Ekisodo
7 Kaneko Yehofa ŵamsalile Mose kuti, “Une namtesile mmwejo kuti mŵe mpela Mlungu pameso pa Falawo, soni Aloni mkulugwenu chaŵe mpela jwakulochesya jwenu. 2 Mmwejo mumsalileje jwalakwe yosope yachinamlamuleje, soni Aloni mkulugwenujo chaŵecheteje yeleyo kwa Falawo. Mwamti jwalakwe chachakunda Ayisalayeliwo kukopoka m’chilambo chakwe. 3 Nambo une chinjimleka melepe Falawo kuti aŵe jwakumula mtima, soni une chinjitendekasya kuti yimanyisyo ni yakusimonjesya yangu yiŵe yejinji m’chilambo cha Iguputo. 4 Falawo ngasampikanila mmwejo. Nambo une chinjilosya machili gangu pa Iguputo soni chinjigakoposya magulu gosope ga ŵandu ŵangu, Ayisalayeli, kutyochela m’chilambo cha Iguputo, mwamti chinjapa chilango* chekulungwa Aiguputowo. 5 Aiguputo chachimanyilila nditu kuti une ndili Yehofa pachinjatambasukulila mkono wangu wamachili jemanjajo ni kwakoposya Ayisalayeli kutyochela pasikati pawo.” 6 Myoyo Mose ni Aloni ŵatesile yosope yaŵalamwile Yehofa kuti ayitende, ŵatesile mmomo. 7 Mose ŵaliji ali akwete yaka yakwana 80, soni Aloni ŵaliji ali akwete yaka yakwana 83 pandaŵi jele jemanjaji ŵaŵechetanaga ni Falawo.
8 Sambano Yehofa ŵaŵechete ni Mose soni Aloni kuti, 9 “Naga Falawo akamsalile jemanja kuti, ‘Mtende chakusimonjesya,’ pelepo mmwejo mkamsalile Aloni kuti, ‘Mjigale ndodo jenujo ni mjiponye pasi pameso pa Falawo.’ Pachakatende yeleyi ndodojo jichisanduka lijoka lyekulungwa.” 10 Myoyo Mose ni Aloni ŵapite kwa Falawo soni ŵatesile yosope yele Yehofa ŵalamwile. Aloni ŵaponyisye pasi ndodo jakwe jila pameso pa Falawo ni ŵakutumichila ŵakwe, mwamti ndodojo jasandwiche lijoka lyekulungwa. 11 Nambo Falawo ŵaŵilasile achalume ŵalunda soni ŵakutenda yamasenga. Nombenawo ŵakutaga mbopesi ŵakutenda yamasenga ŵa ku Iguputo ŵatesile iyoyo mwakamulana ni masenga gawo. 12 Jwalijose ŵaponyisye pasi ndodo jakwe, mwamti ndodosyo syasuchile majoka gekulungwakulungwa. Nambo ndodo ja Aloni jamisile ndodo sya ŵane wosopewo. 13 Nambo Falawo ŵapitilisye kuŵa jwakumula mtima mwamti nganiŵapikanila jemanjaji, mpela muŵaŵechetele Yehofa.
14 Kaneko Yehofa ŵamsalile Mose kuti, “Falawo ajumwisye mtima wakwe soni jwalakwe akanile kwakunda ŵandu ŵangu kutyoka m’chilambocho. 15 Sambano mjawule kwa Falawo kundaŵi. Jwalakwe chachiŵa ali mkwawula ku lusulo lwa Nailo. Myoyo mkajime pakuti mkasimane ni jwalakwejo mungulugulu lusulo lwa Nailo, soni pamkwawulapo mjigale ndodo mmyala mwenu, jajasandwiche lijoka jila. 16 Kaneko mkamsalile jwalakwejo kuti, ‘Yehofa Mlungu jwa Ahebeli andumile une kwa mmwejo, jwalakwe atite, “Mwakunde ŵandu ŵangu kutyoka kuti andumichile une m’chipululu.” Nambo mmwejo nganimpikanila mpaka apano. 17 Sambano ayi ni yaŵechete Yehofa, “Une chinagapute mesi ga m’lusulo lwa Nailo ni ndodo jajili mmyala mwangu, soni mesigo chigasanduche ni kuŵa myasi. Pelepo mmwejo chimchimanyilila kuti une ndili Yehofa. 18 Somba syosope sya mu lusulo lwa Nailo sichiwa, soni lusulolo luchinunga, mwamti yichiŵa yakusawusya kuti Aiguputo amwe mesi ga mu lusulo lwa Nailo.”’”
19 Kaneko Yehofa ŵamsalile Mose kuti, “Mumsalile Aloni kuti, ‘Mjigale ndodo jenu soni mtambasukule mkono wenu ni kulanjila mesi ga mu Iguputo, kutandila ni mesi gagali musulo, mungalande,* m’malo galigose gakutama mesi soni m’matanda gosope. Mtende yeleyi kuti mesigo gasanduche myasi. Mesi gosope ga m’chilambo cha Iguputo gachiŵa myasimyasipe.’ Mu chilambo chosope cha Iguputo muchiŵa myasimyasipe, atamose mu yakutechela mesi yamatabwa soni yamaganga muchiŵa myasi.” 20 Ndaŵi jijojo Mose ni Aloni ŵatesile yosope yaŵasalile Yehofa yila. Jwalakwe ŵanyakwile ndodo jakwe ni kuputa mesi ga mu lusulo lwa Nailo pameso pa Falawo ni ŵakutumichila ŵakwe, mwamti mesi gosope ga mu lusulomo gasandwiche myasi. 21 Pelepo somba syosope sya mu lusulomo syawile, mwamti lusulolo lwatandite kununga. Aiguputo ŵalepelaga kumwa mesi ga mu lusulo lwa Nailo, soni myasi jaliji palipose m’chilambo chosope cha Iguputo.
22 Nambo ŵakutaga mbopesi ŵakutenda yamasenga ŵa ku Iguputo ŵatesilesoni iyoyo mwakamulana ni masenga gawo, mwamti Falawo jwapitilisye kuŵa jwakumula mtima soni nganiŵapikanila jemanjajo mpela muŵaŵechetele Yehofa. 23 Kaneko Falawo ŵawujile kumangwakwe. Nambo yosope yayatendekweyo nganakola nayo masengo ata panandi. 24 Myoyo Aiguputo wosope ŵatandite kusola yisima mungulugulu lusulo lwa Nailo kuti apate mesi gakumwa ligongo yaliji yangakomboleka kuti amwe mesi ga mu lusulo lwa Nailo. 25 Papitile masiku gakwana 7 kutyochela pele Yehofa ŵagatendekasisye mesi ga mu lusulo lwa Nailo kuŵa myasi.