mmwejo mmyala mwawo,
Kuti mkaliputisya sajo* syenu paliganga.
13 Chimchilipondaponda lisimba soni litewo.
Chimchiliponda ni sajo syenu lisimba lyamachili soni lijoka lyekulungwa.
14 Mlungu ŵatite, “Ligongo lyakuti jwalakwejo akusanonyela une,* une chinjimkulupusya.
Chinjimchenjela jwalakwe ligongo lyakuti akusalimanyilila* lina lyangu.
15 Jwalakwejo chachimbilanga une, mwamti chinjimjanga.
Chinjiŵa ni jwalakwejo pandaŵi jakusimana ni yipwetesi.
Chinjimkulupusya soni chinjimchimbichisya.
16 Chinjimpa jwalakwe umi wawulewu,
Soni chinjimlosya jwalakwejo yangusatenda pakulupusya.”*